မြေဆွေးပုံထဲ EM. နဲ့ရောထည့်ရန်ငါးအမိုင်နိုလုပ်ပါသည်။

သဘာဝရွက်ဖျန်းအားဆေးများအနက် သဘောအကျဆုံးမှာ ငါးအမိုင်နိုအက်ဆစ်ဖြစ်သည်။ တောင်သူများထံ နည်းပညာပေးရန်ရောက်ရှိတိုင်း ငါးအမိုင်နိုအက်ဆစ်ရွက်ဖျန်းအားဆေး (Fish Amino Acid, FAA) ၏ အကျိုးရှိပုံများအား ပြန်ကြားရသလို၊ VFRDC တွင် ဆောင်ရွက်ခဲ့သည် သုတေသနများနှင့် မိမိကြီးကြပ်ခဲ့သည် မဟာသိပ္ပံနှင့် Post Doc ကျောင်းသားများ၏ သုတေသနရလဒ်များအရ FAA ၏ အပင်ဖွံ့ဖြိုးမှုအပေါ် အကျိုးသက်ရောက်မှုများစွာရှိကြောင်း တွေ့ရှိရပါသည်။ အော်ဂဲနစ်သမားများ တွင်ကျယ်စွာအသုံးပြုနေကြသည့် ရွက်ဖျန်းအားဆေးတစ်ခုလည်းဖြစ်သည်။ သတ္တဝါများကဲ့သို့ အပင်များသည်လည်း အမိုင်နိုအက်ဆစ်ကိုလိုအပ်သည်။ ပရိုတင်းများတည်ဆောက်ရန် အခြေခံဖြစ်သော်လည်း၊ အပင်များ၏ အမိုင်နိုအက်ဆစ်ထုတ်လုပ်မှုသည် နည်းပါးလေ့ရှိပြီး၊ အလုံအလောက်မရရှိလျှင် အပင်ကြီးထွားမှု၊ ပန်းပွင့်မှုနှင့် အထွက်နှုန်းကို ထိခိုက်နိုင်သည်။ ဥပမာ အမိုင်နိုအက်ဆစ်နှင့် ဆက်စပ်နေသည့် indole နှင့် pyrrol compounds များအား အပင်များ၏လိုအပ်ချက်မှာ အနည်းငယ်သာဖြစ်သော်လည်း လုံးဝမရရှိလျှင် သီးနှံဖွံ့ဖြိုးမှုနှင့် အထွက်နှုန်းကျဆင်းတတ်၏။ အပင်များအတွက်အဓိကလိုအပ်သည့် နိုက်ထရိုဂျင်ကဲ့သို့ အာဟာရများသာမက၊ ဖော့စဖရက်နှင့် ပိုတက်စီယမ်များ၊ ကြီးထွားမှုလှုံ့ဆော်သည့်ဓာတ်များပါ ငါးအမိုင်နိုအက်ဆစ်တွင်ပါဝင်သည်။ FAA ပြုလုပ်သည့်ငါးအမျိုးအစားအလိုက်အာဟာရဓာတ်များပါဝင်မှုကွာခြားနိုင်သော်လည်း protein, vitamins, amino acids, docosahexaenoic acid (DHA) နှင့် eicosapentaenoic acid (EPA) ကဲ့သို့သော essential fatty acids များ ပါဝင်လေ့ရှိသည်။ အမိုင်နိုအက်ဆစ်များသည် phytohormone များနှင့် အပင်ကြီးထွားစေသည့်ပစ္စည်းများ၏ ရှေ့ပြေးများဖြစ်သည်။ ဥပမာဆိုရလျှင် Tryptophan သည် Auxin ဖြစ်ပေါ်ရန် ရှေ့ပြေးဖြစ်သကဲ့သို့ Methionine သည် ethylene ၏ ရှေ့ပြေးဖြစ်သည်။ ထို့ပြင် အပင်များအား အမိုင်နိုအက်ဆစ်များပက်ဖျန်းပေးခြင်းဖြင့် auxins,gibberellins နှင့် cytokinins များ၊ အပင်ကြီးထွားလာချိန်တွင် ABA နှင့် ethylene ကဲ့သို့သော ဟော်မုန်းနှင့် PGRs များကို တိုးလာစေသည်။ FAA အား အရွက်မျက်နှာပြင်မှ စုပ်ယူနိုင်သဖြင့် ရွက်ဖျန်းအားဆေးအဖြစ်လည်းကောင်း၊ မြေဆီသြဇာတိုးတတ်စေ၍ အဏုဇီဝများပွားများလာစေရန်အတွက် မြေဆီလွှာအတွင်း ထည့်သွင်းပေးခြင်းဖြင့်လည်းကောင်း အသုံးပြုကြပါသည်။ FAA ပြုလုပ်နည်း ---------------------------------- ၁။ ယေဘူယျအားဖြင့် ငါးနှင့် တင်လဲရည်/ထန်းလျက်/သကြား/သကြားညို ဆတူထည့်လေ့ရှိသည်။ ၂။ ငါးအကောင်ကြီးပါက ခုတ်ထစ်ပါ၊ ငါးသေးငါးနုတ်များ၊ ငါးခေါင်း/အူ/ကလီစာများကိုပါ အသုံးပြုနိုင်သည်။ ၃။ မြေအိုး၊ ကော်ပုံး သို့မဟုတ် ထည့်စရာတစ်ခုခုအတွင်းသို့ ငါးနှင့် ထန်းလျက်/သကြားများကို တစ်ထပ်စီထည့်ပါ။ ၄။ အပေါ်ဆုံးအထပ်သည် ထန်းလျက်/သကြားဖြစ်နေပါစေ။ ၅။ တင်လဲရည်/ထန်းလျက်အရည်အသုံးပြုမည်ဆိုပါက သမအောင်ရောမွှေပေးပါ။ ၆။ အကျိုးပြု EM သို့မဟုတ် ကိုယ်တိုင်ပြုလုပ်သည့် ဒေသခံ IMO ကို ထည့်သွင်းပေးခြင်းဖြင့် ငါးများပြိုကွဲမှုကို မြန်ဆန်စေမည်။ (ပျစ်နေလျှင် ရေကျက်အေးထပ်ထည့်ပေးပါ) ၇။ သတိပြုရမည့်အချက်မှာ အဆိုပါထည့်သွင်းပစ္စည်းများကို အိုး/ခွက်၏ ၃ ပုံ ၂ ပုံခန့်အထိသာ ထည့်၍ ၁/၃ ပုံကို အလွတ်ချန်ပေးခြင်းဖြင့် ဓာတ်ပြုခြင်းကိုမထိခိုက်စေဘဲ၊ လျှံကျခြင်းမှ ကာကွယ်နိုင်သည်။ ၈။ အဖုံးသေချာဖုံး၍ အေးမြပြီးခြောက်သွေ့ပြီး၊ ပုရွက်ဆိတ်မလာနိုင်သောနေရာ၌ ထားရှိပါ။ ၉။ ရက်အနည်းငယ်အတွင်း တင်လဲရည်/ထန်းလျက်/သကြားနှင့် ငါးတို့အကြား (ပျစ်ရာမှကျဲရာသို့ စီးဆင်းခြင်းဖြစ်စဉ်ကြောင့်) ငါးများအရည်အပျော်လာမည်။ အနံ့ဆိုးပျောက်၍ ချိုအီသည့်အနံ့တစ်ခုထွက်လာမည်။ ၁၀။ ငါးအမျိုးအစားနှင့် အသုံးပြုသည့်အစိတ်အပိုင်းအလိုက် (၄၅) ရက်မှ (၉၀)ရက်အတွင်း FAA ကိုရရှိမည်။ ပုပ်နံ့မရှိ၊ စေးကပ်၍ အရောင်ရင့်မှသာ ကောင်းမွန်သည် FAA ဖြစ်သည်။ ၁၁။ အပင်အရွယ်ကိုလိုက်၍ ရေနှင့် ၁း၁၀၀၀ မှစ၍ အချိုးအစားအမျိုးမျိုးပြောင်းလဲသုံးနိုင်သည်။