Solar Dryer သည် နေရောင်ခြည်မှလာသော အလင်းရောင်နှင့် အပူစွမ်းအင်ကို ပိုလီကာဗွန်နိတ်အပြားကို ဖြတ်သန်းဝင်ရောက်စေပြီး အဆောက်အဦးအတွင်း အပူစွမ်းအင်ကို သိုလှောင်ကာ အပူချိန်ကို မြင့်တက်စေကာ ကုန်ပစ္စည်းကို အခြောက်ခံခြင်းဖြစ်သည်။ ပုံစံမှာ Green House Effects ကို အသုံးပြုထား ခြင်းဖြစ်သည်။ တစ်ခုထူးခြားသည်မှာ ပိုလီကာဗွန်နိတ်အပြားကို အမိုးပြားအနေဖြင့် အသုံးပြုထားခြင်းကြောင့် နေရောင်ခြည်မှလာသော ခရမ်းလွန်ရောင်ခြည်ကို ကာကွယ်ပေးထားခြင်းပင်ဖြစ်သည်။ ထိုသို့ ကာကွယ်ပေး ထားခြင်းကြောင့် သီးနှံနှင့် ကုန်ပစ္စည်းများ၏အရည်အသွေး ယုတ်လျော့ပျက်စီးဆုံးရှုံးမှု မရှိတော့ပေ။

   နေရာင်ခြည်စွမ်းအင်သုံး Solar Dryer သည် လယ်ယာထွက်ကုန်ပစ္စည်းများ၊ ဥယျာဉ်ထွက်ကုန်ပစ္စည်းများသာမက စားသောက်ကုန်ပစ္စည်းများ၊ တိုင်းရင်းဆေးဝါးထုတ်လုပ်သည့် လုပ်ငန်းများနှင့် ပုဇွန်ခြောက်၊ ငါးခြောက်၊ အသားခြောက်လုပ်ငန်းများတွင်လည်း အသုံးပြုနိုင်ပါသည်။ အသုံးပြုမည့် ကုန်ပစ္စည်းပေါ်မူတည်ပြီး ဉာဏ်ရှိသလိုအသုံးပြုနိုင်ပါသည်။

Solar Dryer ကိုအသုံးပြုပြီး အခြောက်ခံခြင်းဖြင့် ရရှိနိုင်မည့် အကျိုးကျေးဇူးများ

    1)  ထုတ်ကုန်တန်ဖိုး တိုးတက်လာနိုင်ခြင်း၊ ဝင်ငွေတိုးလာနိုင်ခြင်း။

    2) အခြောက်ခံထုတ်ကုန်အဖြစ် တစ်နှစ်ပတ်လုံး ရရှိနိုင်ခြင်း။

    3) အလျင်စလိုရောင်းချရန် မလိုခြင်းကြောင့် ဈေးနှုန်းထိန်းထားနိုင်ခြင်း။ တာရှည်အထားခံသဖြင့် ဈေးနှုန်းမြင့်သည့်အချိန်ထိ စောင့်နိုင်ခြင်း။

    4) သယ်ယူပို့ဆောင်စရိတ် လျော့ချနိုင်ခြင်း (၄ ပုံ ၁ ပုံသာ ကုန်ကျခြင်း)။

    5) သန့်ရှင်းစင်ကြယ်ပြီး ကျန်းမာရေးနှင့်ညီညွတ်သော စားသောက်ကုန်များ ထုတ်လုပ်နိုင်ခြင်း။  အလုပ်သမားခ လျော့ချနိုင်ခြင်း။

    6) အာဟာရဓာတ်ပါဝင်မှုမြင့်မားပြီး သန့်ရှင်းသောထုတ်ကုန်ရရှိခြင်း။

    7) တန်ဖိုးမြင့်ထုတ်ကုန် ထုတ်လုပ်နိုင်ခြင်း။

    8) အခြောက်ခံကာလ တစ်ဝက်လျော့ချနိုင်ခြင်း။

    9) အနာဂတ်အတွက် ကြိုတင်ရင်းနှီးမြုပ်နှံခြင်း။

    10) ခရမ်းလွန်ရောင်ခြည်ကို ကာကွယ်ထားခြင်းကြောင့် ထုတ်ကုန်၏ အရည်အသွေးနှင့် အရောင်ပြောင်းလဲ မှုမရှိခြင်း။

    11) ထုတ်ကုန်အရည်အသွေးမြင့်မားခြင်း။ (အရောင်၊ အနံ့၊ အရသာ ပိုမိုကောင်းမွန်ခြင်း)

    12) လုပ်သားခ၊ လျှပ်စစ်နှင့် အခြားစွမ်းအင်များအတွက် ကုန်ကျစရိတ်မရှိခြင်း။

    ထို့ကြောင့် Solar Dryer ကို မိမိတို့ရဲ့ ကုန်ပစ္စည်းများ အရည်အသွေးမြင့်မားရေးနှင့် စားသုံးသူ အများပြည်သူ ဘေးအန္တရာယ်ကင်းရှင်းရေးတွက် အသုံးပြုသင့်ပါသည်။ 

   ယခုအခါတွင် Solar Dryer ရုံပေါင်း ၆၀ ခန့် မြန်မာပြည်တွင်း ဆောက်လုပ်ပြီးစီးပြီဖြစ်ပါသည်။ ငရုတ်သီး အခြောက်ခံခြင်း၊ ဝဥ အခြောက်ခံခြင်း၊ စားသောက်ကုန် အခြောက်ခံခြင်း၊ အခြားလယ်ယာထွက်ကုန်များ အခြောက်ခံခြင်း၊ ရေလုပ်ငန်းတွင် ငါးအခြောက်ခံခြင်းနှင့် တိုင်းရင်းဆေးဝါးတို့တွင် အခြောက်ခံခြင်းစသော လုပ်ငန်းများတွင် Solar Dryer ကို အသုံးပြုလျက်ရှိပါသည်။ 

   Solar Dryer တွင် (၁) အသေးဆိုဒ်  (၂) အလတ်ဆိုဒ် (၃) အကြီးဆိုဒ်  (၄) Jampo ဆိုဒ် ဟူပြီး (၄) မျိုးရှိသည်။ ယခုအချိန်တွင် လုပ်ငန်းသုံး ဆိုဒ်အကြီးများသာမက အိမ်တွင်းသုံး ဝါသနာအရ အိမ်တွင် စားသောက်ကုန်များကို အခြောက်ခံပြီး စားလိုသူများ၊ အသေးစားအိမ်တွင်းမှုလုပ်ငန်းများအတွက် သင့်တော်သော Mini Solar Dryer လည်းရရှိနိုင်ပြီဖြစ်သည်။ 

   မြန်မာနိုင်ငံ၏ လယ်ယာထွက်ကုန်ပစ္စည်းများနှင့် စားသောက်ကုန်လုပ်ငန်းများ  တန်းဖိုးမြင့်မားရေးနှင့် အလေအလွင့်ဆုံးရှုံးမှုနည်းပါးရေး၊ တန်ဖိုးမြင့်ထုတ်ကုန် ထုတ်လုပ်နိုင်ရေးနှင့် ဘေးအန္တရာယ်ကင်းရှင်းသော စားသောက်ကုန်များ ထုတ်လုပ်နိုင်ရေးအတွက် အသုံးဝင်သော နေရောင်ခြည်စွမ်းအင်သုံး Solar Dryer အကြောင်းကို တောင်သူများအတွက် ဗဟုသုတရစေရန် ဖော်ပြပေးလိုက်ရပါတယ်။

Tin Htut Khaung (B.Agr.Sc)