ဒီနေ့ ဒီဇင်ဘာ ၈ ရက် မနက် ၃ နာရီခန့်ကစလို့ ဘင်္ဂလားပင်လယ်အော်အနောက်တောင်ပိုင်းမှာ ဆိုင်ကလုန်း မုန်တိုင်း(Cyclonic Storm) “မန်းဒပ်(စ်)(MANDOUS)” ဖြစ်ပေါ်ခဲ့ပြီဖြစ်ပေမဲ့ မြန်မာနိုင်ငံနဲ့တော့ ပိုဝေးသွားပြီ ဖြစ်လို့ သက်ရောက်မှုကတော့ မရှိသလောက်ဖြစ်သွားပြီလို့ နိုင်ငံတကာ မိုးလေဝသထုတ်ပြန်ချက်တွေကို ကိုးကားပြီး မိုးလေဝသခန့်မှန်းသူ ဦးဝင်းနိုင်က ပြောပါတယ်။

“ ဆိုင်ကလုန်းမုန်တိုင်း MANDOUS က အိန္ဒိယ ကမ်းခြေကို ဖြတ်ကျော်ဝင်ရောက်ပြီးတဲ့နောက် အာရေဗျ ပင်လယ်ထဲ ပြန်ဆင်းပြီး မုန်တိုင်း ပြန်ဖြစ်လာဦးမယ် မြန်မာပြည်နဲ့ ဝေးသထက် ဝေးသွားလို့ သူ့ သက်ရောက် မှုတော့ ကျနော်တို့ဘက်ကို မရှိတော့သလောက်ဖြစ်သွားပါပြီ” လို့ ဦးဝင်းနိုင်က Green Way ကို ပြောပါတယ်။

အခု မုန်တိုင်းဖြစ်နေပေမဲ့ နောက်လာမဲ့ ၇၂ နာရီ (၃ ရက်အတွင်း) မိုးလေဝသအခြေအနေတွေအရ မုန်တိုင်းအရှိန် သက်ရောက်မှုမရှိသလောက်ဖြစ်ပြီး ယခင်ခန့်မှန်းချက်တွေအတိုင်း တနင်္သာတိုင်းတောင်ပိုင်းအစွန်းတွေမှာသာ မိုးရွာနိုင်တယ်လို့ ဦးဝင်းနိုင်က ခန့်မှန်းပါတယ်။

" အိန္ဒိယမိုးလေဝသဌာနရဲ့ ထုတ်ပြန်ချက်အသစ်မှာလည်း ဒီဇင်ဘာလ ၈ ရက်နေ့မှ ဒီဇင်ဘာ ၁၂ ရက်အထိ ဆိုင်ကလုန်းမုန်တိုင်း MANDOUS ရဲ့သက်ရောက်မှုကြောင့် ပင်လယ်ပြင်သတိပေးချက်တွေမှာ မြန်မာနိုင်ငံဘက်ကို လုံးဝမပါတော့ဘူး" လို့လည်း ဦးဝင်းနိုင်က ပြောပါတယ်။

မုန်တိုင်းမဖြစ်ခင် လေဖိအားနည်းရပ်ဝန်းအဆင့်မှာတော့ မြန်မာနိုင်ငံ အချို့ဒေသတွေမှာ သက်ရောက်မှုရှိခဲ့ပြီး ဒေသအချို့မှာ မိုးရွာသွန်းမှုတွေ ရှိခဲ့ပါတယ်။

ဒီနေ့မနက် ၉ နာရီခွဲအချိန် တိုင်းထွာချက်အရ “ လွန်ခဲ့သော(၂၄)နာရီအတွင်းက ရန်ကုန်တိုင်းဒေသကြီးနှင့် ဧရာဝတီတိုင်းဒေသကြီးတို့တွင်နေရာကျဲကျဲနှင့် ပဲခူးတိုင်းဒေသကြီး၊ တနင်္သာရီတိုင်းဒေသကြီးနှင့် ကရင်ပြည်နယ်တို့တွင် နေရာကွက်ကျား မိုးထစ်ချုန်း ရွာခဲ့ပါသည်” လို့ မိုးလေဝသနှင့် ဇလဗေဒညွှန်ကြားမှု ဦးစီးဌာနကလည်း သတင်းထုတ်ပြန်ခဲ့ပါတယ်။

#(ဆရာဦးဝင်းနိုင်အနေဖြင့် Windy App ရှိ ကမ္ဘာလုံးဆိုင်ရာမိုးလေဝသ Model များဖြစ်သည့် ECMWF Model နှင့် GFS Model ခန့်မှန်းချက်များကို အသုံးပြု၍ ကြိုတင်ခန့်မှန်းခြင်း ဖြစ်ပါသည်)

Photos Crd_ U Win Naing

#(မိမိဒေသ မြို့နယ်တစ်ခုချင်းအလိုက် အသေးစိတ်မိုးလေဝသအခြေအနေများကို သိလိုပါက Green Way app ရှိ ‘ မေးကြ၊ ဖြေကြ ဒေသအလိုက် မိုးလေဝသ’ အဖွဲ့တွင် အခမဲ့အဖွဲ့ဝင်ပြီး ဆရာနှင့် တိုက်ရိုက်မေးမြန်းနိုင်ပါသည်)

ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ဟုထည့်ပေးပါရန် မေတ္တာရပ်ခံအပ်ပါသည်။