အောက်တိုဘာလ၏ နောက်ဆုံးပတ်တွင် ပဲမျိုးစုံဈေးကွက်၌ မတ်ပဲဈေးနှုန်းများ ဆက်တိုက်ကျဆင်းလာခဲ့ပြီး ပဲစင်းငုံ၏ ပြည်တွင်းဈေးနှုန်းလည်း လိုက်ပါကျဆင်းခဲ့သည်။ တစ်ချိန်တည်းမှာပင် မိုးစပါးဈေးကွက်သည်လည်း အေးစက်နေဆဲဖြစ်သော်လည်း အာလူးဈေးနှုန်းများ သိသိသာသာ မြင့်တက်လာခဲ့ကြောင်းနှင့် သကြားဈေးနှုန်းများ ထပ်မံကျဆင်း ခဲ့ကြောင်း ကုန်စည်ဒိုင်များမှ သိရသည်။

မတ်ပဲ 

မတ်ပဲဈေးနှုန်းသည် အောက်တိုဘာလ နောက်ဆုံးပတ်အထိ ဆက်တိုက် ကျဆင်းလာခဲ့ပြီး ယခုတစ်ပတ်အတွင်း တစ်တန်လျှင် ကျပ် ၇၀,၀၀၀ ကျော် ထပ်မံဈေးကျခဲ့သည်။

FOB ဈေးနှုန်း: မတ်ပဲ (FAQ) ၏ FOB ဈေးနှုန်းမှာလည်း ယခုတစ်ပတ်တွင် အမေရိကန်ဒေါ်လာ ၁၀ ပြန်ကျသွားပြီး တစ်တန်လျှင် ဒေါ်လာ ၇၀၀ မှ ၇၁၀ သာရှိတော့သည်။

လက်ရှိတွင် ဆောင်းမတ်ပဲများ စိုက်ပျိုးရန်အတွက် မျိုးပဲဝယ်ယူမှုရှိသော်လည်း ယခင်သိုလှောင်ထားသော မတ်ပဲများကို ထုတ်ရောင်းချမှုများနေခြင်း နှင့် ပြည်ပဝယ်လိုအား နည်းနေခြင်းကြောင့် ဈေးကွက်ဆက်လက်ကျဆင်းလာခြင်း ဖြစ်သည်။

ရန်ကုန်ဈေးကွက် တွင် FAQ က ပြီးခဲ့သည့် ရက်သတ္တပတ်တွင် ကျပ် ၂,၆၉၅,၀၀၀ မှ ၂,၇၁၀,၀၀၀ ရှိခဲ့သော်လည်း ယခုတစ်ပတ်တွင် ကျပ် ၂,၆၅၇,၀၀၀ (တနင်္လာ) မှ ၂,၆၃၀,၀၀၀ (သောကြာ) အထိ ဆက်တိုက်ကျဆင်းခဲ့သည်။

ပဲစင်းငုံ 

ပဲစင်းငုံသည် ပြည်ပရောင်းဈေး (FOB) တက်လာသော်လည်း ပြည်တွင်းဈေးကွက်၌ ပြန်လည်ကျဆင်းခဲ့သည်။

FOB ဈေးနှုန်းသည် အရင်တစ်ပတ်တွင် တစ်တန်လျှင် ဒေါ်လာ ၆၅၀ မှ ၆၆၀ ရှိခဲ့ရာမှ ယခုတစ်ပတ်တွင် ဒေါ်လာ ၆၇၀ မှ ၆၈၀ အထိ မြင့်တက် လာခဲ့သည်။ပြည်တွင်းဈေးနှုန်း: FOB ဈေးတက်သော်လည်း ပြည်တွင်းဈေးကွက်တွင်မူ တစ်တန်လျှင် ကျပ် ၅၀,၀၀၀ မှ ၁၀၀,၀၀၀ ကျော်အထိ ဈေးကျသွားသည်။

လက်ရှိတွင် ပြည်တွင်း၌ လက်ကျန်နည်းနေပြီး ပြည်ပအဝယ်နှင့် ပဲခွဲစက်များလည်း အဝယ်ရှိနေသည်။

ရန်ကုန်ဈေးကွက် တွင် ပြီးခဲ့သည့်ရက်သတ္တပတ်တွင် ကျပ် ၂,၆၄၀,၀၀၀ မှ ၂,၆၉၀,၀၀၀ ရှိခဲ့သော်လည်း ယခုတစ်ပတ်တွင် ကျပ် ၂,၅၇၇,၀၀၀ (တနင်္လာ) မှ ၂,၆၄၀,၀၀၀ (သောကြာ) သို့ ပြန်လည်တက်လာသော်လည်း ယခင်အပတ်ထက် နိမ့်ကျနေဆဲဖြစ်သည်။

စပါးဈေးကွက် 

မိုးစပါးအသစ်ဈေးကွက်သည် ဒေသအလိုက် ဈေးနှုန်းကွာဟမှုများရှိနေပြီး ဈေးကွက် အေးစက်နေဆဲဖြစ်သည်။

စပါးတင်း ၁၀၀ ကို အမြင့် ဆုံး ကျပ် ၁၁ သိန်းသာ ရရှိနေပြီး အချို့နေရာများတွင် ကျပ် ၁၀ သိန်း ၅၀,၀၀၀ သာ ရရှိနေသည်။ ကောက်ညှင်း၊ ဧရာပဒေသာ၊ ဧရာမင်း၊ ပေါ်ဆန်း အုပ်စုဝင် စပါးများကသာ ကျပ်သိန်း ၂၀ အထက် ဈေးပေါက်နေသည်။

စပါးအရည်အသွေးညံ့ပြီး အစိမ်းစေ့ပါဝင်သော စပါးများ မှာ ဈေးနှိမ်ခံရခြင်း နှင့် ဝယ်ယူသူ မရှိသလောက်ရှားပါးခြင်းတို့နှင့် ရင်ဆိုင်နေရသည်။

တောင်သူအများစုသည် ယခုနှစ်မိုးစပါးအသစ်များကို အခြောက်လှန်း သိုလှောင်ခြင်း မပြုတော့ဘဲ စပါးအစိုကိုသာ ရောင်းချမှုများပြား နေကြောင်း သိရသည်။

အာလူး

အာလူးသည် အောက်တိုဘာလထဲတွင် ဝယ်လိုအားရှိနေခြင်းကြောင့် ဈေးကွက်ကောင်းလာခဲ့သည်။ သို့သော် ကုန်သည်များက နိုဝင်ဘာလတွင် ဈေးကွက်ပြန်အေးသွားနိုင်သည်ဟု သုံးသပ်ထားကြသည်။

စက်တင်ဘာလကုန်နှင့် နှိုင်းယှဉ်ပါက မားကစ် S2 / S3 နှင့် မျက်နီ S2 / S1 တို့မှာ တစ်ပိဿာလျှင် ကျပ် ၁,၀၀၀ ကျော်ခန့် ဈေးတက်လာခဲ့သည်။ အောင်ပန်းကုန်စိမ်းဈေးနှုန်ကတော့ (အောက်တိုဘာ ၃၁) မှာ မားကစ် S2 / S3 က ကျပ် ၇,၅၀၀ မှ ၇,၈၀၀ ၊ မျက်နီ S2 / S1 က ကျပ် ၇,၃၀၀၊ ဂေါ်လီဆိုဒ်ကကျပ် ၂,၅၀၀ ပေါက်ဈေးရှိနေသည်။

သကြား 

သကြားဈေးနှုန်းသည် ယခု အောက်တိုဘာလတွင် ထပ်မံကျဆင်းသွားသည်။ ယခုလတွင် သကြားတစ်ပိဿာကို ကျပ် ၃,၇၅၀ မှ ၄,၂၀၀ သာရှိပြီး၊ အရင်လက ကျပ် ၄,၂၀၀ မှ ၄,၆၅၀ ရှိခဲ့ရာမှ တစ်ပိဿာလျှင် ကျပ် ၄၅၀ ဈေးကျဆင်းသွားခြင်းဖြစ်သည်။

ကမ္ဘာ့သကြားဈေးကွက်မကောင်းသောကြောင့် ပြည်ပတင်ပို့မှု လျော့ကျ ပြီး ပြည်တွင်း၌ လက်ကျန်ပမာဏများနေခြင်း ကြောင့် ဈေးကျဆင်းလာခြင်းဖြစ်သည်ဟု သိရသည်။

AMIA (ဈေးကွက်နှင့် သတင်းအေဂျင်စီ)မှ အစိမ်းရောင်လမ်းဆော့ဝဲသို့ ပေးပို့ထားသော အစိမ်းရောင်လမ်း၏ မူပိုင်ဆောင်းပါးဖြစ်သဖြင့် ဆောင်းပါးများ၊ သတင်းများ ကူးယူဖော်ပြလိုပါက “အစိမ်းရောင်လမ်းမှ ကူးယူဖော်ပြပါသည်ဟု” ထည့်ပေးပါရန် မေတ္တာရပ်ခံအပ်ပါသည်။