ဘစ်စပိုင်ရီဘက်ဆိုဒီယမ် (Bispyribac sodium) စပါး ရွေးချယ်ပေါင်းသတ်ဆေးသည်ပင်လုံးပြန့်အာနိသင်ရှိ၍ ပေါင်းပင်၏အရွက်၊အမြစ်တို့မှတစ်ဆင့်စုပ်ယူပြီး ပေါင်းပင်၏အစိတ်အပိုင်းအားလုံးကိုတိုက်ခိုက်နှိမ်နှင်းပေးပါသည်။

ပေါင်းပင်ထွက်ပေါ်ပြီးမှအသုံးပြုရသော ပေါင်းသတ်ဆေး (Post - emergence)အမျိုးအစားဖြစ်ပြီး မြက်အုပ်စု (ဥပမာ-မြက်သီး၊ဝမ်းဘဲစာမြက်)၊ မြက်မုံညင်းအုပ်စု(ဥပမာ- မြက်မုန်ညင်းစိမ်း/ဝါ၊ မြက်ကွမ်းသီးလေး)နှင့် မြက်မုန်ညင်းအုပ်စု (ဥပမာ-ကတောက်ဆက်၊ လယ်လေးညှင်း)များကို နှိမ်နှင်းရာတွင် ထိရောက်မှုရှိပါသည်။

ဘစ်စပိုင်ရီဘက်ဆိုဒီယမ် ပေါင်းသတ်ဆေးသည် စပါးစိုက်ခင်းအားရေပြောင်အောင်ထုတ်ပြီးမှ ဖျန်းပက်ပေးရပါမည်။

လုံလောက်သော အစိုဓာတ်မရှိချိန်(စိုက်ခင်းခြောက်သွေ့နေချိန်)ဖျန်းပက်ပါက ဆေးအာနိသင်ထိရောက်မှုနည်းပြီး ပေါင်းနှိမ်နှင်းနိုင်စွမ်းလျော့ကျနိုင်သည်။

မျိုးစေ့ချပြီးချိန်(သို့) ရွှေ့ပြောင်းစိုက်ပြီးချိန် (၁၀-၁၅-၂၀)ရက်အတွင်း ဖျန်းပေးနိုင်မှထိရောက်မှုရှိသည်။ ပေါင်းပင်အရွက်၂ ရွက် မှ ၅ ရွက် ထွက်ချိန်အတွင်း သုံးစွဲနိုင်မှ နှိမ်နင်းနိုင်စွမ်းရှိမည်။

ပေါင်းသတ်ဆေးအာနိသင်ကို ပေါင်းပင်များမှအာနိသင်အပြည့်အဝရရှိရန်နှင့် ပေါင်းပင်အသစ်များမပေါ်ထွက်လာရန်အတွက် ဆေးဖျန်းပြီး ၁ ရက်မှ ၃ ရက်အတွင်းရေအနည်းငယ် ၁လက်မ ပြန်သွင်းပေးပြီးနောက် ၅ ရက် မှ ၇ ရက် အထိ ထိန်းထားသင့်သည်။ 

ဆေးဖျန်းပြီး ၃ ရက်မှ ၅ ရက်အတွင်း ပေါင်းငတ်ဆေး၏ ပေါင်းပင်အပေါ်ထိရောက်မှုကို မျက်စိဖြင့်မြင်တွေ့နိုင်ပြီး ဆေးဖျန်းပြီး ၂ ပတ်မှ ၃ ပတ်အကြာတွင် ပေါင်းပင်အားလုံး ကြီးထွားမှုရပ်တန့်ခြင်းနှင့် အရွက်များဝါခြောက်သေဆုံးသွားခြင်းကိုမြင်တွေ့ရပါမည်။ 

ဆောင်ပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ဟုထည့်ပေးပါရန် မေတ္တာရပ်ခံအပ်ပါသည်။