အမေးအဖြေ

ရေပြတ်ပြီး ညှိုးနေသော ခရမ်းချဉ်စိုက်ခင်းသည် မိုးရေဝဝလင်လင် ရရှိလိုက်သဖြင့် တောင်သူအတွက် အလွန်ဝမ်းသာစရာ သတင်းဖြစ်ပါတယ်။ သို့သော်လည်း စိုက်ပျိုးရေးပညာအရ ရေပြတ်လွတ်ပြီးမှ မိုးရုတ်တရက် သည်းထန်စွာရွာပါက အပင်က ရေကို အလွန်အမင်း စုပ်ယူသဖြင့် အသီးများ ကွဲထွက်ကုန်ခြင်းတို့ ဖြစ်ပွားတတ်ပါတယ်။ အသီးခွံခိုင်မာပြီး ရောဂါဒဏ်ခံနိုင်ရန် ကယ်လ်ဆီယမ်-ဘိုရွန် (Calcium-Boron) ဆေး ကြိုတင်ပက်ဖျန်းပေးရန် အရေးကြီးပါတယ်။ရောဂါကျမကျအမြဲစောင့်ကြည့်ပါ၊ အပင် ခြေရေဝပ်သည်အထိမိုးရွာခဲ့မယ်ဆိုရင်တော့ မြောင်းဖော်ပေးရန်လည်းလိုအပ်ပါတယ်။

ဝက်ကြွတ်ပင် နဲ့ ကနဖော့ ပင်တွေပါ။ပေါင်းပင်တွေဖြစ်လို့၊ရှင်းပစ်ရမှာပါ။မြေဆွေးကန်ထဲသာ ထည့်လိုက်ပါဗျာ။

ဝက်မတစ်ကောင် သားစပ်ပြီးနောက် ကိုယ်ဝန် (ဇီး) အောင်၊ မအောင် သိနိုင်မယ့် အဓိကနည်းလမ်း (၃) မျိုး ရှိပါတယ်။ ပထမနည်းလမ်းကတော့ ငွေကုန်ကြေးကျမရှိဘဲ သဘာဝအမူအရာကို စောင့်ကြည့်ခြင်း ဖြစ်ပြီး၊ သားစပ်ပြီး ၂၁ ရက်ဝန်းကျင်မှာ ဝက်မက အထီးနောက် ပြန်မလိုက်ဘဲ ငြိမ်နေရင် ဇီးတင်ဖို့ ရာခိုင်နှုန်း များနေပါပြီ။ ဒုတိယနည်းလမ်းကတော့ အသေချာဆုံးနှင့် အမြန်ဆုံးနည်းဖြစ်တဲ့ ဝက်ဇီးစမ်းစက် (Ultrasound) ကို သုံးပြီး သားစပ်ပြီး ၂၁ ရက်ကနေ ရက် ၃၀ အတွင်း သားအိမ်ထဲက သန္ဓေသားပုံရိပ် သို့မဟုတ် အသံလှိုင်းကို စမ်းသပ်ခြင်း ဖြစ်ပါတယ်။ တတိယနည်းလမ်းအနေနဲ့ သားစပ်ပြီး ၂၃ ရက်ကနေ ရက် ၃၀ အတွင်း ဝက်မရဲ့ ဆီးကို ခံယူပြီး ဝက်သီးသန့်သုံး ဇီးစစ်ဆီးစက္ကူ (Pregnancy Test Strip) နဲ့ စစ်ဆေးနိုင်ပါတယ်။ တောင်သူများအနေနဲ့ သားစပ်ပြီး ၁ လကျော်၊ ၂ လနီးပါးမှာ နို့သီးခေါင်းလေးတွေ ပန်းရောင်သန်းလာခြင်းနဲ့ ၂ လခွဲကျော်မှာ ဗိုက်လုံးဝန်း တွဲကျလာခြင်းတို့ကို ကြည့်ပြီးတော့လည်း ဇီးရှိကြောင်း အပြင်ပန်းအားဖြင့် အတည်ပြုနိုင်ပါတယ်ဗျာ။

မတ်ပဲခုတ်ဖုံးကြဲပြီး ၆ ရက်မြောက်နေ့မှာမိုးရွာသော်လည်း ပဲစေ့များ အစိုဓာတ်မရဘဲ မြေကြီးထဲတွင် အကောင်းအတိုင်း ရှိနေပါက ပြန်လည်အပင်ပေါက်နိုင်ခြေ ရှိပါ သေးတယ်။ သို့သော် ရက်ကြာသွားသည့်အတွက် ပိုးမွှားနှင့် အပူရှိန်ကြောင့် အပင်ပေါက်နှုန်း အနည်းငယ် လျော့နည်းသွားနိုင်သလို၊ မိုးရွာပြီးနောက် နေပြင်းပါက မြေကျပ်၍ အပင်ရုန်းမထွက်နိုင်ခြင်းမျိုး ဖြစ်တတ်ပါတယ်။ ထို့ကြောင့် မိုးရွာပြီး ၃ ရက်မှ ၅ ရက်အထိ အပင်ပေါက် အခြေအနေကို စောင့်ကြည့်ပေးပါ၊ အပင်ပေါက် မညီပါက ပဲစေ့အသစ်ဖြင့် အမြန်ဆုံး ဖာထေးစိုက်ပျိုးရန်နှင့် ရေမဝပ်စေရန် ရေနုတ်မြောင်းများ ပြင်ဆင်ထားရန် အကြံပြုပါရစေ။

မကွေးတိုင်း၊ ချောက်မြို့နယ်၏ အောက်တိုဘာလ (October) အတွင်း မိုးလေဝသခန့်မှန်းချက်အရ မိုးရွာသွန်းနိုင်ခြေ အလွန်နည်းပါးနေပါတယ်။ အောက်တိုဘာလလယ်နှင့် လကုန်ပိုင်းအထိ နေ့အပူချိန်သည် ၃၄ ဒီဂရီစင်တီဂရိတ်မှ ၃၇ ဒီဂရီစင်တီဂရိတ်အထိ ပြင်းထန်ပြီး တိမ်အသင့်အတင့်သာရှိကာ ပူပြင်းခြောက်သွေ့သော ရာသီဥတု ဖြစ်ပါလိမ့်မယ်လို့ ခန့်မှန်းရရှိထားပါတယ်။ ထို့ကြောင့် မိုးရွာချပေးမည့်အခြေအနေကို စောင့်ဆိုင်း၍မရဘဲ စိုက်ခင်းအတွင်း ကိုယ်တိုင်ရေသွင်းပေးရန် မဖြစ်မနေလိုအပ်နေပါတယ်။ ခရမ်းချဉ်ပင်များ ရေငတ်ခြင်းကြောင့် အပင်ညှိုးနွမ်းကာ အသီးများကြီးမလာဘဲ တန့်နေသည့် အစိုဓာတ်ပြတ်ခြင်း(Moisture Stress) ပြဿနာကို ဖြေရှင်းရန်အတွက် ရေကို တစ်ပြိုင်နက်တည်း အလွန်အကျွံ မလောင်းဘဲ နံနက်အစောပိုင်း သို့မဟုတ် ညနေပိုင်း အေးမြချိန်တွင် အနည်းငယ်စီဖြင့် ခွဲ၍ ပုံမှန်အစိုဓာတ်ရရုံ လောင်းပေးရပါမယ်။ ၎င်းအပြင် အပင်ခြေကို ကောက်ရိုးဖြင့် ဖုံးအုပ်ပေးခြင်းက မြေဆီလွှာအစိုဓာတ်ကို ကြာရှည်ထိန်းထားပေးနိုင်ပြီး အသီးများ ပြန်လည်ကြီးထွားလာစေရန် ကူညီပေးပါလိမ့်မယ်။

တောင်ထိပ်ပေါက် ဝါးဆစ်ပိတ်ပင်များကို ပိုးမထိုးဘဲ အကြမ်းခံစေရန်အတွက် ရေဓာတ်နှင့် သကြားဓာတ် အနည်းဆုံးဖြစ်သည့် ဆောင်းရာသီ (နိုဝင်ဘာမှ ဇန်နဝါရီလအတွင်း) တွင် ခုတ်ယူရပါမည်။ မိုးရာသီတွင် ဝါးပင်ကြီးထွားချိန်ဖြစ်ပြီး ရေဓာတ်မြင့်မားသဖြင့် မိုးတွင်းခုတ်ပါက ပိုးအလွယ်တကူ ထိုးတတ်သောကြောင့် လုံးဝမခုတ်သင့်ပါ။ ရေရှားပါး၍ ရေစိမ်ရန် အဆင်မပြေပါက ခုတ်ပြီးပြီးချင်း အကိုင်းအခက်နှင့် အရွက်များကို မဖြတ်ဘဲ၊ ဝါးအရင်းကို မြေကြီးနှင့်မထိအောင် ကျောက်ခဲ သို့မဟုတ် သစ်တုံးပေါ်တင်ကာ ဝါးရုံအနားမှာပင် ၁ လမှ ၁ လခွဲခန့် မတ်မတ်ထောင်၍ အခြောက်ခံရပါမည် (Clump Curing)။ ဤသို့ပြုလုပ်ခြင်းဖြင့် အရွက်များက ဝါးလုံးထဲက အစိုဓာတ်ကို စုပ်ယူခြောက်သွေ့သွားစေပါသည်။ ထို့နောက်မှ အကိုင်းများကိုရှင်းကာ လေဝင်လေထွက်ကောင်းပြီး မိုးလွတ်သော အရိပ်အောက်တွင် စနစ်တကျ ရွှေ့ပြောင်းသိမ်းဆည်းရပါမည်။