ထောပတ်သီးဟာ အာဟာရပြည့် အရသာရှိတဲ့ အသီးတစ်မျိုးဖြစ်လို့ လူအတော်များများ နှစ်သက်စွာ စားသုံးကြ လေ့ရှိပါတယ်။ ဒါ့အပြင် လက်ရှိမှာတော့ ထောပတ်ဆီနဲ့ အလှကုန်ပစ္စည်းတွေဟာလည်း ဈေးကွက်မှာ အတော် လေး တွေ့လာရပြီး စီးပွားရေးအလားအလာအတော်ကောင်းတဲ့ အသီးတစ်မျိုး ဖြစ်နေပါပြီ။ 

ဒါကြောင့် ထောပတ်သီးပင်စိုက်ပျိုးလိုသူတွေအတွက် ထောပတ်သီးပင်စိုက်သင့်တဲ့ မြေအမျိုးအစားတွေ အကြောင်းနဲ့ ဘယ်နေရာတွေမှာ စိုက်လို့အဆင်ပြေနိုင်မလဲ ဆိုတာတွေကို ဖော်ပြပေးလိုက်ပါတယ်။

မြန်မာနိုင်ငံတွင် လက်ရှိထောပတ်သီးစိုက်ပျိုးနေသော ဒေသများမှာ ချင်းတောင်၊ ပြင်ဦးလွင်၊ ရှမ်းပြည်နယ်နှင့် ကချင်ပြည်နယ်တို့ ဖြစ်သည်။ ထောပတ်သီးပန်းပွင့်ခြင်းသည် နေ့တာအတိုအရှည်ထက် အအေးဓာတ်မှာ အဓိကဖြစ်သည်။ ပန်းဖူးများဖြစ်ပေါ်စေရန် (flower initiation) အအေးဓာတ်သည် အဓိကဖြစ်ပြီး နေ့တာအတိုအရှည်သည် ပန်းပွင့်စောခြင်း၊ နောက်ကျခြင်းတို့အပေါ်တွင်သာ အားပေးသည်။ 

ထောပတ်သီးကို မြန်မာနိုင်ငံတွင် စိုက်ပျိုးမည်ဆိုပါက...

• ပင်လယ်ရေမျက်နှာပြင်မှ အမြင့် ၁၀၀၀ မှ ၂၀၀၀ မီတာကျော်မြင့်သော တောင်ပေါ်ဒေသများဖြစ်သင့်သည်။ 
• ပျမ်းမျှအပူချိန်မှာ ၁၀'C နှင့် ၃၆'C တွင်ရှိပြီး တစ်နှစ်တာမိုးရွာသွန်းမှုမှာ မေလမှ စက်တာဘာလ (၅) လအတွင်း ပျမ်းမျှ ၁၂၀၀ မှ ၁၅၀၀ mm ရှိရပါသည်။ 
• လတ္တီကျု(ဒ်) ၂၀ 'N မှ ၂၄ 'N အတွင်းဖြစ်ပါသည်။ 
• ထောပတ်သီးပင်အတွက် အသင့်တော်ဆုံးမြေအမျိုးအစားမှာ ရွှံစေး ၃၀%၊ နုန်းမြေ ၃၀% နှင့် သဘာဝမြေဆွေးများစွာ ပါဝင်သောမြေမျိုး (Clay loam soil) ဖြစ်သည်။ 
• ထောပတ်သီးပင်အမြစ်များသည် အပေါ်ယံမြေသားထဲတွင်သာ ရှိတတ်ပြီး အပင်ရွက်အုပ်အထိခန့် ဘေးသို့ကြီးထွား တတ်သည်။ အထူးသဖြင့် ထောပတ်သီးစိုက်ပျိုးရန်မြေသည် တောင်ပေါ်ဒေသဖြစ်၍ ဆင်ခြေလျှောဖြစ်ပါက မြေတိုက်စားမှု သက်သာစေရန် ကွန်တိုအလိုက်စိုက်ပြီး သင့်တော်သော အကွာအဝေးတွင် ကန့်လန့်ဖြတ်ရေနုတ်မြောင်းများ ပြုလုပ်ထားပေးရပါမည်။ 
• အပူပိုင်းမိုးများသောဒေသများတွင် စိုက်ပျိုးမည်ဆိုပါက ရေတိုက်စားမှုနှင့် ခြောက်သွေ့သောကာလများတွင် အစိုဓာတ် ထိန်းသိမ်းနိုင်ရေးတို့ကို ဂရုစိုက်ရန်အရေးကြီးသည်။
• ထောပတ်သီးပင်များသည် မြေအချဉ်ဓာတ်များသောမြေများတွင် ကောင်းစွာပေါက်သည်။ သဘာဝတွင် pH ၃.၅ မှ ၅.၅ တွင် ပေါက်ရောက်သည်။ မြန်မာနိုင်ငံတွင်လည်း မိုးများသောဒေသဖြစ်သည့် ရှမ်းပြည်ကဲ့သို့သောဒေသတွင် pH ၅.၅ ခန့်သာ ရှိတတ်သည်။ 
• မိုးများသောဒေသတွင် အချဉ်ပေါက်ရခြင်းမှာ အဓိကအားဖြင့် Aluminum (Al) နှင့် Manganese (Mn) များကြောင့်ဖြစ်၍ ထုံးဖြင့် pH ကို ပြုပြင်ရန်ခက်ခဲသည်။ သဘာဝမြေဆွေးများစွာရရှိရန် ကြိုတင်ပြီး သစ်စိမ်းမြေဩဇာများကျွေးထားရန် လိုအပ် ပါသည်။ မြေသားအနက် ၃ ပေခန့်ရှိလျှင် အသင့်တော်ဆုံးဖြစ်သည်။ 
• ထောပတ်ပင်များ၏ အမြစ်သည် အပေါ်ယံမြေသားထဲတွင်သာရှိသဖြင့် လေပြင်းတိုက်ခတ်လျှင် မလဲစေရန် လေကာပင်များ ထားရှိခြင်းနှင့် လေကာပင်များ ကြိုတင်စိုက်ပျိုးထားရန် အရေးကြီးသည်။ 
• စိုက်ပျိုးမည့်မြေမှတဆင့် အမြစ်တွင်ကျရောက်သော ဖိုင်တော့သရာမှိုရောဂါကျရောက်မှုကို ကျော်လွှားနိုင်ရန်လည်း အရေးကြီးသည်။
• သီးပွင့်ချိန်စောသောဒေသများတွင် ဒီဇင်ဘာလ၌ ပန်းပွင့်ပြီး နောက်ကျမှ ပွင့်သောဒေသများ၌ မတ်လခန့်တွင် ပန်းပွင့်ပြီး အသီးများ သီးသည်။
• ထောပတ်သီးပန်းခိုင်များသည် အများအားဖြင့် ၂ လမှ ၃ လကြာအောင် ပန်းများပွင့်ပါသည်။ မျိုးပေါ်မူတည်ပြီး ပန်းပွင့်သော အချိန်မှစ၍ အများဆုံး ၆ လကျော်ကြာမှသာ အသီးများရင့်မှည့်သည်။ ရာသီဥတုအပူချိန်ပေါ်မူတည်ပြီး အသီးများမှာ ရင့်မှည့်ပြီး အပင်ပေါ်တွင် ၁၅ ရက်မှ ၂ လကျော်အထိ ရှိနေတတ်သည်။ 
• ဆွတ်ခူးပြီးနောက်တွင် ထောပတ်သီးများသည် အခန်းအပူချိန်၌ ၅ ရက်မှ ၁၅ ရက်ခန့်ကြာမှသာ မှည့်သည်။ ရင့်မှည့်ချိန်တွင် အချို့မျိုးမှာ အစိမ်းရောင်မှ နီညိုရောင်ပြောင်းသည်။ အချို့မျိုးများမှာ အခွံသည် အစိမ်းရောင်သာရှိပြီး မှည့်လာလျှင် ပြောင်လာပြီး အနည်းငယ်ပျော့သွားမည်ဖြစ်သည်။ အမှည့်လွန်သွားပါက အစေ့နှင့်ကပ်လျက်အသားသည် အညိုရောင် ပြောင်းလဲလာမည် ဖြစ်သည်။ 

(Myanseed Agri Business Consultancy မှ ထုတ်ဝေသည့် ‘ထောပတ်သီးပင်စိုက်ပျိုးခြင်းဆိုင်ရာ နည်းလမ်းကောင်းများ’ စာအုပ်မှ ကူးယူဖော်ပြခြင်းဖြစ်ပါသည်။)

ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ဟုထည့်ပေးပါရန် မေတ္တာရပ်ခံအပ်ပါသည်။