အသုပ်သုပ်လျှင် ကြက်သွန်နိုင်းချင်းနှင့် မစားချင်ပါနှင့်တော့..။ ကြက်သွန်ဈေးတွေက ရန်ကုန် ဘုရင့်နောင်ဈေးကွက်တွင် လက်ကားဈေးပင် ဒီနေ့ပေါက်ဈေး တစ်ပိဿာ ၂၃၅၀ ထိ ဖြစ်သွားပါပြီ။ ရပ်ကွက်ဈေးများတွင်တော့ ကျပ် ၃၀၀၀ ဝန်းကျင် ဖြစ်ကုန်ပြီဖြစ်သည်။

ပဲထမင်းဆီဆမ်းလေးကို ငါးရံ့ခြောက်ဆီဆိမ်လေးနှင့်စားချင်ပါသလား..။ အရင်လို မဟုတ်တော့ပါ။ ချွေချွေတာတာနှင့် ဘွာတေးလုပ်သင့်ပါသည်။ ပဲဆီဈေးက မန္တလေးဈေးကွက်မှာ လက်ကားဈေးတင် တစ်ပိဿာ ကျပ် ၁၄၀၀၀ ကနေ ၁၅၀၀၀ ထိ ဖြစ်သွားပါပြီ။ နှမ်းဆီဈေးကတော့ တစ်ပိဿာ ကျပ် ၁၀၀၀၀ ကနေ ကျပ် ၁၁၀၀၀ ပါတဲ့။ ဟိုကြော် ဒီကြော်အတွက် စားအုန်းဆီကတော့ ကုန်စည်ဒိုင်များတွင် ဈေးမဖွင့်ပါ။ ရပ်ကွက်တွေထဲတွင်တော့ တော်တော်မြင့်နေသည်ကို အိမ်ရှင်မများ သိကြပါလိမ့်မည်။

ဒီတော့ လိုလိုမယ်မယ် ထပ်ပြောထားပါရစေ။ လက်ဖက်သုပ်လေးကို ဆီရွှဲရွှဲလေးနှင့်လည်း သိပ် မမျှော်လင့်တော့စေချင်ပါ။ အရင်လို ကြက်သွန်ဖြူလေးကိုက်ပြီးကော တွဲစားမလား။ စားနိုင်ရင် တော့ စားပေါ့။ သူလည်း ဈေးတက်သည်။

ထမင်းလေးမြိန်အောင် အစပ်ကလေးတွေပါဦးမှဆိုပြီးတော့လည်း အရမ်းကြီး သွားမတောင်းဆို စေချင်။ အိမ်ရှင်မများ စိတ်ငြိုငြင်မှုကို သင်ခံရနိုင်သည်။ ငရုတ်သီးသည် ဈေးထဲတွင် အရင်လို ၁၀၀ ဖိုး၊ ၂၀၀ ဖိုး ဝယ်ရန် ခက်သွားပါပြီ။ အောက်ကဈေးနှုန်းများကို ကြည့်ပါ။ ဈေးသည်တွေလည်း ဘယ်ရောင်းနိုင်ပါတော့မတုန်း။

မော်လမြိုင်ဈေးကွက်တွင် ငရုတ်ရှည်(ကျွန်း) တစ်ပိဿာ ၁၆၅၀၀ ကျပ်ဖြစ်ပြီ။ ငရုတ်ရှည်(မိုးထောင်) နဲ့ ငရုတ်ပွကတော့ တစ်ပိဿာကို ၁၇၅၀၀ ကျပ်နှင့် ၁၈၀၀၀ ကျပ် အသီးသီးပါ။ ပြီးခဲ့သည့်အပတ်နှင့်ယှဉ်လျှင် တစ်ပိဿာ ကျပ် ၆၀၀၀၊ ၇၀၀၀၊ ၈၀၀၀ ခန့် စီ ရုတ်တရက် မပြောမဆို တက်ကုန်ခြင်းဖြစ်သည်။

ဆိုတော့ အားရှိစေမည့် ကုလားပဲလေးပဲ ပြုတ်စား၊ ချက်စား လုပ်တော့မည်ဟု စဉ်းစားပါသလား။ နည်းနည်းတော့ ထပ်ပြီး စဉ်းစားလိုက်ပါဦး။ သူလည်း ငြိမ်မနေပါ။ အခြားတပါးတွေကို အားကျစိတ်ဖြင့် လိုက်တက်ပါသည်။ ရန်ကုန်၊ မန္တလေး၊ ပဲခူး၊ ပြည် ဈေးကွက်များ။ ဘယ်ဈေးကွက်တွင်မဆို တက်သွားပါသည်။

ဘာတွေဘယ်လို ဘယ်လောက်ထိ ဈေးတက်သွားလဲသိလိုပါက Green Way app ရှိ နေ့စဉ်ဈေးနှုန်းများကဏ္ဍအောက်တွင် ဝင်ကြည့်စေချင်သည်။ ပြီးခဲ့သည့်အပတ်နှင့် ယနေ့မတူပါ။ မနေ့ကနှင့် ယနေ့လည်း မတူပါ။ အမြဲတမ်း အပြောင်းအလဲများ ရှိနိုင်ပါသည်။ 

(စိုက်ပျိုးရေးဈေးကွက်သတင်းအေဂျင်စီ (AMIA) က ပေးပို့လာသည့် ကုန်စည်ဒိုင်အသီးသီးမှ ဈေးကွက်ဈေးနှုန်းများကို ကိုးကားဖော်ပြခြင်းဖြစ်ပါသည်။)

ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ဟုထည့်ပေးပါရန် မေတ္တာရပ်ခံအပ်ပါသည်။