ရှမ်းပြည်နယ်တောင်ပိုင်း ကုန်စိမ်းဈေးကွက်တွင် ဂျင်းအခက် ဈေးနှုန်းက အတက်ဘက်၌သာ ဆက်လက်ရှိနေသော်လည်း ဂျင်းဥမ ဈေးကွက်ကမူ အကျဘက်သို့ ရောက်ရှိလာနေကြောင်း အောင်ပန်းကုန်စိမ်းဈေးကွက်အရ သိရသည်။

ရှမ်းပြည်နယ်တွင် ဂျင်းဥမ တူးဖော်ချိန်ဖြစ်သောကြောင့် အောင်ပန်းကုန်စည်ဈေးကွက်အတွင်း ဂျင်းဥမ ကုန်ချိန်အဝင်များသဖြင့် ဈေးနှုန်းကျဆင်းလာခြင်း ဖြစ်သည်ဟု သိရသည်။

ဂျင်းအခက်ကမူ တူးဖော်သည့် ရာသီချိန် ကုန်ဆုံးသလောက် ရှိသွားပြီဖြစ်သောကြောင့် ကုန်စိမ်းဈေးကွက်အတွင်းသို့ ဂျင်းအခက် ဝင်ရောက်မှုနည်းပါးလာသဖြင့် ဈေးနှုန်းက အတက်ဘက်၌သာ ရှိနေခြင်းဖြစ်ကြောင်း သိရသည်။

"အခုက ပွဲရုံတွေကို ဂျင်းဥမတွေ အဝင်များနေတယ်။ အဖွင့်ဈေးက ကောင်းပေမဲ့လည်း အဝင်များတော့ ဈေးပြန်ကျသွားတဲ့ သဘောရှိတယ်။ ဂျင်းအခက်ကျတော့ ပစ္စည်းသိပ်မရှိတော့ ကုန်အဝင်လည်းနည်းပြီး ဈေးက အတက်မှာ ရှိနေတာပါ။ မိုးတွင်းက ဒီလိုပဲ ဖြစ်နေကျ" ဟု အောင်ပန်းပွဲရုံပိုင်ရှင်တစ်ဦးက ပြောသည်။

လက်ရှိ အောင်ပန်းကုန်စည်ဈေးကွက်တွင် ဂျင်းဥမ တစ်ပိဿာလျှင် ကျပ် ၁,၄၀၀ မှ ကျပ် ၁,၅၀၀ အတွင်းသာရှိပြီး ဂျင်းအခက်က တစ်ပိဿာလျှင် ကျပ် ၄,၀၀၀ မှ ကျပ် ကျပ် ၄,၅၀၀ အတွင်း ဈေးတန်းရှိနေကြောင်း သိရသည်။

အောင်ပန်းကုန်စည်ဈေးကွက်ထဲသို့ ယခု ဇွန်လ ၁၅ ရက်  စတင်၍ ဂျင်းဥမများ ဝင်ရောက်လာခြင်းဖြစ်ပြီး ဈေးကွက်ထဲ စတင်ချိန်က ဂျင်းဥမ တစ်ပိဿာလျှင် ကျပ် ၂,၁၀၀ အထိ ဈေးရှိခဲ့သည်ဟု သိရသည်။

ဂျင်းအခက်ကမူ ရှမ်းပြည်နယ် ကုန်စိမ်းဈေးကွက်တွင် ဧပြီလမှ မေလလယ်လောက်အထိ တစ်ပိဿာလျှင် ကျပ် ၃,၀၀၀ ဈေးနှုန်းရှိခဲ့ပြီး မေ ၁၈ ရက်တွင် ကျပ် ၄,၀၀၀ အထိ တက်လာကာ ထိုနောက်ပိုင်းတွင် ကျပ် ၄,၅၀၀ သို့ ထပ်မံမြင့်တက်လာခဲ့ခြင်း ဖြစ်သည်။

"ဂျင်းအခက်ဈေးက အခုက အတက်ဈေးမှာ ငြိမ်နေတာ။ ဂျင်းဥမကတော့ ဈေးကျတာပေါ့။ ဂျင်းဥမက အဝင်များပြီး ပြန်ရောင်းရတာ နည်းတော့ ဈေးကျတယ်။ ဂျင်းအခက်ကျတော့လည်း ပစ္စည်းအဝင်နည်းပေမဲ့ ပြန်ရောင်းအားကလည်း သိပ်မကောင်းတော့ ဈေးထပ်မတက်ဘဲ ငြိမ်နေတာ" ဟု ရှမ်းတောင်ကုန်သည်တစ်ဦးက ပြောသည်။

လက်ရှိတွင် ဂျင်းတက်က ပြည်ပသို့ တင်ပို့မှုမရှိဘဲ ပြည်တွင်းစားသုံးမှု ပမာဏသာရှိသောကြောင့် ပြည်တွင်းထွက် ဂျင်းများသည် တစ်နှစ်နှင့်တစ်နှစ် ဂျင်းလက်ကျန်များ ရှိနေကြောင်း ကုန်သည်များ၏ ပြောပြချက်အရ သိရသည်။

ယခင်က  ပြည်တွင်းမှ ထွက်ရှိသည့် ဂျင်းတက်ကို ရခိုင်ပြည်နယ်မှတစ်ဆင့် ဘင်္ဂလားဒေ့ရှ်နိုင်ငံသို့ အဓိကတင်ပို့ခဲ့ခြင်းဖြစ်ပြီး လက်ရှိတွင်မူ ရခိုင်ပြည်နယ်သို့ လမ်းပန်းဆက်သွယ်ရေး သွားလာရန် မပြေလည်သည့် အခြေအနေများကြောင့် ပြည်ပသို့ ဂျင်းတင်ပို့မှု ရပ်ဆိုင်းနေသည်ဟု သိရသည်။

မြန်မာနိုင်ငံတွင် ဂျင်းစိုက်ပျိုးမှုအနေဖြင့် စိုက်ခင်းဧကပေါင်း ၁၅,၀၀၀ ဧကအထက် ရှိပြီးအများဆုံး စိုက်ပျိုးမှုရှိသည်မှာ ရှမ်းပြည်နယ်ဖြစ်ကာ ဒုတိယ ဂျင်းစိုက်ပျိုးမှု အများဆုံးမှာ ချင်းပြည်နယ်ဖြစ်ကြောင်း သိရသည်။

AMIA (ဈေးကွက်နှင့် သတင်းအေဂျင်စီ)မှ အစိမ်းရောင်လမ်းဆော့ဝဲသို့ ပေးပို့ထားသော အစိမ်းရောင်လမ်း၏ မူပိုင်ဆောင်းပါးဖြစ်သဖြင့် ဆောင်းပါးများ၊ သတင်းများ ကူးယူဖော်ပြလိုပါက “အစိမ်းရောင်လမ်းမှ ကူးယူဖော်ပြပါသည်ဟု” ထည့်ပေးပါရန် မေတ္တာရပ်ခံအပ်ပါသည်။