**ထူးခြားသည့်အခြေအနေ**

တောင်တရုတ်ပင်လယ်မှာ စတင်ဖြစ်ပေါ်ခဲ့တဲ့ လေဖိအားနည်းရပ်ဝန်း TD-13W သည် - ဗီယက်နမ်၊ လာအို၊ ထိုင်း၊ ကရင်ပြည်နယ်၊ မွန်ပြည်နယ်၊ ပဲခူးတိုင်း၊ ရန်ကုန်တိုင်း၊ ဧရာဝတီတိုင်းတွေကို လေပွေလှိုင်းအဖြစ်ဖြတ်ကျော်ပြီး၊ ဘင်္ဂလားပင်လယ်အော် အရှေ့ပိုင်းကိုရောက်လာပြီးနောက် စက်တင်ဘာလ ၂၉ ရက်နေ့ မွန်းလွဲ ၁၂:၃၀ နာရီအချိန်မှာ စောင့်ကြည့်ရမဲ့ INVEST-90B ဖြစ်လာကြောင်းတွေ့ရပါတယ်။

တချိန်ထဲမှာဘဲ အာရေဗျပင်လယ်ဘက်မှာ INVEST-99A ဖြစ်နေပြီး အိန္ဒိယနိုင်ငံကို ဖြတ်ကျော်ကာ ဘင်္ဂလားပင်လယ်အော် အနောက်အလယ်ပိုင်းပင်လယ်ပြင်အထိ ရောက်လာနိုင်ဖွယ်ရှိကြောင်း တွေ့ရပါတယ်။

**မြန်မာနိုင်ငံအပေါ်သက်ရောက်နိုင်သည့်မိုးလေဝသအခြေအနေ**

INVEST-90B ရဲ့ ညာဘက်ခြမ်းမှာရှိနေတဲ့ မြန်မာနိုင်ငံမှာတော့ တစ်နိုင်ငံလုံးမှာ မိုးထစ်ချုန်းရွာနိုင်မယ့် အခြေအနေတွေ ဆက်လက်ဖြစ်ပေါ်နေပြီး -

**တနင်္သာရီတိုင်း၊ မွန်ပြည်နယ်၊ ကရင်ပြည်နယ်၊ ပဲခူးတိုင်း၊ ရန်ကုန်တိုင်း၊ ဧရာဝတီတိုင်း၊ ရခိုင်ပြည်နယ်၊ ချင်းပြည်နယ်၊ မကွေးတိုင်း၊ စစ်ကိုင်းတိုင်းအောက်ပိုင်း၊ မန္တလေးတိုင်း၊ နေပြည်တော်၊ ကယားပြည်နယ်၊ ရှမ်းပြည်နယ်တောင်ပိုင်းနဲ့အရှေ့ပိုင်းတွေမှာ ၃ ရက်အတွင်း မိုးရေချိန် ၆၀ မီလီမီတာမှ ၂၅၀ မီလီမီတာအထိ ရွာသွန်းနိုင်ပြီး မိုးအလွန်များနိုင်ပါမယ်။**

**ရှမ်းပြည်နယ်မြောက်ပိုင်း၊ ကချင်ပြည်နယ်နဲ့ စစ်ကိုင်းတိုင်းအထက်ပိုင်းမှာတော့ ၃ ရက်အတွင်း မိုးရေချိန် ၃၀ မီလီမီတာမှ ၅၀ မီလီမီတာအထိသာ ရွာသွန်းနိုင်ပါမယ်။**

**၇၂ နာရီအတွင်း ၃၀ မီလီမီတာအောက် မိုးရွာပြီး မိုးအလွန်နည်းနိုင်မည့်ဒေသ သည်တနင်္သာရီတိုင်းတောင်ပိုင်းအစွန် ကော့သောင်းမြို့နယ်အတွင်းမှာသာရှိပါမယ်**

**ပင်လယ်ပြင်မှာတော့ ပြီးခဲ့တဲ့ post များမှာ ကြိုတင်ခန့်မှန်းခဲ့တဲ့အတိုင်း နောက် ၃ ရက်(အောက်တိုဘာလ ၂ ရက်အထိ)လှိုင်း/လေ ကြမ်းနေပါမယ်။ လေတိုက်နှုန်း တစ်နာရီ မိုင် ၄၀ ကျော်အထိ တိုက်ခတ်နိုင်ပြီး လှိုင်းအမြင့် ၈ ပေ မှ ၁၀ ပေအထိ ရှိနိုင်ကြောင်းတွေ့ရပါတယ်။**

Photo_ဦးဝင်းနိုင်

(မိမိဒေသ မြို့နယ်တစ်ခုချင်းအလိုက် အသေးစိတ်မိုးလေဝသအခြေအနေများကို သိလိုပါက Green Way app ရှိ ‘ မေးကြ၊ ဖြေကြ ဒေသအလိုက် မိုးလေဝသ’ အဖွဲ့တွင် အခမဲ့အဖွဲ့ဝင်ပြီး ဆရာနှင့် တိုက်ရိုက်မေးမြန်းနိုင်ပါသည်)

ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ဟုထည့်ပေးပါရန် မေတ္တာရပ်ခံအပ်ပါသည်။