မာလကာသီးပေါ်ချိန်မို့ မာလကာသီးယိုနဲ့ မာလကာပြင်လေးလုပ်စားလို့ရအောင် ပြုလုပ်နည်းလေးကို ပြောပြပေးပါမယ်။

မာလကာယိုပြုလုပ်ဖို့ -

၁. မာလကာသီးအမှည့် – ၁ ကီလို

၂. ရေ – ၂ ခွက် (500 ml)

၃. သကြား – ၁ ခွက်ခွဲ (375 ml)

၄. ပျော်အောင် ဖျော်ထားသော ထောပတ်ရည်- ထမင်းစားဇွန်း ၁ ဇွန်း

၅. သံပုရာရည်– ထမင်းစားဇွန်း ၁ ဇွန်းတို့ လိုအပ်ပါတယ်။

ပြုလုပ်နည်းမှာ-

၁။ ရေဆေးထားသော မာလကာသီးများကို အညှာများဖယ်ပြီး အပိုင်းပိုင်း လှီးပါ။

၂။ ပြီးလျှင် အိုးတစ်လုံးထဲသို့ လှီးထားသော မာလကာသီးနှင့်ရေကိုထည့်ပြီး ရေဆူလာအောင်တည်ထားပါ။ ရေဆူလာပြီးနောက် အပူချိန်အသင့်အတင့်ဖြင့် မိနစ် ၂၀ ခန့် (နူးပျော့သွားအောင်) ဆက်တည်ထားပါ။

၃။ နူးပျော့သွားလျှင် မိမိအဆင်ပြေရာနည်းဖြင့် ကြေညက်သွားအောင် ကြိတ်ခြေပေးပါ။

၄။ ပြီးနောက် အစေ့များ မပါရအောင် အနှစ်ချည်းသက်သက် ဇကာဖြင့်တိုက်ယူပါ။ ဇကာအပြင်ဖက်တွင် ကပ်နေသည်များကိုလည်း ခြစ်ချယူပေးပါ။

၅။ အနှစ်များရလျှင် သကြား၊ ထောပတ်ရည် နှင့် သံပုရာရည်ထည့်ကာ မီးအသင့်အတင့်ဖြင့် မွှေကျိုပေးပါ။ အိုးမကပ်အောင် အောက်ခြေကို ခြစ်ပြီးမွှေပေးပါ။

၆။ မိနစ်၂၀ ခန့် (သို့) မာလကာအနှစ် ပိုပျစ်ပြီး အရောင်ရင့်လာကာ ပြောင်ပြောင်လေးဖြစ်လာလျှင် ( ဇွန်းဖြင့် ခြစ်ဆွဲကြည့်ပါက လမ်းကြောင်းလေးပေါ်လာသော်လည်း ချက်ချင်းပြန်ရောသွားလျှင်) မာလကာယိုအဖြစ် သုံးဆောင်နိူင်ပြီမို့ မီးဖိုပေါ်မှဒယ်အိုးချကာ သန့်ပြန့်သော ပုလင်းထဲထည့်ပြီး အအေးခံပါ။

အေးသွားပြီးနောက် အဖုံးလုံအောင်ဖုံးကာ ရေခဲသေတ္တာထဲတွင် ထည့်သိမ်းထားပါက ရက်ကြာကြာ အထားခံပါတယ်။

မာလကာပြင် ပြုလုပ်နည်း

ယိုအဖြစ်မစားပဲ မာလကာပြင်လုပ်ချင်ပါက ယိုကိုဇွန်းဖြင့် ခြစ်ဆွဲကြည့်ပါက လမ်းကြောင်းလေး အချိန်ကြာကြာပေါ်နေသော အနေအထားဖြစ်သည်အထိ ဆက်ပြီးမွှေပေးပါ။

ထိုအနေအထားဖြစ်လျှင် baking paper (သို့) ငှက်ပျောရွက်ပေါ် ပါးပါးလေးညီညာအောင် ဖြန့်ခင်းပြီး ခြောက်သွားအောင် နေပူလှမ်းပါ (သို့) အခန်းအပူရှိန်ဖြင့် လေသလပ်ခံထားပါ။ မိမိနေထိုင်ရာဒေသကို လိုက်ပြီး ၃ ရက် မှ ၅ ရက်ခန့်အထိ ကြာနိုင်ပါတယ်။

(ထိုအတောအတွင်း  baking paper မှ မာလကာပြင်ခွာလို့ရအောင် ခြောက်သည်နှင့် နောက်တစ်ဖက်လှန်ကာ ဆက်လှန်းပါ။)

မလကာပြင်ကို ပါးပါးလေးမလှန်းပဲ ထူထူလေးလှန်းပြီးလည်း အရသာရှိစွာ သုံးဆောင်နိုင်ပါတယ်။ ဒီလိုထူထူလေးက အပြင်သားမာကာ အတွင်းသားပျော့ပျော့လေးဖြစ်နေ၍ စားရတာ ပိုမိုအရသာရှိစေပါတယ်။

ကိုးကား- ချောစု၏ "home made မာလကာယိုနှင့်မာလကာပြင်” ပြုလုပ်နည်း။