နွေရာသီရောက်လာပြီဆိုတော့ ဇီးသီးတွေလှိုင်လှိုင်ပေါလာပါပြီ။ ဇီးယိုထိုးစားဖို့လည်း စဥ်းစားမိကြမယ်ထင်ပါတယ်နော်။ ဒါကြောင့် ဇီးယိုပြုလုပ်နည်းလေးကို ရေးသားပေးလိုက်ပါတယ်။

လိုအပ်သောပစ္စည်းများ

ဇီးသီးခြောက် -(၁) ပိဿာ

ထန်းလျှက် - (၅၀- ၈၀) ကျပ်သား

ဆား လက်ဖက်စားဇွန်; -  (၂) ဇွန်း

သို့မဟုတ်

ဇီးသီး - (၅) ပြည်

ထန်းလျှက်  - (၁) ပိဿာခွဲ

မှတ်ချက်။ ။ ဇီးသီးအရသာပေါ်မူတည်၍ ထန်းလျှက်ကို သင့်တော်သလို အသုံးပြုသင့်ပါသည်။

ပြုလုပ်ပုံ

-ထန်းလျှက်ကို ရေနှင့် ညောင်စေးကျအောင် ကျိုပါ။

-ဇီးသီးကို ရေစင်အောင်ဆေးပါ။

-ဇီးသီးကို ရေနှင့် မိနစ် ၂၀ခန့်ပြုတ်ပါ။

-ထို့နောက် ဇီးသီးကိုအနှစ်တိုက်ပြီး ထန်းလျှက်ရည်နှင့်ရော၍ ဆားထည့်ကာ မီးအေးအေးဖြင့်ကျိုပါ။

-မဆလာနှင့်ငရုပ်သီးကို ထည့်လိုပါက မီးပေါ်မှမချမှီ ထည့်ပါ။

-ထို့နောက် အအေးခံကာစားသုံးနိုင်ပါသည်။

နောက်တစ်တနည်းကတော့ ပေါင်မုန့်နဲ့တွဲစားလို့ရတဲ့ ဇီးယိုလုပ်နည်းလေးပါ။

လိုအပ်သောပစ္စည်းများ

ဇီးသီးမှည့်အကြီး - (၃) ပိဿာ

သကြား အဖြူ - (၁) ပိဿာ

မှတ်ချက်။ ။ ဇီးသီးအရသာပေါ်မူတည်၍ သကြားကိုသင့်တော်သလို အသုံးပြုသင့်ပါသည်။

ပြုလုပ်ပုံ

အဆင့် (၁)

ဇီးသီးကိုထက်ခြမ်းခွဲပြီး အစေ့ထုတ်ပါ။ ထိုနောက် ဇလုံထဲတွင် သကြားနှင့်ရောထည့်ပြီး သမအောင်မွှေကာ တစ်နာရီခန့်ထားပါ။

အဆင့် (၂)

ဇလုံထဲရှိ ဇီးသီးများကို အိုးထဲသို့ပြောင်းထည့်ပြီး မီးအေးဖြင့် တည်ပါ။ မကပ်စေရန် မကြာခဏမွှေပေးပါ။ ဆူပွက်လာပါက ၁၀မိနစ်ခန့်ထားရှိပြီး မီးဖိုမှ ချပါ။ ထို့နောက် အခန်းအပူချိန်တွင် အအေးခံပါ။( အိုးထဲတွင်ထား၍ အအေးခံပါ။)

အဆင့် (၃)

အေးသွားပါက အဆင့် (၂)အတိုင်း (၄)ကြိမ်ပြုလုပ်ပေးပါ။ (၄)ကြိမ်မြောက်ပြုလုပ်ရာတွင် ယခင်ကထက် မီးအေးအေးဖြင့် အချိန်ပိုကြာကြာတည်ပြီး အအေးမခံတော့ဘဲ ပုလင်းထဲသို့ တိုက်ရိုက်ထည့်ပါ။ ထို့နောက်ရေခဲသတ္တာတွင် အအေးခံပြီး စားသုံးနိုင်ပါသည်။ ပုလင်းထဲသို့ ဇီးယိုမထည့်မီ ပုလင်းကို ရေနွေးဖြင့်ဆေး၍ အခြောက်ခံထားပါ။

ဖြိုးသဥ္ဇာကျော်

ကိုးကားချက်

https://natashaskitchen.com/plum-jam-recipe-no-peel-no-pectin/

 (ယခုဆောင်းပါးက ဦးကြီးတို့အတွက် အကျိုးတစ်စုံတရာဖြစ်ထွန်းမှု ရှိ /မရှိ ပေါ်မူတည်ပြီး အောက်မှာဖော်ပြပေးထားတဲ့ "အသုံးဝင်ပါတယ်"  "အသုံးမဝင်ပါ" ဆိုတဲ့ စာတန်းလေးကို ရွေးချယ်နှိပ်ပေးဖို့ တောင်းဆိုပါရစေရှင့်)