ယနေ့မနက်ပိုင်းက စ ပြီး ဘင်္ဂလားပင်လယ်အော်အရှေ့မြောက်ပိုင်းပင်လယ်ပြင်၊ ရခိုင်ကမ်းရိုးတန်းမြောက်ပိုင်း၊ စစ်တွေမြို့နဲ့ကျောက်ဖြူမြို့အနီးမှာ လေဖိအားနည်းရပ်ဝန်း(LOW PRESURE AREA-LPA) တစ်ခု ဖြစ်ပေါ်လာတာတွေ့ရပါတယ်။

LPA က အားကောင်းလာနိုင်မယ့် အခြေအနေမရှိဘဲ အောက်တိုဘာလ ၁၃ ရက်နေ့မနက်ပိုင်းမှာ မြန်မာ-ဘင်္ဂလားဒေ့ရှ်နယ်စပ်အနီးကုန်းတွင်းမှာ အားပျော့ပျက်ပြယ်သွားနိုင်မယ်လို့တွေ့ရပါတယ်။

**ဖြစ်ပေါ်လာနိုင်မည့် မိုးလေဝသအခြေအနေ**

ဒီအခြေအနေကြောင့် နောက်လာမဲ့ ၃ ရက်မှ ၅ ရက်အတွင်း -

ရခိုင်ကမ်းရိုးတန်းမြောက်ပိုင်းဒေသတွေမှာ မိုးသက်လေပြင်းကျပြီး နေရာကွက်လို့ မိုးကြီးနိုင်ပါမယ်။ မိုးသက်လေပြင်းကျချိန်မှာ လေတိုက်နှုန်း တစ်နာရီ မိုင် ၂၀ ကျော်ခန့်တိုက်ခတ်နိုင်ပြီး လှိုင်းအသင့်အတင့်ခန့်သာဖြစ်နိုင်ပါမယ်။

နောက်လာမဲ့ ၂၄ နာရီအတွင်းမှာ -

ရခိုင်ပြည်နယ်မြောက်ပိုင်း၊ ပဲခူးတိုင်းအရှေ့ခြမ်း၊ နေပြည်တော်၊ မန္တလေးတိုင်း၊ ရှမ်းပြည်နယ်မြောက်ပိုင်းနဲ့ ကချင်ပြည်နယ်တွေမှာ မိုးရေချိန် ၅၀ မီလီမီတာအထက်ရွာပြီး မိုးကြီးနိုင်ပါတယ်။ ကျန်ပြည်နယ်တိုင်းဒေသတွေမှာတော့  မိုးရေချိန် ၃၀ မီလီမီတာအောက်ဖြင့် မိုးအသင့်အတင့်ရွာသွန်းနိုင်ပြီး၊ ရှမ်းပြည်နယ်မှာ ၅ မီလီမီတာအောက်သာရွာသွန်းနိုင်ကာ မိုးနည်းနေပါမယ်။

နောက်လာမဲ့ ၄၈ နာရီအတွင်းနဲ့ နောက်လာမဲ့ ၇၂ နာရီအတွင်းမှာ -

ရခိုင်ပြည်နယ်၊ မွန်ပြည်နယ်၊ ကရင်ပြည်နယ်၊ ပဲခူးတိုင်းအရှေ့ခြမ်း၊ မန္တလေးတိုင်း၊ စစ်ကိုင်းတိုင်း၊ မကွေးတိုင်း၊ ကချင်ပြည်နယ်တွေမှာ မိုးရေချိန် ၅၀ မီလီမီတာမှ ၁၀၀ မီလီမီတာအထက်ရွာသွန်းကာ မိုးများနိုင်ပြီး ကျန်ပြည်နယ်တိုင်းဒေသတွေမှာတော့ ၅၀ မီလီမီတာအောက် မိုးအသင့်အတင့်ရွာသွန်းနိုင်ပါမယ်။

**အနောက်တောင်မုတ်သုံလေဆုတ်ခွာနိုင်မည့်အခြေအနေ**

ဒီအခြေအနေပြီးရင်တော့  အနောက်တောင်မုတ်သုံလေဟာ မြန်မာနိုင်ငံအလယ်ပိုင်း၊ မြစ်ဝကျွန်းပေါ်ဒေသများနဲ့ တစ်နိုင်ငံလုံးမှ ခန့်မှန်း အောက်တိုဘာလ ၁၅ ရက်ဝန်းကျင်မှာ အဆင့်ဆင့်ဆုတ်ခွာသွားမယ်လို့ ခန့်မှန်းထားပါတယ်။

အောက်တိုဘာလ ၁၅ ရက်က ပုံမှန်မုတ်သုံဆုတ်ခွာရက်ဖြစ်တာကြောင့် ၂၀၂၃ ခုနှစ်အနောက်တောင်မုတ်သုံလေသည် ၈ ရက်ခန့်စောစီးစွာဝင်ရောက်ခဲ့ပြီး ပုံမှန်ရက်အတွင်းပြန်လည်ဆုတ်ခွာနိုင်ကြောင်း အိန္ဒိယမိုးလေဝသဌာန အနောက်တောင်မုတ်သုံလေဆုတ်ခွာရက်တင်ပြချက်များကို ကိုးကား၍ ခန့်မှန်းတင်ပြလိုက်ပါတယ်။

Photo_ဦးဝင်းနိုင်

(မိမိဒေသ မြို့နယ်တစ်ခုချင်းအလိုက် အသေးစိတ်မိုးလေဝသအခြေအနေများကို သိလိုပါက Green Way app ရှိ ‘ မေးကြ၊ ဖြေကြ ဒေသအလိုက် မိုးလေဝသ’ အဖွဲ့တွင် အခမဲ့အဖွဲ့ဝင်ပြီး ဆရာနှင့် တိုက်ရိုက်မေးမြန်းနိုင်ပါသည်)

ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ဟုထည့်ပေးပါရန် မေတ္တာရပ်ခံအပ်ပါသည်။