ဥရောပနိုင်ငံများသို့ ပေါင်းဆန်နှင့် ဆန်ဖြူ၅% (၅မှတ်ဆန်)ကို တင်ပို့ရန် စာချုပ်များ ချုပ်ဆိုထားကြောင်း မြန်မာနိုင်ငံ ဆန်စပါး စိုက်ပျိုးထုတ်လုပ်သူများအသင်းမှ အသိပေးထားသည်။

မြန်မာနိုင်ငံမှ ဥရောပနိုင်ငံများသို့ ၆.၂mm အသွယ်ပေါင်းဆန်နှင့် ဆန်ဖြူ ၅ မှတ်ဆန်ကို ဇန်နဝါရီလတွင် တင်ပို့ရန် စာချုပ်ထားသည်ဟု ဆိုထားသည်။

"ဒါကသတင်းကောင်းပါ။ တရုတ်အ၀ယ် ခဏရပ်ချိန်မှာ ဈေးကွက်အထိန်းဖြစ်နိုင်တာပေါ့"ဟု ဆန်ကုန်သည်တစ်ဦးကပြောသည်။

ဥရောပဈေးကွက်သို့ ဆန်တင်ပို့ရာတွင် စပိန်နိုင်ငံက မြန်မာ့ဆန်ကို အများဆုံး၀ယ်ယူသည်နိုင်ငံဖြစ်ပြီး ပိုလန်နိုင်ငံက ဒုတိယအများဆုံး၀ယ်ယူသည့်နိုင်ငံဖြစ်သည်။

ယခုဘဏ္ဍာနှစ် (၂၀၂၆ ဧပြီမှ နို၀င်ဘာအထိ) ၈ လတွင်း ဥရောပနိုင်ငံများသို့ ဆန်တန်ချိန် ၁၅၇,၀၀၀ ကျော်တင်ပို့ထားပြီး ပြည်ဆန်တင်ပို့မှုစုစု‌ပေါင်း၏ ၁၇ ရာခိုင်နှုန်းရှိနေသည်။

ယခုဘဏ္ဍာနှစ် ၈ လအတွင်း မြန်မာနိုင်ငံမှ ပြည်ပသို့ ဆန်တန်ချိန် ၉သိန်းကျော် တင်ပို့ထားသည်။ ပြည်ပဆန်တင်ပို့မှု စုစုပေါင်းတွင် တရုတ်နိုင်ငံက ၄၀ရာခိုင်နှုန်းကျော်ပါ၀င်ပြီး ဘဏ္ဍာနှစ် ၈ လအတွင်း ဆန်တန်ချိန် ၄၇၀,၀၀၀ ကျော်တင်ပို့နိုင်ခဲ့သည်။

ထို့ကြောင့် တရုတ်နိုင်ငံမှ ဆန်လိုင်စင်အသစ် မရှိ‌သေးဘူးဆိုသည့် သတင်းများ ပေါ်ထွက်လာချိန် ပြည်တွင်း ဈေးကွက်တွင် export ဆန်ဈေးများ အနည်း ငယ် အားနည်းလာသည်။

တရုတ်နိုင်ငံသည် နှစ်စဉ် မြန်မာနိုင်ငံမှ ဆန်တင်သွင်းရန် လိုင်စင်အသစ်များကို နှစ်သစ်ကူးပွဲတော်အပြီးမှသာ ချထားပေးလေ့ရှိသည်။

AMIA (ဈေးကွက်နှင့် သတင်းအေဂျင်စီ)မှ အစိမ်းရောင်လမ်းဆော့ဝဲသို့ ပေးပို့ထားသော အစိမ်းရောင်လမ်း၏ မူပိုင်ဆောင်းပါးဖြစ်သဖြင့် ဆောင်းပါးများ၊ သတင်းများ ကူးယူဖော်ပြလိုပါက “အစိမ်းရောင်လမ်းမှ ကူးယူဖော်ပြပါသည်ဟု” ထည့်ပေးပါရန် မေတ္တာရပ်ခံအပ်ပါသည်။