ပြည်မြို့နယ်ရှိ  မြစ်ချောင်းအင်းအိုင်များနဲ့ လယ်တွေထဲမှာ သဘာဝအတိုင်း ရှင်သန်ပေါက်ဖွားလာတဲ့ ငါးရှဥ့်တွေ စျေးကွက်ထဲကို  စတင်ဝင် ရောက်နေပြီး ငါးရှဥ့်တစ်ပိဿာကို ၁၉၀၀၀ ကျပ်သာ စျေးရရှိနေတယ်လို့ သိရပါတယ်။

ယခုကာလက နွေစပါးစိုက်ပျိုးချိန်ဖြစ်ပြီး ဆည်ရေတွေရရှိတဲ့ ကာလဖြစ်တာကြောင့် မြစ်ချောင်း အင်းအိုင် တွေနဲ့ လယ်တွေထဲမှာ ငါးရှဥ့်တွေ ပေါက်ဖွားမှုရှိလာတဲ့အတွက် သဘာဝ လယ်ငါးရှဥ့်တွေ ဖမ်းမိပြီး စျေးကွက်ထဲ ဝင်ရောက်မှုရှိနေတာ ဖြစ်တယ်လို့ သိရပါတယ် ။

ငါးရှဥ့်တစ်ပိဿာကို ၁၉၀၀၀ ကျပ်သည်  ငါးရှဥ့်ဒိုင်တွေက ဝယ်ယူတဲ့ စျေးနှုန်းဖြစ်ကြောင်း သိရှိရပြီး လက်လီစျေးကွက်မှုတော့ တစ်ပိဿာကို ၂၅၀၀၀ ကျပ်မှ ၃၅၀၀၀ ကျပ်လောက်အထိ ဈေးရှိတယ်လို့ သိရပါတယ်။

" ဒိုင်က အိမ်လာသိမ်းတာ ၁၉၀၀၀ စျေးပဲရတယ်။ လက်လီဆိုရင် ၂၅၀၀၀ ရောင်းတယ်။ လက်လီက သိပ်တော့မရောင်းဖြစ်ပါဘူး။ ဒိုင်ကိုရောင်းတာက တခါတည်းပြီးရောလေ။ ငါးရှဥ့်တွေ ရတာမကြာသေးဘူး။ ဆည်ရေရတော့မှ ငါးရှဥ့်ကလည်းရတာ။ ညဘက်ကို ငါးရှဥ့်ဖမ်းတာပါ" လို့ ပြည်မြို့နယ်ရှိ ငါးရှဥ့်ဖမ်းသူ တစ်ဦးက ပြောပါတယ်။

ငါးရှဥ့်ဖမ်းတဲ့သူတွေဟာ ဘတ္ထရီလျှော့တိုက်ပြီး ဖမ်းဆီးကြတာဖြစ်ကြောင်း ၊ ဘတ္ထရီရှော့ တိုက်ပြီးငါးရှဥ့်ဖမ်းတဲ့နည်းဟာ အခန့်မသင့်ပါက လူကို အသက်အန္တရာယ်ဖြစ်ပွားစေတဲ့အထိ ထိခိုက်နိုင်မှန်း သိရှိပေမယ့်လည်း မိသားစုစားဝတ်နေရေးအတွက် လုပ်ကိုင်နေကြရတာ ဖြစ်တယ်လို့ သိရပါတယ်။

"ဘတ္ထရီနဲ့ ရှော့တိုက်ဖမ်းရတာ အသက်အန္တရာယ်တောင်ရှိနိုင်တာ သိပါတယ်။ ဒါပေမယ့် မိသားစုနဲ့ အိုးမကွာ အိမ်မကွာ လုပ်လို့ရတဲ့ စီးပွားရေး က ဒါပဲရှိတယ်။ တစ်ညကို ၂ ပိဿာလောက်ရရင် အဆင်ပြေတယ်လေ။ အရင်ကတော့ ငါးဖမ်းတာပေါ့။အခုက ငါးရှဥ့်ရာသီချိန်လေ  လို့ ငါးရှဥ့်ဖမ်းသူ ကိုဟိန်းက ပြောပါတယ်။

ငါးရှဥ့်ဖမ်းသူတွေအနေနဲ့ ညဘက်မှာသာ အဓိကလုပ်ကိုင်ကြပြီး တစ်ညကို ငါးရှဥ့် ၁ ပိဿာ ၅၀ မှ ၂ ပိဿာလောက် ရရှိတယ်လို့ သိရပါတယ်။ ငါးရှဥ့်အပါအဝင် ရေထွက်ပစ္စည်းတွေကို ဘတ္ထရီရှော့တိုက်ပြီး ဖမ်းဆီးခြင်းကရေထွက်ပစ္စည်းတွေကို မျိူးတုန်းနိုင်စေတဲ့အပြင် လူကိုပါ အန္တရာယ်ရှိစေတာကြောင့် အဆိုပါ နည်းလမ်းကို အသုံးမပြုရန် သက်ဆိုင်ရာ တာဝန်ရှိသူတွေ တားဆီးထားပါတယ်။

AMIA (ဈေးကွက်နှင့် သတင်းအေဂျင်စီ)မှ အစိမ်းရောင်လမ်းဆော့ဝဲသို့ ပေးပို့ထားသော အစိမ်းရောင်လမ်း၏ မူပိုင်ဆောင်းပါးဖြစ်သဖြင့် ဆောင်းပါးများ၊ သတင်းများ ကူးယူဖော်ပြလိုပါက “အစိမ်းရောင်လမ်းမှ ကူးယူဖော်ပြပါသည်ဟု” ထည့်ပေးပါရန် မေတ္တာရပ်ခံအပ်ပါသည်။