အစိမ်းရောင်လမ်းဆော့ဝဲအတွင်း စိုက်ပျိုးရေးသွင်းအားစုများ ကြော်ငြာခြင်းနှင့် ရောင်းချခြင်းဆိုင်ရာ အသိပေးထုတ်ပြန်ချက်

အစိမ်းရောင်လမ်းဆော့ဝဲ အသုံးပြုသူများခင်ဗျား -

မကြာမီ ရက်ပိုင်းအတွင်း အစိမ်းရောင်လမ်းဆော့ဝဲပေါ်တွင် တရားဝင်မှတ်ပုံတင်ထားခြင်းမရှိသော စိုက်ပျိုးရေးသွင်းအားစုပစ္စည်းများကို နည်းလမ်းမမှန်ကန်သော ပုံစံများဖြင့် လာရောက်ကြော်ငြာနေကြသည်ကို စိစစ်တွေ့ရှိရခြင်းနှင့်အတူ အသုံးပြုသူအချို့မှ အနှောက်အယှက်ဖြစ်ကြောင်း အကြောင်းကြားလာပါသဖြင့်

သွင်းအားစုရောင်းချသူများနှင့် အသုံးပြုသူများအားလုံး သိရှိလိုက်နာနိုင်ရန်အတွက် အောက်ပါစည်းကမ်းချက်များကို ထုတ်ပြန်အသိပေးအပ်ပါသည်။

၁။ သွင်းအားစုများကို အမေးအဖြေကဏ္ဍတွင် ကြော်ငြာခွင့်မပြုခြင်း

အစိမ်းရောင်လမ်း၏ စည်းမျဉ်းစည်းကမ်းအရ အမေးအဖြေကဏ္ဍတွင် စိုက်ပျိုးရေးသွင်းအားစုများကို ကြော်ငြာခွင့် လုံးဝမရှိပါ။

(အမေးအဖြေကဏ္ဍ၌ ကူညီဖြေဆိုပေးနေသော စိုက်ပျိုး၊ မွေးမြူရေးပညာရှင်များကိုလည်း သွင်းအားစုအမှတ်တံဆိပ်တစ်ခုခုကို ကြော်ငြာသဘောမျိုးဖြင့် ရည်ရွယ်ဖြေဆိုခြင်းများအား  ခွင့်ပြုမပေးထားပါ။)

၂။ တောင်သူ့စိုက်ခင်းမှ ထွက်ရှိသော ထွက်ကုန်များကိုသာ ပို့စ်တင်ရောင်းချခွင့်ပေးခြင်း

တောင်သူများ၏ သီးနှံနှင့် မွေးမြူရေးထုတ်ကုန်များကို "ဈေးတန်းကြီး" ကဏ္ဍတွင် အရောင်းအဝယ်အဖြစ် လွတ်လပ်စွာ အခမဲ့ ပို့စ်တင် ရောင်းချခွင့်ရှိပါသည်။

အကျိုးစီးပွားဆိုင်ရာ စိုက်ပျိုးရေးသွင်းအားစု ပစ္စည်းများဖြစ်ပါက Marketplace တွင် တရားဝင် ဆိုင်ဖွင့်ပြီးမှသာ ရောင်းချရမည်ဖြစ်ပါသည်။ (အဆိုပါ နေရာတွင် တောင်သူများဘက်မှလည်း အဝယ်အမှာစာများ တင်နိုင်ရန် စီစဉ်ပေးထားပါသည်။)

တရားဝင်ဆိုင်ဖွင့်ရောင်းချလိုသော မိတ်ဆွေများအနေဖြင့် အစိမ်းရောင်လမ်းဆော့ဝဲသို့ တရားဝင်မှတ်ပုံတင်ထားသော ပစ္စည်းများဖြစ်ကြောင်း ဆက်သွယ်ပြောပြကာ ဆိုင်ဖွင့်ရမည့်အဆင့်ဆင့်ကို ရယူနိုင်ပါသည်။

၃။ တရားဝင် ကြော်ငြာထည့်သွင်းလိုပါက

မိမိ၏ ကုန်ပစ္စည်းအကြောင်းကို အသုံးပြုသူ တောင်သူများထံ ပိုမိုမြန်ဆန်စွာ ရောက်ရှိသိရှိစေလိုပါက အစိမ်းရောင်လမ်း App တွင် တရားဝင် ကြော်ငြာ (Ads) ထည့်သွင်းနိုင်ပါသည်။

ယင်းအတွက်လည်း အစိမ်းရောင်လမ်း အဖွဲ့သားများထံသို့ တိုက်ရိုက် ဆက်သွယ်စုံစမ်းနိုင်ပါသည်။

ယခုထုတ်ပြန်ချက်ပါ စည်းကမ်းချက်များကို လိုက်နာမှုမရှိဘဲ အစိမ်းရောင်လမ်းပေါ်တွင် အခြား မူမမှန်သော လုပ်ရပ်များဖြင့် ကုန်ပစ္စည်းအကြောင်းများကို ဆက်လက်ရေးသားဖော်ပြကာ တောင်သူများအား ရောင်းချနေမည်ဆိုပါက သက်ဆိုင်ရာပို့စ်များကို ဖျက်ပစ်မည်ဖြစ်ပြီး အကောင့်ပိတ်ပင်ခြင်း (Account Ban) အထိ ပြင်းပြင်းထန်ထန် အရေးယူဆောင်ရွက်သွားမည်ဖြစ်ကြောင်း အသိပေး အကြောင်းကြားအပ်ပါသည်။

အစိမ်းရောင်လမ်း အဖွဲ့သားများ