စိုက်ပျိုးနိုင်တဲ့ မြေအမျိုးအစားတွေထဲမှာဆိုရင် ရွှံ့စေးမြေတွေက အပင် စိုက်လို့မရတော့ဘူးလား….

ရွှံ့မြေဟာ မြေကြီးမှုန် သေးသေးနုနုလေးတွေနဲ့ ပါဝင်ဖွဲ့စည်းထားတာဖြစ်တာမို့ ရေလေးများ စိုနေရင်ဖြင့် နူးညံ့တယ် စေးကပ်တဲ့ သဘောရှိပါတယ်။ နောက်ထပ်

(၁) ရေထိန်းစွမ်းအား 

သိကြတဲ့အတိုင်းပါပဲ တစ်ခြားမြေကြီးတွေနဲ့စာရင် သူက ရေထိန်းစွမ်းအား တော်တော်ကောင်းပါတယ်။ 

(၂) အာဟာရတွေ ကျပ်ကျပ်သိပ်သိပ်

ရွှံ့မှုန်လေးတွေက အနုတ်လက္ခဏာ ဓာတ်ရှိပါတယ်။ အဲ့လို ရှိခြင်းအားဖြင့် ဆွဲငင်နိုင်တာက မျိုးမတူတဲ့ အပေါင်းဓာတ်လေးတွေပါပဲ။ ပိုတက်တို့ ကယ်လ်စီယမ်တို့ မဂ္ဂနီစီယမ်တို့လိုမျိုး အပေါင်းလေးတွေကို ဆွဲယူထားနိုင်ပါတယ်။

(၃) ထိုးဖောက်အား နည်းတယ်

ရွှံ့စေးမြေတွေက သိတဲ့အတိုင်းပဲ ရေထိုးဖောက်ဖို့ ကြာပါတယ်။ ဆိုတော့ ရေနဲ့အတူ စိမ့်ဝင်စီးဆင်းပြီး ဆုံးရှုံးတယ်ဆိုတာ အကန့်အသတ်ဖြစ်သွားပါမယ်။ အမြစ်ဇုန်နားမှာ အာဟာရဓာတ်တွေ ကြာကြာနေနိုင်သွားပါလိမ့်မယ်။ 

(၅) ပုံပြောင်းလဲနိုင်စွမ်း

စိုနေရင်တော့ လိုရာ ပုံသွင်းလို့ရပေမဲ့လို့ ခြောက်သွေ့သွားရင်တော့ အလွန်အမင်း အပင်လေးတွေကို ဆွဲငင်ထားတတ်ပါတယ်။

ရွှံ့စေးမြေကရော အပင်တွေအတွက် တကယ်ပဲ အသုံးဝင်ရဲ့လား

၁။ ရေကို အကျိုးရှိရှိ အသုံးချနိုင်ခြင်း

ရွှံ့မြေက သိကြတဲ့အတိုင်း ရေကိုစုပ်ယူထားနိုင်တာမို့လို့ အပြင်ရာသီဥတုက ခြောက်သွေ့နေတယ်ဆိုရင်တောင် သူ့မှာ စိုထိုင်းမှုကို ထိန်းထားနိုင်ပါတယ်။ ရေနည်းနည်းနဲ့ စိုက်ပျိုးလို့ရတဲ့ မြေမျိုးဖြစ်ပါတယ်။

၂။ အာဟာရဓာတ် ပိုမိုများပြား

ရွှံ့စေးမြေဟာဆိုရင်တော့ သဘာဝအားဖြင့်ကိုက မြေဆီသြဇာကြွယ်ဝတာမို့ မြေသြဇာသုံးစွဲမှုကိုလည်း လျော့ချနိုင်ပါတယ်။

၃။ အမြစ်အတွက်

မြေကြီးက ငြိမ်သက်တဲ့သဘောရှိတာမို့လို့ အမြစ်စနစ်လည်း အတည်တကျ နေရာတစ်ခုတည်းမှာ ဖွံ့ဖြိုးစေနိုင်ပါတယ်။ 

ဘာသီးနှံတွေ စိုက်လို့ရသလဲ

စပါး - ရေလွှမ်းစိုက်တဲ့ စပါးတွေ ကို ရွှံ့မြေမှာစိုက်ပျိုးနိုင်ပါတယ်

ဂျုံ၊ ကြံ ကလည်း အမြဲတမ်း စိုစိုလေးဖြစ်နေတာကို ကြိုက်တာမို့လို့ စိုက်နိုင်ပါတယ်။

ပဲမျိုးစုံလည်း စိုက်ပျိုးနိုင်သလို ရေကြိုက်သီးနှံလိုမျိုး ဖြစ်တဲ ကန်စွန်းတို့ စိုက်ပျိုးလို့ရတဲ့ ရေကန် အသေးစားလိုမျိုးလည်း လုပ်ပြီးတော့ စိုက်ပျိုးနိုင်ပါသေးတယ်။

နောက်ထပ် အစိုဓာတ်ကြိုက်တဲ့ ဝါပင်နဲ့ ကိုက်လန်၊ ဟင်းနုနယ်တို့လိုမျိုး ဟင်းသီးဟင်းရွက်တွေကိုလည်း စိုက်ပျိုးနိုင်ပါတယ်။ 

ဒါတွေက ရွှံ့စေးမြေရဲ့ ကောင်းကျိုးတွေနဲ့ စိုက်ပျိုးလို့ရတဲ့ သီနှံတွေအကြောင်းပဲ ဖြစ်ပါတယ်။ နောက်ဆောင်းပါးမှာ ရွှံ့စေးမြေမှာ စိုက်ပျိုးမယ်ဆို ကြုံတွေ့ရနိုင်တဲ့ အခက်အခဲတွေနဲ့ ဖြေရှင်းနည်းတွေကို ပြောပြပေးသွားပါ့မယ်ဗျ..။

ဆောင်းပါးရှင်ဆရာမှ အစိမ်းရောင်လမ်းဆော့ဝဲသို့ ပေးပို့ထားသော အစိမ်းရောင်လမ်း၏ မူပိုင်ဆောင်းပါးဖြစ်သဖြင့် ဆောင်းပါးများ၊ သတင်းများ ကူးယူဖော်ပြလိုပါက “အစိမ်းရောင်လမ်းမှ ကူးယူဖော်ပြပါသည်ဟု” ထည့်ပေးပါရန် မေတ္တာရပ်ခံအပ်ပါသည်။