- ကချင်ပြည်နယ်၊ စစ်ကိုင်းတိုင်းအထက်ပိုင်းဒေသများတွင် လာမည့် ၃ ရက်အတွင်း မိုးများနိုင်ပြီး မြစ်ရေများတက်နိုင်

- အလယ်ပိုင်းဒေသများ လာမည့် ၃ ရက်အတွင်း လေပြင်းများကျနိုင်သော်လည်း မိုးဆက်နည်းနိုင်

- ဇွန် ၂၀ ကျော်အထိ မုတ်သုံလေအား ဆက်ကောင်းနေဦးမှာမို့ အလယ်ပိုင်းဒေသများမှအပ တပြည်လုံး မိုးဆက်ရွာနေမည်

ကချင်ပြည်နယ်၊ စစ်ကိုင်းတိုင်းအထက်ပိုင်းဒေသတွေမှာ လာမယ့် ၃ ရက်(၇၂ နာရီအတွင်း) မိုးရေချိန်စုစုပေါင်း ၄ လက်မ မှ ၁၀ လက်မ အထိရွာနိုင်ခြေရှိနေပြီးတော့ ဧရာဝတီမြစ်ဖျားပိုင်းနဲ့ ချင်းတွင်းမြစ်ဖျားဒေသတွေမှာပါ မိုးများမှာကြောင့် ဧရာဝတီနဲ့ ချင်းတွင်းမြစ်ရေများကတော့ တောက်လျှောက်တက်နေမှာဖြစ်ပေမဲ့ စိုးရိမ်ရေမှတ်တွေကိုတော့ မရောက်နိုင်သေးတာ မိုး/ဇလ မြစ်ရေသတင်းထုတ်ပြန်ချက်တွေအရ တွေ့ရပါမယ်။

အလယ်ပိုင်း၊ မိုးနည်းရေရှားဒေသတွေမှာတော့ လေပြင်းတွေကျနိုင်ပြီး မိုးနည်းနေဦးမယ်လို့ Alert Post တစ်ခု သီးခြားတင်ပေးခဲ့ပြီးပါပြီ။ အလယ်ပိုင်းဒေသတွေအတွက် အပူချိန်မြင့်မားနေဆဲအခြေအနေကြောင့် နောက်လာမယ့် ၃ ရက်မှာလည်း လေပြင်းကျနိုင်ပြီး မိုးကတော့ ဖြစ်ဖြစ်မြောက်မြောက်ရွာနိုင်မယ့် အခြေအနေမရှိသေးပါဘူး။

ရခိုင်ပြည်နယ်နဲ့ ဧရာဝတီတိုင်း၊ ရန်ကုန်တိုင်း၊ ပဲခူးတိုင်း၊ ကယားပြည်နယ်၊ ကရင်ပြည်နယ်၊ မွန်ပြည်နယ်တွေအပြင် ရှမ်းပြည်နယ် တောင်ပိုင်း/မြောက်ပိုင်း တွေမှာလည်း ၇၂ နာရီအတွင်း မိုးရေချိန် ၂ လက်မကျော်အထိ ရွာနိုင်ခြေရှိနေပါတယ်။ ပဲခူးရိုးမတစ်လျှောက်မိုးများမှာဖြစ်လို့ စစ်တောင်းမြစ်ရေတက်လာနိုင်မယ့် အခြေအနေလည်း ရှိနေပါမယ်။ ရှမ်းပြည်နယ်နဲ့ ကယားပြည်နယ်တွေ မိုးများလာရင် သံလွင်မြစ်ရေလည်း ဆက်တက်လာနိုင်မှာပါဘဲ။

အားလုံးကိုခြုံပြီး သုံးသပ်ရရင်၊ ဇွန်လ ၂၀ ရက်ကျော်သည်အထိ မုတ်သုံလေအားက ဆက်ကောင်းနေဦးမှာမို့ အလယ်ပိုင်းဒေသတွေမှအပ တပြည်လုံး မိုးဆက်လက်ရွာနေမည်ဖြစ်ပြီး ကချင်ပြည်နယ်၊ စစ်ကိုင်းတိုင်းအထက်ပိုင်း၊ မန္တလေးတိုင်းမြောက်ပိုင်း၊ မကွေးတိုင်းတောင်ပိုင်းနဲ့ ဧရာဝတီတိုင်း၊ ပဲခူးတိုင်း၊ ရန်ကုန်တိုင်း၊ မွန်ပြည်နယ်၊ ကရင်ပြည်နယ်တွေမှာ မိုးများနေပါဦးမယ်။

“ အလယ်ပိုင်းတွေမှာက တိမ်ဖြစ်လာရင်တောင်မှ သူက အပူချိန်က ၃၅ ဒီဂရီထိတက်နေတယ်။ နေ့အပူချိန်တွေပေါ့နော်။ တက်နေတုန်းပဲ။ Dew point (ငွေ့ရည်ဖွဲ့မှတ်) ကလည်း ၂၃၊ ၂၄ လောက်မှာ ရှိနေတော့ အပူချိန်နဲ့ Dew point ကွာဟချက်က တော်တော်ကြီးနေတဲ့အတွက် တိမ််တွေဖြစ်လာရင်တောင်မှ ဒီအပူချိန် မကျမချင်းကတော့ မိုးရွာနိုင်ဖို့အတွက် အလားအလာနည်းနေဦးမှာပဲ” 

(အပူချိန်နှင့် ငွေ့ရည်ဖွဲ့မှတ် ထပ်တူညီ (သို့မဟုတ်) နီးစပ်ပါက မိုးရွာနိုင်ပြီး ဝေးကွာလွန်းပါက မိုးမရွာနိုင်ပါ)

“ အလယ်ပိုင်းတစ်ပိုင်းလုံးပဲ။ မကွေးမြို့အပါအဝင်ပေါ့နော်။ မကွေးမြို့မြောက်ဘက်ကနေ မုံရွာအထက်ထိ တစ်ခုလုံးပဲ” 

(မိုးရေချိန်လက်မအနေဖြင့် ၂၄ နာရီအတွင်းတိုင်းတာချက် ၃ လက်မ ၄ လက်မဆိုပါက နေရာကွက်မိုးများနိုင်သည့်အခြေအနေဖြစ်သည်။ တိမ်လည်းဖြစ်၊ အပူချိန်နှင့် Dew ponit လည်းကိုက်၊ မိုးရေချိန်လည်း ၂.၈၊ ၃ လက်မလောက်ဆိုပါက မိုးရွာသွန်းမှုများနိုင်သည့်အခြေအနေဖြစ်သည်။) 

( နိုင်ငံတကာမိုးလေဝသကြိုတင်ခန့်မှန်းချက်များကို ကိုးကားပြီး အပြည်ပြည်ဆိုင်ရာမိုးလေဝသစောင့်ကြည့်သုံးသပ်သူ ဦးဝင်းနိုင်၏ ကြိုတင်ခန့်မှန်းချက်ဖြစ်ပါသည်။)

Photo Crd - Win Naing FB

ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ဟုထည့်ပေးပါရန် မေတ္တာရပ်ခံအပ်ပါသည်။