၂၀၂၅ ခုနှစ်၊ ဧပြီလအတွင်း ဖြစ်လာနိုင်တဲ့ အပူချိန်ကြိုတင်ခန့်မှန်းချက်တွေကို Meteoblue ရဲ့ SA-ENSEMBLE, SA-ECMWF နဲ့ SA-NCEP model ၃ ခုရဲ့ ခန့်မှန်းချက်များမှတဆင့် လေ့လာတဲ့အခါ -

🌡 ဧရာဝတီတိုင်း၊ ရခိုင်ပြည်နယ်၊ မကွေးတိုင်း၊ မန္တလေးတိုင်း၊ ရှမ်းပြည်နယ်မြောက်ပိုင်း၊ ချင်းပြည်နယ်၊ စစ်ကိုင်းတိုင်းနဲ့ ကချင်ပြည်နယ်တွေမှာ ဧပြီလရဲ့ ပျမ်းမျှဖြစ်မြဲအပူချိန်အထက် ၀.၅°C မှ ၁°C အထိ ပိုမိုပူပြင်းနိုင်ကြောင်း၊ ဒီအပူချိန်ဟာ အယ်လ်နီညိုနှစ်ဖြစ်ခဲ့သော ၂၀၂၄ ခုနှစ်အပူချိန်အောက် ၁°C ခန့် လျော့နည်းနိုင်ကြောင်း တွေ့ရပါတယ်။

🌡 နေပြည်တော်၊ ရန်ကုန်တိုင်း၊ ပဲခူးတိုင်း၊ ရှမ်းပြည်နယ်တောင်ပိုင်းနှင့် အရှေ့ပိုင်း၊ ကယားပြည်နယ်၊ ကရင်ပြည်နယ်၊ မွန်ပြည်နယ်၊ တနင်္သာရီတိုင်းတွေမှာတော့ ဧပြီလရဲ့ ပျမ်းမျှဖြစ်မြဲအပူချိန်များအထက် ၀.၂°C မှ ၀.၅°C အထိ ပိုမိုပူပြင်းနိုင်ကြောင်းတွေ့ရတာကြောင့် ပြီးခဲ့တဲ့ ၂၀၂၄ အယ်လ်နီညိုနှစ်အပူချိန်များထက် ၁.၅°C ခန့်လျော့နည်းနိုင်ကြောင်း ခန့်မှန်းရပါတယ်။

🌡 SA-ENSEMBLE နဲ့ SA-ECMWF model တွေရဲ့ ခန့်မှန်းချက်က မတိမ်းမယိမ်း(အတူတူ)သာရှိနေပြီး SA-NCEP model ခန့်မှန်းချက်ကတော့ ရှမ်းပြည်နယ်မြောက်ပိုင်း၊ ကချင်ပြည်နယ်နဲ့ စစ်ကိုင်းတိုင်းအထက်ပိုင်းတွေမှာ ဧပြီလရဲ့ ပျမ်းမျှဖြစ်မြဲအပူချိန်အထက် ၁°C မှ ၁.၅°C အထိအပူချိန်ပိုမိုနိုင်ကြောင်းတွေ့ရပါတယ်။ NCEP ခန့်မှန်းချက်အရလည်း ၂၀၂၄ ခုနှစ်(အယ်လ်နီညိုဖြစ်ခဲ့သောနှစ်)အပူချိန်များထက် ပူပြင်းမှုလျော့နည်းနိုင်မယ်ဆိုတာတွေ့ရပါတယ်။

🔸 နွေရာသီကာလအတွင်းကို တဖြည်းဖြည်းဝင်ရောက်လာနေတာဖြစ်တာကြောင့် နေ့အပူချိန်များတဖြည်းဖြည်း မြင့်တက်လာတယ်ဆိုသော်လည်း အယ်လ်နီညိုဖြစ်ခဲ့တဲ့ ၂၀၂၄ ခုနှစ်လောက် ၂၀၂၅ ခုနှစ်နွေရာသီက အပူချိန်မများနိုင်ဘူး လို့သုံးသပ်ရပါတယ်။ နွေရာသီကာလအတွင်းမှာ ဖြစ်လေ့ရှိတဲ့ ပူပြင်းခြောက်သွေ့မှုကြောင့်  ၄၀°C ဝန်းကျင်အထိဖြစ်လာတဲ့အပူရှိန်နဲ့ ခြောက်သွေ့တဲ့လေပြင်းတိုက်ခတ်နိုင်ခြင်းကြောင့် မီးဘေးအန္တရာယ်ကို ပေါ့ဆလို့တော့ မရပါ။

Meteoblue မှ Model တွေရဲ့ စုပေါင်းခန့်မှန်းချက်များကိုအခြေခံပြီးမှ ရေးဆွဲပေးထားတဲ့ ပြည်နယ်/တိုင်းမြို့များရဲ့ ၄ ရက်အတွက် မိုးလေဝသခန့်မှန်းချက်တွေမှာ အနီးစပ်ဆုံးကြိုတင်ခန့်မှန်းချက်များကို ကြည့်ရှုလေ့လာနိုင်ပါတယ်။

https://www.mmweather.org/divisional-cities-weather

ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ကို ထည့်ပေးပါရန် မေတ္တာရပ်ခံအပ်ပါသည်။