ပြည်တွင်းမွေးမြူရေးကဏ္ဍတွင် ခိုင်းနွားဝယ်လိုအား ပြန်လည်ရှိလာပြီး ဈေးကွက်အတွင်း ဈေးနှုန်းများ မြင့်တက်လာနေကြောင်း နွားဝယ်ရောင်းလုပ်ကိုင်သူများထံမှ သိရသည်။ လက်ရှိဖြစ်ပေါ်နေသည့် စက်သုံးဆီဈေးနှုန်း မြင့်တက်လာမှုများကြောင့် လယ်ယာစိုက်ပျိုးရေးကဏ္ဍတွင် ထွန်စက်ငှားရမ်းအသုံးပြုခြင်းအစား ခိုင်းနွားများကို ပြန်လည်ဝယ်ယူကာ လယ်ယာလုပ်ငန်းခွင်၌ အသုံးပြုရန် စီစဉ်လာကြခြင်းဖြစ်သည်။ ထိုသို့ ခိုင်းနွားဝယ်လိုအား သိသိသာသာ ရှိလာသော်လည်း ရောင်းလိုအား နည်းပါးနေသည့်အတွက် ဈေးကွက်အတွင်း ဈေးနှုန်းများ မြင့်တက်လာခြင်းဖြစ်ကြောင်း သိရသည်။

"ထွန်စက်မမောင်းတော့ဘူး။ အဲဒါမောင်းမယ့်အစား နွားပဲ ဝယ်တော့မယ်။ လယ် ၁၀ ဧကဆိုရင် စက်မောင်းခက အနည်းဆုံး ၁၅ သိန်းလောက် ရှိနေတယ်။ ဒီတော့ ကိုယ့်ဘာသာ နွားဝယ်ပြီး လယ်လုပ်မယ့်သူ များလာပြီး နွားဈေးကွက် မြောက်လာတာပါ" ဟု တောင်သူတစ်ဦးက ပြောကြားသည်။

ယခင်လများက ခိုင်းနွားတစ်ကောင်လျှင် အနည်းဆုံး ကျပ် ၁၆ သိန်းဝန်းကျင်မှစ၍ အရောင်းအဝယ်ရှိခဲ့သော်လည်း လက်ရှိတွင် ခိုင်းနွားတစ်ကောင်လျှင် ကျပ်သိန်း ၂၀ အထက် ဈေးတန်းသို့ ရောက်ရှိလာခြင်းဖြစ်သည်။ 

ယခုကာလတွင် လယ်ယာစိုက်ပျိုးရေးအတွက် ခိုင်းနွားလိုအပ်ချက် မြင့်မားနေသော်လည်း ဝယ်လိုအားနှင့် ရောင်းလိုအား မမျှတသည့်အတွက် ဈေးနှုန်းအမျိုးမျိုးဖြင့် အရောင်းအဝယ် ဖြစ်နေကြောင်း သိရသည်။

"အခုက အရင်လို ခိုင်းနွားက သိပ်မရှိဘူး။ ချက်ချင်းခိုင်းလို့ရတဲ့ နွားနှစ်ကောင်တစ်စုံ ရဖို့က သိပ်မလွယ်ဘူး။ အဲဒီတော့ ဝယ်ချင်သူကများပြီး ရောင်းမယ့်သူက နည်းနေတာ။ ဒါကြောင့် ဈေးကလည်း ရောင်းသူခေါ်ဈေးအပေါ်မှာပဲ လိုက်ပြီး ညှိဝယ်နေရတာ" ဟု ပဲခူးတိုင်းဒေသကြီးမှ ခိုင်းနွားဝယ်ရောင်းလုပ်ကိုင်သူ ပွဲစားကိုတင်ဝင်းလှိုင်က ဆိုသည်။

ယခင်က လယ်ယာစိုက်ပျိုးရေးလုပ်ကိုင်သူတိုင်း ခိုင်းနွားမွေးမြူပြီး လုပ်ငန်းခွင်၌ ပြန်လည်အသုံးပြုလေ့ရှိသော်လည်း နောက်ပိုင်းတွင် စက်မှုလယ်ယာစနစ်သို့ ကူးပြောင်းလာကြသည့်အတွက် ခိုင်းနွားမွေးမြူသူ အလွန်နည်းပါးသွားခဲ့ခြင်း ဖြစ်သည်။ 

လက်ရှိတွင် ခိုင်းနွားဈေးကွက် မြင့်တက်လာသကဲ့သို့ အသားဈေးကွက်တွင်လည်း အမဲသားဈေးနှုန်းများ မြင့်တက်နေသည့် အခြေအနေရှိကြောင်း သိရှိရပါသည်။

ဆောင်းပါးရှင်ဆရာမှ အစိမ်းရောင်လမ်းဆော့ဝဲသို့ ပေးပို့ထားသော အစိမ်းရောင်လမ်း၏ မူပိုင်ဆောင်းပါးဖြစ်သဖြင့် ဆောင်းပါးများ၊ သတင်းများ ကူးယူဖော်ပြလိုပါက “အစိမ်းရောင်လမ်းမှ ကူးယူဖော်ပြပါသည်ဟု” ထည့်ပေးပါရန် မေတ္တာရပ်ခံအပ်ပါသည်။