မွေးမြူရေးလုပ်ငန်းဆိုတာ အောင်မြင်အောင်လုပ်နိုင်မယ်၊ ဈေးကွက်ကောင်းရမယ်ဆိုရင် စိုက်ပျိုးရေးလုပ်ငန်းထက်ကို ဝင်ငွေပိုကောင်းနိုင်တဲ့ စီးပွားရေးတစ်ခုပါ။ တစ်ဖက်မှာတော့ ကူးစက် ရောဂါတွေကျရောက်လာရင်လည်း ထိန်းချုပ်ရပိုမိုခက်ခဲပြီး ထိခိုက်မှုပိုများနိုင်တာမျိုးတော့ ရှိပါတယ်။ 

ဒါပေမဲ့ ဒီလိုမျိုးထိခိုက်မှုမျိုးဟာ ဖွံ့ဖြိုးဆဲနိုင်ငံတွေမှာသာအဖြစ်များပြီး ဖွံ့ဖြိုးပြီးနိုင်ငံအများစုမှာတော့ ထိန်းချုပ်နိုင်စွမ်းမြင့်သလို ဈေးကွက်လည်းကောင်းကြတဲ့အတွက် ဝင်ငွေလည်းကောင်းကြပါတယ်။ ဒီထဲကမှ အမေရိကမှာ တစ်နိုင်တစ်ပိုင်မွေးမြူရေးတောင်သူတွေအတွက် ဝင်ငွေအကောင်းဆုံး ရှာဖွေပေးနိုင်တဲ့ လုပ်ငန်း (၅) ခုကို ဖော်ပြပေးလိုက်ပါတယ်။

ကမ္ဘာ့ထိပ်တန်းဒေသတစ်ခုမှာ ဘယ်လိုတွေကနေ အကျိုးအမြတ်ရနေသလဲဆိုတာကို ဗဟုသုတအနေနဲ့ သိရှိစေချင်လို့ဖြစ်သလို မိမိတို့လည်း စဉ်းစားစရာအတွေးတွေ နည်းနည်းပဲဖြစ်ဖြစ် ရစေချင်လို့ပါ။

(၁) နွားမွေးမြူရေး

အမေရိကန်နဲ့ ကနေဒါမှာဆိုရင် အမဲသားဈေးကွက်ဟာ ကြီးမားလွန်းတဲ့အတွက် နွားမွေးမြူရေးလုပ် ငန်းဟာ မွေးမြူရေးသမားတွေအတွက် ထိပ်တန်းရွေးချယ်မှုပါပဲ။ တခြားသတ္တဝါတွေ မွေးမြူတာ ထက်စာရင် နွားမွေးတာက ကရိကထမများတာကြောင့်လည်း ပါပါတယ်။ ဒီတိုင်း လွှတ်ကျောင်း မွေးထားလိုက်တဲ့နွားတွေကနေထွက်လာတဲ့ အမဲသား၊ နို့နဲ့ ဒိန်ခဲတွေဟာ ဈေးကောင်းတောင် ပိုရပါ သေးတယ်။ 

(၂) ကြက်မွေးမြူရေး

အသားတိုးကြက်ထက် ဥစားကြက်မွေးမြူရေးက ပိုလို့တောင် ဝင်ငွေကောင်းပါသေးတယ်တဲ့။ အစား အသောက်အမယ်အများကြီးမှာ ကြက်ဥပါနေလို့ပါ။ ပုံမှန်နှုန်းထားတစ်ခုမှာသာ ကြက်ဥထုတ်နေနိုင် ရင် တစ်ပိုင်တစ်နိုင်မွေးမြူရေးသမားတစ်ယောက်အတွက် ဝင်ငွေဖြောင့်နေမှာပါပဲ။ အော်ဂဲနစ်ကြက်ဥ၊ အော်ဂဲနစ်ကြက်ဥတွေထုတ်နိုင်ရင် ပိုလို့တောင်အကျိုးအမြတ်ရနိုင်ပါသေးတယ်။ ဒေသတွင်းထုတ် ကြက်ဥ၊ ကြက်သား ဆိုတဲ့ တံဆိပ်ကပ်ရောင်းရင် ပိုလို့တောင် အဝယ်လိုက်ကြပါတယ်တဲ့။

(၃) ဆိတ်

ဆိတ်မွေးမြူရေးထွက်ကုန်တွေရဲ့ဈေးကွက်ဟာ ကြီးထွားလာနေပါတယ်။ ပထမဆုံးပြောရမှာကတော့ ကမ္ဘာလုံးဆိုင်ရာ အနီရောင်အသားစားသုံးမှုရဲ့ ၆၅ ရာခိုင်နှုန်းဟာ ဆိတ်သားဖြစ်ပါသတဲ့။ မြောက် အမေရိကမှာတော့ ဆိတ်သားစားတာဟာ ဆန်းသလိုလိုဖြစ်နေပေမဲ့ ဈေးကွက်ဝယ်လိုအားတော့ ပိုမို မြင့်တက်နေပါတယ်။ နောက်ထပ်ပြောရမှာက ဆိတ်နို့နဲ့ ဆိတ်နို့ဒိန်ခဲပါ။ နွားနို့နဲ့ နွားနို့ဒိန်ခဲတွေအစား ဒါတွေက ကျန်းမာရေးအတွက် စားသုံးသင့်စရာလို့ ယူဆလာကြလို့ပါ။ ဒီမှာလည်း ကြက်တုန်းက ပြောခဲ့သလို အော်ဂဲနစ်အသိ အမှတ်ပြုလက်မှတ်တွေ ရနိုင်မယ်ဆို ဆိတ်ထွက်ကုန်တွေလည်း ပိုမိုရောင်းကောင်းပါတယ်တဲ့။

(၄) ပျားမွေးမြူရေး

ပျားရည်ထုတ်ပေးတဲ့ ပျားမွေးမြူရေးလုပ်ငန်းဟာလည်း လုပ်ရကိုင်ရလွယ်သလို တန်ဖိုးရှိတဲ့ မွေးမြူ ရေးလုပ်ငန်းတစ်ခုပါပဲ။ စိုက်ပျိုးရေးလုပ်ငန်းလုပ်ကိုင်သူတွေကို သူတို့သီးနှံတွေ ဝတ်မှုန်ကူးဖို့ ငှားပေး လို့ရသလို ကိုယ်တိုက်စိုက်ပျိုးရေးလုပ်မယ်ဆိုရင်လည်း အသုံးချလို့ရပါတယ်။ ဒီဒေသတွင်း ပျားမွေး မြူရေးကနေ ရရှိလာတဲ့ ပျားရည်နဲ့ ပျားဖယောင်းတွေဟာလည်း စားသုံးသူတွေအတွက် အရေးပါတဲ့ထုတ်ကုန်တွေ ဖြစ်နေတာပါ။

(၅) ယုန်မွေးမြူရေ

တစ်ပိုင်တစ်နိုင်မွေးမြူရေးသမားတွေအတွက် နောက်ထပ်ကြီးထွားလာတဲ့ဈေးကွက်ကတော့ ယုန်မွေးမြူရေးထုတ်ကုန်တွေပါပဲ။ ဥပမာပြောရရင် ယုန်သားဟာ ပရိုတိန်းမြင့်ပြီး ကယ်လိုရီနည်းလို့ ကျန်းမာရေးအတွက်ကောင်းတယ်လို့ ယူဆလာကြတာပါပဲ။ အမွေးပါတဲ့ ယုန်သားရေတွေဟာလည်း လက်မှုပစ္စည်းတွေ၊ ကုတ်အင်္ကျီတွေ၊ ဦးထုပ်တွေလုပ်ရာမှာ အသုံးဝင်ပါတယ်။ ဒါ့အပြင် ဒီအကောင် လေးတွေဟာ ချစ်စရာလည်းကောင်းတော့ သားဖောက်ပြီး အိမ်မွေးတိရစ္ဆာန်အဖြစ် ရောင်းလို့လည်း ရပါသေးတယ်။ နောက်ဆုံးပြောရရင် ယုန်ချေးဟာတောင်မှ အကောင်းဆုံးအော်ဂဲနစ်မြေဩဇာအဖြစ် အသုံးဝင်နေသေးတာမို့ ချေးတောင်လွှင့်မပစ်ရတဲ့ သတ္တဝါမွေးမြူရေးလုပ်ငန်းပါပဲတဲ့။

ဒါဟာ အမေရိကလို ဖွံ့ဖြိုးပြီးဒေသတစ်ခုက တစ်ပိုင်တစ်နိုင်မွေးမြူရေးသမားတွေအတွက် ဝင်ငွေ အကောင်းဆုံးမွေးမြူရေးလုပ်ငန်း (၅) ခုကို ဖော်ပြပေးခဲ့တာပါ။ ဒီထဲကနေ မြန်မာနိုင်ငံက မွေးမြူရေးသမားတွေအတွက်လည်း တွေးစရာတစ်ခုခုတော့ ရကြမယ်လို့ မျှော်လင့်မိပါတယ်။

Ref: https://www.zarebasystems.com/articles/profit-livestock-small-farm

ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ကို ထည့်ပေးပါရန် မေတ္တာရပ်ခံအပ်ပါသည်။