မိုးနှမ်းပျားရည်ထုတ်လုပ်သည့် ကာလတွင် ပျားမွေးမြူပါက ပျားကောင်ရေတိုးပွားမှုများပြားသဖြင့် ယခုကာလ၌ ပျားမွေးမြူရေးလုပ်ဆောင်သင့်ကြောင်း စီးပွားဖြစ် ပျားမွေးမြူထုတ်လုပ်သူများထံမှ သိရသည်။

ပျားသလက် (Honey Cake) ကို ဆီး(ဇီး) ပျားရည်ထုတ်လုပ်တဲ့ စက်တင်ဘာလလောက်မှာ ထုတ်လုပ်လေ့ ရှိပါတယ်။ ပျားကို ဘယ်အချိန်မဆို မွေးမြူလို့တော့ရပေမယ့်လည်း ဇွန်လကနေ စမွေးတာများပါတယ်။ ဇွန်လနဲ့ ဇူလိုင်လက ပျားမွေးမြူဖို့ အကောင်းဆုံးပါပဲ။ ဇွန်လ၊ ဇူလိုင်လ (မိုးနှမ်း ပျားရည်ထွက်တဲ့ အချိန်တွေက) ပျားကောင်ရေပွားများမှုနှုန်း အများဆုံးမို့လို့ပါ။ အဲ့ဒီကာလမှာ ပျားကောင်ရေ အရမ်းပွားလွယ်လို့ပါ။ ပျားအုံဖွံ့ဖြိုးမှု အားကောင်းတဲ့ကာလပေါ့။

ဟု ပျားသုံးဖော် သဘာဝပျားရည်ရောင်းဝယ်ရေး လုပ်ငန်းမှ စီမံအုပ်ချုပ်သူ ဦးမြင့်နိုင် က ပြောသည်။

    ပျားမွေးမြူခြင်းဖြင့် ကျေးလက်နေပြည်သူများဘဝ တိုးတက်စေရေး ရည်ရွယ်ကာ ပျားမွေးမြူရေးဌာနများမှ “ပြည်သူတိုးတက်ပညာပေး ပျားမွေးမြူရေး” နည်းပညာပေး သင်တန်းများကို တိုင်းဒေသကြီးနှင့် ပြည်နယ်အလိုက် တစ်နှစ်လျှင် လေးကြိမ် ဖွင့်လှစ်ပေးနေပြီး ပုဂ္ဂလိကမွေးမြူသူများ စီးပွားဖြစ်မွေးမြူသည့်အခါ ရောဂါကုသကာကွယ်နိုင်စေရန် ပျားရောဂါကုသကာကွယ်နည်းသင်တန်းကို တစ်နှစ်လျှင် တစ်ကြိမ်၊ ပျားဘုရင်မ သေပါက အစားထိုး ပြန်ထည့်နိုင်ရန် ပျားဘုရင်မမွေးမြူနည်းသင်တန်း၊ ပျားထွက်ပစ္စည်းဖြစ်သည့် Royal Jelly ပျားနို့သင်တန်း၊ ပျားအုံ ကိုင်တွယ်ထိန်းသိမ်းနည်းသင်တန်းများလည်း ဖွင့်လှစ်ပေးနေကြောင်း ပျားလုပ်ငန်းဌာနမှ သိရသည်။

ပျားမွေးမြူလိုသူတွေအနေနဲ့ ပျားအုံတွေကို ပျားမွေးရေးလုပ်ငန်းဌာနတွေမှာလည်း ဝယ်ယူမွေးမြူလို့ရသလို ပုဂ္ဂလိကလုပ်ငန်းရှင်တွေဆီကလည်း ဝယ်ယူမွေးမြူလို့ရပါတယ်။

ဟု ပျားမွေးမြူရေးလုပ်ကိုင်နေသူ တစ်ဦးက ပြောသည်။

    ပျားပုံး၊ ပျားသလပ်အခြောက်၊ ပျားအကောင်၊ ပျားအထီးနှင့် လုပ်သားပျားများအပါအဝင် တစ်ပေကိုးလက်မအရွယ် ပျားပုံးတစ်ပုံးကို တစ်နှစ်လျှင် ပေါင် ၅၀ (၁၃ ပိဿာဝန်းကျင်) ပျားရည်ထုတ်လုပ်နိုင်ကြောင်း သိရသည်။

(ဆောင်းပါးများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ကို ထည့်ပေးရန် မေတ္တာရပ်ခံအပ်ပါသည်)