မတ်လကနေ မေလအထိ အစွန်းရောက်ရာသီဥတုတွေဖြစ်တဲ့ အယ်နီညိုနဲ့ လာနီညာတို့ဖြစ်နိုင်ချေမရှိဘဲ ကြားအခြေအနေ Neutral မျိုးသာဖြစ်နိုင်ချေ ၈၂ ရာခိုင်နှုန်းထိ ရှိနေလို့ မိုးဦးကျ စောတာ နောက်ကျတာမျိုး ဖြစ်နိုင်ချေနည်းပြီး ပုံမှန်အတိုင်း မေလကုန် ဇွန်လဆန်းမှာပဲ မုတ်သုံစဝင်နိုင်တယ်လို့ နိုင်ငံတကာ မိုးလေဝသ ထုတ်ပြန်ချက်တွေကို ကိုးကားပြီး မိုးလေဝသခန့်မှန်းသူ ဦးဝင်းနိုင်က ခန့်မှန်းပါတယ်။

“ ခန့်မှန်းကတော့ မေ၊ ဇွန် ဝန်းကျင်လောက်မှာ မုတ်သုံဝင်နိုင်တယ်။ အဲ့ဒီအချိန်တွေမှာက Neutral အားအကောင်းဆုံးအချိန်လည်း ဖြစ်နေတယ်။ ဆိုတော့ ပုံမှန်မိုးဦးကျမဲ့အချိန်မျိုးမှာပဲ မုတ်သုံဝင်နိုင်တယ်” 

ယခု ဇန်နဝါရီလ ၂၅ ရက်မှ ၃၁ ရက်အတွင်း တောင်တရုတ်ပင်လယ်မှာ လေဖိအားနည်း ရပ်ဝန်း/ မုန်တိုင်း ဖြစ်ပေါ်နိုင်ခြေ ၂၀% ခန့်လောက်တော့ ရှိနေပြီး အဲ့ဒါဖြစ်ခဲ့ရင်တော့ အဲ့ဒီအရှိန်ကြောင့် မြန်မာနိုင်ငံ တောင်ပိုင်း၊ တနင်္သာရီတိုင်းတောင်ပိုင်းတွေမှာ မိုးရွာနိုင်မဲ့ အလားအလာရှိတယ်လို့လည်း ဦးဝင်းနိုင်က ပြောပါတယ်။

“ဖြစ်ခဲ့ရင်တောင် မြန်မာနိုင်ငံတောင်ပိုင်းပေါ့။ မြိတ်ရဲ့တောင်ဘက် ကော့သောင်ပေါ်လောက်မှာပဲ တိမ်နည်းနည်းဖြစ်၊ မိုးနည်းနည်းပါးပါးရွာတာလောက်ဖြစ်မယ်။ ပါးပါးလေးပဲ။ ဒါလောက်ပဲ” 

ဩဂုတ်၊ စက်တင်ဘာ၊ အောက်တိုဘာလောက်ကျရင်တော့ အယ်နီညိုဖြစ်နိုင်ချေပြန်ရှိလာလို့ အဲ့ဒီအချိန်တွေကျရင်တော့ မိုးများတာ၊ မုန်တိုင်းတိုက်တာ၊ တချို့နေရာတွေ မိုးခေါင်နိုင်တာ စတဲ့ အစွန်း ရောက်ရာသီဥတုမျိုးတွေ ပြန်ရှိလာနိုင်တယ်လို့လည်း ဦးဝင်းနိုင်က ခန့်မှန်းပါတယ်။

#(ဆရာဦးဝင်းနိုင်အနေဖြင့် Windy App ရှိ ကမ္ဘာလုံးဆိုင်ရာမိုးလေဝသ Model များဖြစ်သည့် ECMWF Model နှင့် GFS Model ခန့်မှန်းချက်များကို အသုံးပြု၍ ကြိုတင်ခန့်မှန်းခြင်း ဖြစ်ပါသည်)

#(မိမိဒေသ မြို့နယ်တစ်ခုချင်းအလိုက် အသေးစိတ်မိုးလေဝသအခြေအနေများကို သိလိုပါက Green Way app ရှိ ‘ မေးကြ၊ ဖြေကြ ဒေသအလိုက် မိုးလေဝသ’ အဖွဲ့တွင် အခမဲ့အဖွဲ့ဝင်ပြီး ဆရာနှင့် တိုက်ရိုက်မေးမြန်းနိုင်ပါသည်)

ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ဟုထည့်ပေးပါရန် မေတ္တာရပ်ခံအပ်ပါသည်။