စပါးဆစ်ပိုး ကျရောက်ပုံနှင့်ဖျက်ဆီးမှုလက္ခဏာ ကာကွယ်ရမည့်အချက်အလက်များကို ဖြေကြားပေးစေချင်ပါသည်။ လေးစားစွာဖြင့်

စပါးပင်ကြီးထွားချိန်မှာ ကျရင်ဆစ်ပိုးကောင်က စပါးပင်စည်အတွင်းမှနေပြီးတော့ စားသောက်ဖျက်ဆီးတတ်တာကြောင့် စပါးပင်စည်ပုပ် (သို့) အူပုပ်လက္ခဏာဖြစ်တတ်ပါတယ်။ အူပုပ်က ဘက်တီးရီးယားပင်ခြေပုပ်ရောဂါနဲ့ပုံစံဆင်ပေမယ့်ဆစ်ပိုးကျတဲ့အခါမှာတော့ ပိုးကိုက်ရာ၊ ပင်စည်တွင် ဆစ်ပိုးကောင်ဝင်တဲ့ အပေါက်တွေတွေ့နိုင်ပါတယ်။ ခေါင်ညွှန့်သေ(Dead heart)လက္ခဏာ၊ အနှံထွက်ချိန် ဆစ်ပိုးကျမယ်ဆိုရင်တော့ အနှံဖြူသည့် လက္ခဏာ(White Head)တို့ ကျရောက်တတ်ပါတယ်။ ကာကွယ်နှိမ်နင်းနည်း ၁.ကန်သင်းနဲ့စိုက်ခင်းအတွင်း ပေါင်းမြက်ကင်းရှင်းအောင်ထားပါ။ ၂.ဆစ်ပိုးကျရောက်ဖူးတဲ့အခင်းကရိုးပြတ်နဲ့ကောက်ရိုးများကိုမီးရှို့ဖျက်စီးပါ။ ၃.ထယ်ရေးနက်နက်ထိုးပါ။ ၄။ဖျူရာဒမ် ၃ဂျီကိုတစ်ဧကလျှင် ၃-၅ကီလိုခန့်ထည့်ပေးပါ။ပျိုးခင်းမှပင်ပွားစည်းချိန်အထိဆစ်ပိုးကျရောက်မှုကိုကာကွယ်ပေးနိုင်ပါတယ်။ ၅။ပုလဲမြေသြဇာကိုလိုအပ်တာထက်ပိုမသုံးပါနဲ့ ၆။အခင်းထဲတွင် ဆစ်ပိုးဥမြုံများတွေ့ပါက ဥမြုံရှိသောအစိတ်အပိုင်းများအား ဖျက်ဆီးပါ။ ၇။ အပင်ပွားချိန်တွင် အူပုပ်လက္ခဏာတွေ့ပါက ရေထုတ်ပေးခြင်းဖြင့် ဆစ်ပိုးကျရောက်မှုမှ ကာကွယ်ပါ။ ၈။တစ်ကွင်းတည်းတဆက်ဆည်း စိုက်ကွင်းများတွင် မီးထောင်ခြောက်များထွန်းပါ။ ၉။ပိုတတ်မြေသြဇာကိုပုံမှန်ထည့်ပေးပါ။ မိတ်ဆွေပိုးများဖြစ်တဲ့ပင့်ကူ၊ ပုဇဉ်း၊ လိပ်ခုံးကျိုင်း၊ငှက်နှင့် နကျယ်ကပ်ပါးကောင်များအားထိန်းသိမ်းပေးပါ။