ယခုနှစ် ဆောင်းရာသီစိုက်ပျိုးသည့် ပဲတီစိမ်းအထွက်နှုန်းလျော့ပြီး ဈေးကောင်းနိုင်သည်ဟု တောင်သူကြီးအချို့က ခန့်မှန်းနေကြပါသည်။

ဆောင်းရာသီ အစပိုင်းတွင် မိုးရွာသွန်းမှုများရှိနေခြင်းကြောင့် စိုက်ပျိုးချိန်နှောင့်နှေးမှုများရှိသဖြင့် အထွက်နှုန်းထိခိုက်နိုင်သည်ဟု ၎င်းတို့ကခန့်မှန်းနေခြင်း ဖြစ်သည်။

"အထွက်နှုန်းမကောင်းကြဘူး၊ ပဲရှားနိုင်တယ်"ဟု ရန်ကုန် တောင်ပိုင်းမြို့နယ်မှ ပဲတီစိမ်းစိုက်ပျိုးသည့်တောင်သူလယ်သမားကြီးတစ်ဦးကဆိုသည်။ ပြည်တွင်း၀ယ်လိုအားနှင့် အထွက်နှုန်းလျော့လျှင် ယခုနှစ်မတ်လအတွင်း ပဲတီစိမ်းဈေးမာလာမည်ဟုလည်း ၎င်းကရှင်းပြသည်။

လက်ရှိ အသစ်စပေါ်လာသည် ပဲတီစိမ်းက‌တောင်သူ‌ဈေးကွက်တွင် ပဲတစ်တင်းကို ကျပ် ၁၀၅,၀၀၀ ၀န်းကျင်အရောင်းအ၀ယ်ရှိနေကြောင်း သိရသည်။

ပြည်တွင်းဈေးကွက်တွင် တောင်သူလယ်သမားများ အဓိကထားစိုက်ပျိုးသည့် မတ်ပဲ၊ ပဲစင်းငုံက ဈေးဆက်တိုက်မြင့်တက်နေပြီး အိန္ဒိယနိုင်ငံ ၏ ပြည်တွင်းလိုအပ်ချက်ကြောင့် မတ်ပဲနှင့် ပဲစင်းငုံဈေးမာ‌လာခြင်းဖြစ်သည်ဟု ကုန်သည်အချို့ကဆိုသည်။

သို့သော် တရုတ်ဈေးကွက်ကို အဓိကထားတင်ပို့နေသည့် ပဲတီစိမ်းက ပြည်တွင်းဈေးကွက်တွင် ဈေးအနည်းငယ် ထပ်မံကျဆင်းလာသည်။

ရန်ကုန်ဈေးကွက်တွင် ပဲတီစိမ်းဈေးက ပဲတီစိမ်း(အ ညာ)တစ်ပိဿာကျပ် ၅၆၆၅ - ၅၆၈၅မှ ၅၂၅၀ - ၅၂၇၀၊ ပဲတီစိမ်း(ခရမ်းနှင့်ပဲခူး)ရွှေဝါက တစ်ပိဿာ ကျပ် ၆၅၇၀မှ ၅၈၃၀သို့ ဈေးပြောင်းသွားသည်။

ပဲတီစိမ်းက တရုတ်နိုင်ငံသာမက ဥရောပ၊ အာရှနိုင်ငံအချို့ကိုလည်း တင်ပို့မှုများရှိနေသဖြင့် ဈေးကွက်ကျယ်ပြန့်သည့် လယ်ယာပို့ကုန်အမျိုးအစားဖြစ်သည်။ မြန်မာနိုင်ငံတွင် ပဲတီစိမ်းစိုက်ဧက ၂ ဒသမ ၈သန်း ကျော်ရှိပြီး စိုက်ပျိုးမှု စုစုပေါင်း၏ ၆၅ ရာခိုင်နှုန်းမှာ ဆောင်းသီးနှံဖြစ်သည်။ တစ်နှစ်ပဲတီစိမ်းတန်ချိန် ၁ ဒသမ၄ သန်းကျော် စိုက်ပျိုးထုတ်လုပ်ပြီး ပြည်ပဈေးကွက်ကို အဓိကထား တင်ပို့ရောင်းချသည်။

ဆောင်းပါးရှင်ဆရာမှ အစိမ်းရောင်လမ်းဆော့ဝဲသို့ ပေးပို့ထားသော အစိမ်းရောင်လမ်း၏ မူပိုင်ဆောင်းပါးဖြစ်သဖြင့် ဆောင်းပါးများ၊ သတင်းများ ကူးယူဖော်ပြလိုပါက “အစိမ်းရောင်လမ်းမှ ကူးယူဖော်ပြပါသည်ဟု” ထည့်ပေးပါရန် မေတ္တာရပ်ခံအပ်ပါသည်။