၂၀၂၁ ခုနှစ် မိုးဦးရာသီတွင် သွင်းအားစုစရိတ်များမြင့်တက်နေသည့်အတွက် မိုးစပါးစိုက်ပျိုးသည့် ကုန်ကျစရိတ်မှာ ယခင်နှစ်ကထက် (၂)ဆခန့် တိုးမြင့်ကုန်ကျခဲ့ကြောင်း တောင်သူများက ပြောသည်။

ကျွန်တော့်လယ်က တစ်ဧကကို ပျမ်းမျှအားဖြင့် စပါးတင်းတစ်ရာနှုန်းဝန်းကျင်တော့ ထွက်ပါတယ်။ ဆင်းသုခစပါး တစ်ဧကအတွက် စုစုပေါင်းစိုက်စရိတ်က ပုံမှန်ဆိုရင် ငွေတစ်သိန်းရှစ်သောင်းကျပ်လောက်ပဲ ကုန်ကျတယ်။ ဒီနှစ်အနေအထားအရတော့ တစ်ဧကကို စိုက်စရိတ် သုံးသိန်းလောက်ကျသွားမယ်။ စပါးပေါ်တဲ့အချိန်မှာ ဈေးနှုန်းကျဆင်းတာမျိုး ကြုံရတတ်ပါတယ်။ ဒီနှစ်ဆိုရင် သွင်းအားစုစရိတ်တွေက တက်နေတော့ ပိုဆိုးတာပေါ့ ခင်ဗျာ။

ဟု ပဲခူးတိုင်းဒေသကြီး၊ ဇေယျဝတီမြို့၊ ဖြူးမြို့နယ်မှ မိုးစပါးစိုက်ပျိုးသူ ကိုအောင်ခိုင်မင်းက ပြောသည်။

    မိုးစပါးစိုက်ပျိုးကြရာတွင် အများအားဖြင့် ဇွန်လတွင် ပျိုးထောင်၍ ဇူလိုင်လတွင် စတင်စိုက်ပျိုးလေ့ရှိကာ အောက်တိုဘာလကုန်တွင် ရိတ်သိမ်းကြသည်။

    စပါးပေါ်သည့်ရာသီချိန်တွင် ဈေးနှုန်းကျဆင်းခြင်းကို တောင်သူများ နှစ်စဉ်ကြုံတွေ့ရလေ့ရှိပြီး၊ တချို့ဒေသများတွင် ဈေးကွက်တိုက်ရိုက်မရှိဘဲ တစ်ဆင့်ခံတင်ပို့ရောင်းချရသဖြင့် လမ်းပန်းဆက်သွယ်ရေးကုန်ကျစရိတ်များလည်း ကုန်ကျနေကြောင်း သိရသည်။

ကျွန်တော်တို့က တောင်ငူမြို့ပေါ်ကို စပါးတင်ပို့ရောင်းချပါတယ်။ နယ်အဝယ်ဒိုင်တချို့က ဆင်းဝယ်ကြတာမျိုးလည်း ရှိတတ်ပါတယ်။ ဈေးကွက်အခက်အခဲကတော့ ကျွန်တော်တို့ဘက်မှာ ဒေသအဝယ်ဒိုင်တွေမရှိဘူး။ အဝေးကိုတင်ပို့ရတဲ့အတွက် လမ်းခရီးတင်ပို့တဲ့ ကုန်ကျစရိတ်က နည်းနည်းဈေးကြီးတာပေါ့။ သယ်ခ ပို့ခတွေ ပိုကုန်သွားတာပေါ့။ ဒါ့ကြောင့် ခါတိုင်း စပါး (၁၆) ပြည်တစ်တင်းကို ခြောက်ထောင်ကျပ်လောက်ရရင် တွက်ခြေကိုက်ပေမယ့် အခုနှစ်က စိုက်စရိတ်ပိုများတဲ့အတွက် စပါးတစ်တင်းကို ရှစ်ထောင်/ကိုးထောင်ကျပ်လောက်ရမှ အဆင်ပြေမယ့်သဘော ဖြစ်နေပါတယ်။

ဟု ကိုအောင်ခိုင်မင်းက ဆက်လက်ပြောသည်။

    မိုးစပါးစိုက်ပျိုးရာတွင် မိုးခေါင်ရေရှားသည့်ဒေသများ၌ ကြဲပက်စနစ်ဖြင့် အများစုစိုက်ပျိုးကြပြီး၊ ရေအလုံအလောက်ရရှိသည့်ဒေသများတွင်မူ သမန်းဆွဲစနစ်ဖြင့် စိုက်ပျိုးလေ့ရှိကြသည်။