COVID ကာလမပြီးဆုံးမချင်း တစ်ကမ္ဘာလုံးအတိုင်းအတာဖြင့် စီးပွားရေးဆုတ်ကပ်သဖွယ် ဖြစ်နေသောကြောင့် လျှော်ဖြူဈေးနှုန်းမှာလည်း တည်ငြိမ်မှုမရှိကြောင်း သိရသည်။

လက်ရှိ စျေးနှုန်းကျဆင်းခြင်းရဲ့ အကြောင်းအရင်းကတော့ သေချာပါတယ် COVID ကြောင့်ပါ။ တစ်ကမ္ဘာလုံး၊ တစ်နိုင်ငံလုံး လုပ်ငန်းတော်တော်များ ရပ်ဆိုင်းနေရပါတယ်။ ကျွန်တော်တို့ မြန်မာ့လျှော်ဖြူရဲ့ အဓိကစျေးကွက်ဖြစ်တဲ့ တရုတ်ပြည်မှာလည်း စျေးဆိုင်၊ စားသောက်ဆိုင်၊ စက်ရုံတွေဟာ ရာနှုန်းပြည့် အလုပ်မလုပ်နိုင်ကြသေးပါဘူး။ အဲ့ဒီတော့ ကုန်ကြမ်းလိုအပ်ချက် မများသေးတာပါ။

ဟု မြန်မာနိုင်ငံ လျှော်ဖြူစိုက်ပျိုးထုတ်လုပ် တင်ပို့ရောင်းချသူများအသင်း ဒုတိယဥက္ကဌ ဦးဇင်မင်းသန့် က ပြောသည်။

    လျှော်ဖြူဈေးနှုန်း ကျဆင်းရခြင်း၏ အဓိကအကြောင်းအရင်းများအနက် သယ်ယူပို့ဆောင်ရေးစရိတ်များ ယခင်ကထက် မြင့်တက်လာခြင်းလည်း ပါဝင်သည်။

COVID ကာလမှာ နယ်စပ်ကုန်သွယ်မှု ဝင်ပေါက်တွေ ပိတ်ထားပါတယ်။ ပိတ်ထားတဲ့ အခြေအနေကနေ ရောင်းလို့ရအောင် ကြိုးစားပို့ဆောင်တဲ့နေရာမှာ စရိတ်စက တော်တော်လေး ပိုပြီးကုန်ကျပါတယ်။ အရင်ကထက်စာရင် သယ်ယူစရိတ်က (၃) ဆ လောက် များသွားပါတယ်။

ဟု ဦးဇင်မင်းသန့် က ဆက်လက်ပြောသည်။

    လက်ရှိဈေးကွက်အတွင်း လျှော်ဖြူဝယ်ဈေးများမှာ ကြာဇံတစ်ပိဿာလျှင် ကျပ် (၁၀၀,၀၀၀) ဝန်းကျင်၊ ကြာပြတ် တစ်ပိဿာလျှင် (၂၀,၀၀၀) ကျပ်မှ (၃၅,၀၀၀) ကျပ် အတွင်း၊ ရေခဲပွင့်အလှ တစ်ပိဿာလျှင် (၁၀,၀၀၀)ကျပ်မှ (၁၅,၀၀၀)ကျပ် အတွင်း၊ ပုံမှန်ထိပ်စအသန့် တစ်ပိဿာလျှင် (၈,၀၀၀)ကျပ်မှ (၁၀,၀၀၀)ကျပ် အတွင်း၊ ဝမ်းစ (Aတစ်လုံး) တစ်ပိဿာလျှင် (၄,၀၀၀) ကျပ်မှ (၆,၀၀၀) ကျပ် အတွင်း၊ အဝါကြည် တစ်ပိဿာလျှင် (၂,၅၀၀) ကျပ်မှ (၄,၀၀၀) ကျပ်အတွင်း၊ အောက်စ တစ်ပိဿာလျှင် (၁,၀၀၀)ကျပ်မှ (၂,၀၀၀)ကျပ် အတွင်း ဈေးများဖြင့် ဝယ်ယူနေကြောင်း လျှော်ဖြူဒိုင်များမှ သိရသည်။

(ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ကို ထည့်ပေးရန် မေတ္တာရပ်ခံအပ်ပါသည်)