စားအုန်းဆီ အခြေခံလက်ကားရည်ညွှန်းဈေးနှုန်း (ရန်ကုန်အထိုင်ဈေး) ကျဆင်းလာသော်လည်း ပြင်ပစားအုန်းဆီဈေးကွက်တွင်မူ တစ်ပိဿာလျှင် ကျပ် ၁၈,၀၀၀ နှုန်းခန့်အထိ မြင့်တက်လာနေကြောင်း သိရသည်။

ဇူလိုင်လ ၂ ရက်နေ့မှ ၉ ရက်နေ့အထိ စားသုံးသူတင်သွင်းသိုလှောင်ဖြန့်ဖြူးခြင်း လုပ်ငန်းကြီးကြပ်ရေးကော်မတီမှ ကြေညာထားသည့် စားအုန်းဆီ အခြေခံလက်ကားရည်ညွှန်းဈေးနှုန်းမှာ တစ်ပိဿာလျှင် ကျပ် ၇,၂၈၅ သာရှိကြောင်း သိရသည်။

ပြီးခဲ့သည့် ဇွန်လပထမပတ်အတွင်း ရည်ညွှန်းဈေးနှုန်းအနေဖြင့် စားအုန်းဆီ တစ်ပိဿာလျှင် ကျပ် ၇,၃၅၄ အထိ ရှိခဲ့သည့်အတွက် တစ်လကျော်ကာလအတွင်း စားအုန်းဆီရည်ညွှန်းဈေးနှုန်းမှာ တစ်ပိဿာလျှင် ကျပ် ၇၀ ဝန်းကျင် ကျဆင်းခဲ့ခြင်း ဖြစ်ကြောင်း သိရသည်။

ရည်ညွှန်းဈေးနှုန်း ကျဆင်းသော်လည်း ပြင်ပဈေးကွက်တွင်မူ ယခင်ဇွန်လက စားအုန်းဆီ ၁၀ ပိဿာတစ်ပုံးလျှင် ကျပ် ၁၂၀,၀၀၀ ဝန်းကျင်ရှိရာမှ၊ လက်ရှိဇူလိုင်လတွင် ကျပ် ၁၇၀,၀၀၀ မှ ကျပ် ၁၈၀,၀၀၀အတွင်းအထိ မြင့်တက်လာခြင်း ဖြစ်သည်။

"အစိုးရက စားအုန်းဆီခွဲတမ်း လျှော့ချလိုက်ပြီး ပြည်တွင်းမှာ ဆီပိုထုတ်နိုင်အောင် လုပ်နေတဲ့ စပ်ကူးမတ်ကူးကာလဆိုတော့ ဈေးက တက်နေတာပါ။ မကြာခင် ပြန်ကျနိုင်ပါတယ်။ ကျွန်တော်တို့လည်း ဆီတွေ ပိုထုတ်နိုင်အောင် လုပ်နေပါတယ်" ဟု မြန်မာနိုင်ငံ ဆီစက်ပိုင်ရှင်တစ်ဦးက ပြောကြားသည်။

ပြည်ပမှ စားအုန်းဆီ တင်သွင်းမှုကို လျှော့ချလိုက်သည့်အတွက် ပြည်တွင်းတွင်လည်း စားအုန်းဆီ ခွဲတမ်းဖြန့်ဖြူးမှု လျော့ကျသွားသဖြင့် စားအုန်းဆီ လိုအပ်ချက်ရှိလာပြီး ဈေးနှုန်းမြင့်တက်လာခြင်းဖြစ်ကြောင်း သိရသည်။

စားအုန်းဆီခွဲတမ်း ဖြန့်ဖြူးပေးမှု လျော့နည်းသွားခြင်းကြောင့် လက်ရှိပြင်ပဈေးကွက်တွင် စားအုန်းဆီ ဝယ်ယူရန် ခက်ခဲလာသည့်အပြင် ဈေးနှုန်းသည်လည်း နေရာဒေသအလိုက် အသီးသီး မြင့်တက်လာခြင်း ဖြစ်ကြောင်း သိရသည်။

"အစိုးရက စားအုန်းဆီကို ခွဲတမ်းလျှော့ချပြီး ဖြန့်တယ်ဆိုတာနဲ့ အပြင်ဈေးက ချက်ချင်းတက်တာ။ အခုဆို ကျပ် ၁၈,၀၀၀ လောက် ဈေးခေါ်ကြတယ်။ အခြေခံလူတန်းစားတွေအတွက်က အစိုးရရောင်းဈေးလေးနဲ့ ဝယ်လို့ရရင် နည်းနည်းတော့ ဖြေသာသေးတာပေါ့" ဟု စားသုံးသူ ပြည်သူတစ်ဦးက ပြောကြားသည်။

ပြည်တွင်းစားသုံးဆီကဏ္ဍတွင် နှစ်စဉ်ဆီလိုအပ်ချက် ရှိနေသည့်အတွက် ပြည်ပနိုင်ငံများဖြစ်သည့် မလေးရှားနိုင်ငံနှင့် အင်ဒိုနီးရှားနိုင်ငံတို့မှ စားအုန်းဆီ တန်ချိန်သိန်းနှင့်ချီ၍ နှစ်စဉ်တင်သွင်းနေရဆဲ ဖြစ်သည်။

ဆီခွဲတမ်းများ ဖြန့်ဖြူးပေးရာတွင် စားသုံးသူတင်သွင်းသိုလှောင်ဖြန့်ဖြူးခြင်း လုပ်ငန်းကြီးကြပ်ရေးကော်မတီမှ ထုတ်ပြန်သည့် ရည်ညွှန်းဈေးအပေါ် သယ်ယူပို့ဆောင်ရေးကုန်ကျစရိတ် ပေါင်းစပ်ပြီး နှုန်းထားဖြင့် ပြည်သူနှင့် လုပ်ငန်းသုံးသမားများကို ခွဲဝေပေးခြင်းဖြစ်သော်လည်း လက်ရှိတွင်မူ ဆီခွဲတမ်းရရှိမှု လျော့ကျသွားသောကြောင့် ပြင်ပကနေ ဝယ်ယူသုံးစွဲနေရကြောင်း သိရသည်။

ထို့ကြောင့် လက်ရှိတွင် စားအုန်းဆီ တင်သွင်းမှုကို လျှော့ချလိုက်သည့်အတွက် လုပ်ငန်းသုံးသမားများလည်း စားအုန်းဆီ ရရှိမှုနည်းသွားပြီး ပြည်သူများလည်း ပြင်ပမှ ဝယ်ယူသုံးစွဲနေကြရကြောင်း သိရသည်။

AMIA (ဈေးကွက်နှင့် သတင်းအေဂျင်စီ)မှ အစိမ်းရောင်လမ်းဆော့ဝဲသို့ ပေးပို့ထားသော အစိမ်းရောင်လမ်း၏ မူပိုင်ဆောင်းပါးဖြစ်သဖြင့် ဆောင်းပါးများ၊ သတင်းများ ကူးယူဖော်ပြလိုပါက “အစိမ်းရောင်လမ်းမှ ကူးယူဖော်ပြပါသည်ဟု” ထည့်ပေးပါရန် မေတ္တာရပ်ခံအပ်ပါသည်။