မန္တလေးတိုင်းဒေသကြီး၊ တံတားဦးမြို့နယ်အတွင်း နွားပေါင်ပုပ်၊ လက်ပုပ်ရောဂါပိုဆိုးလာပြီး သေဆုံးမှု တွေများလာလို့ တံတားဦးမြို့နယ် အိမ်ကန်ရွာမှာနေထိုင်တဲ့ ကိုမိုးမင်းခန့်က Green Way ကို ပြောပါတယ်။

“ ထပ်ဖြစ်တဲ့ အကောင်အရေအတွက် သေချာတော့မသိရသေးဘူး။ ငါးကောင်တော့ ဘေး ညောင်ပင်ဇောက်ရွာမှာ သေသွားတယ်။ ပိုဆိုးလာတယ်ဆိုတော့ အကိုတို့ဖြစ်စေချင်တာက တခြားမြို့နယ်တွေဆို မွေးမြူရေးအဖွဲ့အစည်းတွေက ကားနဲ့လာပြီး ကာကွယ်ဆေးထိုးပေးတယ်လို့ ကြားဖူးတယ်လေ။ အကိုတို့ နယ်ကိုလည်း ဒီလိုမျိုးလာပြီးထိုးစေချင်ပါတယ်” လို့ ကိုမိုးမင်းခန့်က ပြောပါတယ်။ 

ပြီးခဲ့တဲ့နှစ်တုန်းကလည်း တံတားဦးမြို့နယ်အတွင်း အခုလို ပေါင်ပုပ်၊ လက်ပုပ်ရောဂါဟာ လှိုင်း တစ်လှိုင်းလိုမျိုး ဖြစ်သွားခဲ့သေးတယ်လို့ သိရပါတယ်။

“အခုချိန်ကဒီဘက်မှာ မိုးရွာလိုက်နေပူလိုက်ဖြစ်နေတာဆိုတော့ လူတွေမှာ Covid ဖြစ်သလိုပဲ မကုနိုင်ရင်တော့ သေမှာပါပဲ” လို့ ကိုမိုးမင်းခန့်က ဆိုပါတယ်။

လက်ရှိမှာ နွားဈေးကမကောင်းတော့ ကာကွယ်ဆေးထိုးတာမျိုးတွေ ကိုယ်တိုင်မလုပ်နိုင်လို့ အကူအညီ တွေရချင်တယ်လို့ ကိုမိုးမင်းခန့်က ပြောပါတယ်။

“ကိုယ့်ဟာကိုယ်ထိုးရင်ကကျတော့ တစ်ခါထိုးရင်ကို တစ်သောင်းဝန်းကျင် လောက်ကုန်ကျတယ်။ နွားဈေးကောင်းရင်က ကိစ္စမရှိဘူး။ နွားဈေးက နွားလှရင်မှ ၂ သိန်းလောက်နဲ့ နွားမလှရင်တော့ ၁ သိန်း ၁ သိန်းခွဲလောက်ပဲရတော့တယ်”

ပြီးခဲ့တဲ့နှစ်တုန်းက ပေါင်ပုပ်၊ လက်ပုပ်ရောဂါအပြင် ခွာနာလျှာနာ ရောဂါဒဏ်လည်း ခံခဲ့ရသေးပြီး မကြာခင် ဆောင်းဝင်တော့မှာဆိုတော့ အဲ့ဒီ ခွာနာလျှာနာရောဂါကိုလည်း စိုးရိမ်တယ်လို့ ကိုမိုးမင်းခန့်က ပြောပါတယ်။

‘ နွားငယ်လေးတွေ ပေါင်ပုပ် လက်ပုပ်... ရောဂါဝင်နေလို့...ဘယ်လို ကာကွယ်ဆေး သုံးရမလဲ?’ ဆိုပြီး မန္တလေးတိုင်းဒေသကြီး၊ ရမည်းသင်းမြို့နယ်ထဲက ကိုအောင်မိုးဆိုသူကလည်း Green Way ရဲ့ အမေး အဖြေကဏ္ဍမှာ ပြီးခဲ့တဲ့အပတ်အတွင်း မေးခွန်းလာရောက်မေးထားတာလည်း ရှိနေပါတယ်။

‘ ကျွဲ၊ နွားများတွင် အဖြစ်များသည့် ပေါင်ပုပ်၊ လက်ပုပ် ရောဂါအကြောင်း’ ဆိုပြီး ဦးဇော်(dof) ရေးသားထားတဲ့ ဆောင်းပါးတစ်ပုဒ်ကို Green Way မှာ ဖော်ပြဖူးပါတယ်။

အခု ဒီရောဂါပြန်ဖြစ်နေတဲ့အတွက် ဒီဆောင်းပါးကို ပြန်လည်ဖော်ပြပေးလိုက်ပါတယ်။

အောက်ကလင့်ခ်ကနေဖတ်ရှုနိုင်ပါတယ်။

https://greenwaymyanmar.com/posts/hand_rot_of_cattle

ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ဟုထည့်ပေးပါရန် မေတ္တာရပ်ခံအပ်ပါသည်။