ငါးမွေးမြူရေးလုပ်ငန်းစဉ်မှာ ပါဝင်ပတ်သက်နေသူတွေအားလုံးကြား ဈေးကွက်ချိတ်ဆက်ပေးနိုင်ဖို့ ရည်ရွယ်တဲ့ အလုပ်ရုံဆွေးနွေးပွဲတစ်ခုကို မတ် ၂၈ ရက် ဒီနေ့ကစပြီး တောင်ကြီးမြို့နယ်၊ ဂနိုင်ရှည်ရွာရှိ ဂနိုင်ရှည်ခရစ်ယာန် ဘုရားကျောင်းမှာ ပြုလုပ်နေပါတယ်။

ဒီအလုပ်ရုံဆွေးနွေးပွဲကို BRAC Myanmar နဲ့ World Fish အဖွဲ့တို့  ပူးပေါင်းလုပ်ဆောင်တာဖြစ်ပြီး ငါးမွေးမြူရေးလုပ်ငန်းစဉ်မှာ ပါဝင်ပတ်သက်နေသူတွေအားလုံး ချိတ်ဆက်မှုပိုမိုလာခြင်းဖြင့် ဈေးကွက် ပိုမိုမြှင့်တင်နိုင်ရေးရည်ရွယ်ချက်နဲ့ ပြုလုပ်တာဖြစ်တယ်လို့ သိရပါတယ်။ 

ယခုအလုပ်ရုံဆွေးနွေးပွဲပြုလုပ်ရတဲ့ရည်ရွယ်ချက်တွေကတော့...

• စီးပွားရေးအယူအဆများကို လုပ်ကွက်ငယ်ငါးမွေးတောင်သူများ ပိုမိုသိရှိနားလည်သဘောပေါက်လာစေရန်
• ငါးစာထုတ်လုပ်သူများ၊ ငါးသားပေါက် ထုတ်လုပ်သူများ၊ ငါးအရောင်းအဝယ်လုပ်ငန်းရှင်များ၊ အခြားသွင်းအားစုလုပ်ငန်းရှင်များနှင့် လုပ်ကွက်ငယ်ငါးမွေးတောင်သူများကြား အချင်းချင်းချိတ်ဆက်နိုင်ခြင်းဖြင့် ရေရှည်တည်တံ့မည့် ငါးမွေးမြူရေးလုပ်ငန်းစဉ်များကို အဆင့်မြှင့်တင်နိုင်ရန်နှင့် 
• World fish က ကူညီပံ့ပိုးပေးထားသော ငါးစာထုတ်လုပ်သူများက ထုတ်လုပ်သည့် ငါးစာလုံးများကို ရောင်းအားမြှင့်တင်သွားနိုင်ရန် 

စတာတွေဖြစ်တယ်လို့ သိရပါတယ်။

အလုပ်ရုံဆွေးနွေးပွဲမှာတော့ ငါးမွေးတောင်သူများ၊ ငါးမွေးတောင်သူများနှင့် ချိတ်ဆက်လုပ်ငန်း လုပ်ဆောင်နေ သူများနဲ့ WorldFish အဖွဲ့နှင့် BRAC Myanmar အဖွဲ့ဝန်ထမ်းများ ပါဝင်ဆွေးနွေးမှုတွေ ပြုလုပ်ကြတာ ဖြစ်တယ်လို့ သိရပါတယ်။

ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ကို ထည့်ပေးပါရန် မေတ္တာရပ်ခံအပ်ပါသည်။