မြန်မာနိုင်ငံတွင် အာဖရိကဝက်အပြင်းဖျားရောဂါ (ASF) မှ ကာကွယ်ရန်နှင့် ဝက်မွေးတောင်သူများ ဆုံးရှုံးနစ်နာမှုများ နည်းနိုင်သမျှနည်းစေရန်အတွက် ပြည်ပမှ ဝက်အရှင်နှင့် ဝက်ထွက်ပစ္စည်းများ တင်သွင်းနေခြင်းကို ယာယီပိတ်ပင်တားမြစ်ပေးရန် ပုဂ္ဂလိကကဏ္ဍဖွံ့ဖြိုးတိုးတက်ရေးကော်မတီသို့ တင်ပြထားကြောင်း မြန်မာနိုင်ငံ မွေးမြူရေးလုပ်ငန်းအဖွဲ့ချုပ်မှ သိရသည်။
မြန်မာနိုင်ငံသည် အာဖရိကဝက်အပြင်းဖျားရောဂါ (ASF) ကူးဆက်ခံ နိုင်ငံတစ်နိုင်ငံဖြစ်ပြီး အိမ်နီးချင်းနိုင်ငံများတွင်လည်း အဆိုပါ အာဖရိကဝက်အပြင်းဖျားရောဂါနှင့် အခြားဝက်ရောဂါများ ဖြစ်ပွားနေခြင်းကြောင့် အာဖရိကဝက်အပြင်းဖျားရောဂါဖြစ်ပွားပါက ရာနှုန်းပြည့်သေစေနိုင်ပြီး ဝက်မွေးမြူရေးသမားများ ကြီးမားသောဆုံးရှုံးမှုများနှင့် မလွဲမသွေ ရင်ဆိုင်ရမည်ဖြစ်ကြောင်း သိရသည်။
"နိုင်ငံတကာ လေဆိပ်တွေအပါအဝင် နယ်စပ်ဝင်/ထွက်ပေါက်ဂိတ်တွေကနေ ဝက်အရှင်နဲ့ ဝက်ထွက်ပစ္စည်းတွေ တရားမဝင် ဝယ်ယူသယ်ဆောင်ခြင်းကို ထိရောက်စွာ တားမြစ်ပေးပါ။" ဟု မြန်မာနိုင်ငံ မွေးမြူရေးလုပ်ငန်းအဖွဲ့ချုပ် ဥက္ကဋ္ဌ ဒေါက်တာမြဟန်က ပြောသည်။
ဒီဇင်ဘာလ ၈ ရက်က ကုန်သည်စက်မှုအသင်းချုပ်တွင် ကျင်းပပြုလုပ်သည့် နိုင်ငံတော် ဒုတိယသမ္မတ (၁) ဦးဆောင်သော ပုဂ္ဂလိကကဏ္ဍဖွံ့ဖြိုးတိုးတက်ရေးကော်မတီနှင့် ပုဂ္ဂလိကလုပ်ငန်းရှင်များ ပုံမှန်တွေ့ဆုံပွဲ (၃၁ ကြိမ်မြောက်)၌ ယင်းကဲ့သို့ တင်ပြခဲ့ခြင်းဖြစ်သည်။
ပြည်တွင်းဝက်မွေးမြူရေးသမားအများစု၏ အဓိကလိုအပ်ချက်ဖြစ်သော ပူးပေါင်းဆောင်ရွက်မှု၊ နည်းပညာ၊ ချေးငွေ၊ မြေယာအသုံးချခွင့်၊ ဝက်မျိုးရင်းစစ်ခြံ၊ ဈေးကွက်ခိုင်မာတည်ငြိမ်မှု၊ ဝက်မျိုးကောင်း မျိုးသန့် (GGP-GP) များ အစရှိသည်တို့ကို ထိထိရောက်ရောက် ကူညီဆောင်ရွက်ပေးသင့်ကြောင်း သိရသည်။
အေးအေးမြင့်(ABM)