တောင်သူအကျိုးပြု ဝံပုလွေပင့်ကူ

တောင်သူအကျိုးပြု ဝံပုလွေပင့်ကူ

စိုက်ပျိုးရေးတွင် အထွက်နှုန်းလျော့နည်းစေသော ဖျက်ပိုးများရှိသကဲ့သို့ အကျိုးပြုမိတ်ဆွေပိုးများလည်း ရှိပါတယ်။ ဥပမာ - လိပ်ခုံးကျိုင်း၊ ပုဇဉ်း၊ ပုရွတ်ဆိပ်၊ နဂျယ်၊ ကပ်ပါးနဂျယ်ကောင်များ ( ထရှိင်ဂိုဂရားများ ) ၊ ဝံပုလွေပင့်ကူ စသဖြင့် မိတ်ဆွေပိုးများ စွာရှိသည်။ ယခင်ရာစုနှစ်ကပင် ပိုးသတ်ဆေးများအသုံးပြုလာမှုကြောင့် ပတ်ဝန်းကျင် နှင့် လူသားတို့၏ ကျန်းမားရေးကိုထိခိုက်စေခြင်း၊ မြေဇီလွှာရှိ အာဟာရဒဏ်များဆုံးရှုံး ရခြင်း၊ ရေထုကိုညစ်ညမ်းစေခြင်း၊ ဖျက်ပိုးများသည် ဆေးဒဏ်ကိုခံနိုင်ရည်ရှိလာပြီး အရေအတွက်ပိုမိုများပြားလာခြင်း၊ သီးနှံအရည်အသွေးကျဆင်းခြင်းတို့ ဖြစ်စေသည်။

ထိုကြောင့် စိုက်ပျိုးရေးပညာရှင်များသည် ပိုးသတ်ဆေးလျော့သုံးစေရန် သဘာဝ မိတ်ဆွေပိုးများအသုံးပြု၍ ဖျက်ပိုးများ ကာကွယ်နှိမ်နင်းနိုင်မည့်နည်းလမ်းများကို စမ်းသပ်ပြုလုပ်လာကြသည်။ သဘာဝမိတ်ဆွေပိုးများမှ ဝံပုလွေပင့်ကူ အကြောင်း အနည်းငယ်ရှင်းပြပေးပါမည်။

နေထိုင်ကျက်စားပုံ

ဝံပုလွေပင့်ကူသည် ပတ်ဝန်းကျင်နှင့်လိုက်လျောညီထွေစွာ နေထိုင်နိုင်ပြီး အလွယ်တကူတွေ့မြင်နိုင်သည်။ အင်းဆက်ဖျက်ပိုးများ စားသောက်ရန် စိုက်ခင်းအတွင်းနှင့်ကန်သင်းများ၊ အမှိုက်ပုံများ ၊ ရေမစိုမခြောက်ရှိသောနေရာများ၊ စမ်းချောင်းတစ်လျောက် နှင့် ရေကန်ရွံ့ တို့တွင်လည်းတွေ့ရသည်။ အေးသောအခြေအနေများတွင် တွင်းတူး၍နေ ထိုင်ကြသည်။

မျိုးပွားခြင်း

မျိုးပွားခြင်းတွင် ဝံပုလွေပင့်ကူ၏ ထူးခြားသောလက္ခဏာများရှိသည်။ ပင့်ကူအမများသည် ဥပေါင်း (၁၀၀) သို့မဟုတ် အများအပြား ဥနိုင်သည်။ ပင့်ကူအမ များသည် မိတ်လိုက်၍ မျိုးပွားပြီးချိန်တွင် ၎င်း၏သားလောင်းများအား ကျောပေါ်တွင် ထားရှိစေပါသည်။ အကောင်ကြီးအဆင့်ရောက်မှသာလျှင် ကျောမှကွာချလေသည်။

ဝံပုလွေပင့်ကူ၏ နှိမ်နင်းနိုင်သောဖျက်ပိုးများ

ဝံပုလွေပင့်ကူသည် ပုရစ်၊ ပိုးဟတ်၊ ဖြုတ်ညို၊ ဖြုတ်စိမ်း၊ နှာတံရှည်/ တိုကျိုင်း ကောင်များ၊ ပုရွတ်ဆိတ်၊တစ်ခြားသော ပင့်ကူမျိုးစိတ်များ၊ လှေပိုး၊ နှာဖာချေးပိုး၊ တစ်ခြားသော ကျောရိုးမဲ့အင်းဆက်ဖျက်ပိုးများကို ကာကွယ်ဟန့်တားနိုင်သည်။

ဖျက်ပိုးများ ကာကွယ်နှိမ်နင်းရာတွင် ဝံပုလွေပင့်ကူသည် အမှန်တစ်ကယ်ကောင်းမွန်စွာနှိမ်နင်းနိုင်သော သဘာဝမိတ်ဆွေပိုး ဖြစ်ပါသည်။ ကွင်းထဲတွင် ဝံပုလွေပင့်ကူအရေအတွက်များစွာ ရှိနေပါက ထိန်းသိမ်းထားခြင်းဖြင့် ဖျက်ပိုးများကို အထိရောက်ဆုံး ကာကွယ်နှိမ်နင်းနိုင်မည်။ ဝံပုလွေပင့်ကူသည် တစ်ခြားသောပင့်ကူများထက် စီးပွားရေးအရ အဖိုးတန်သော မိတ်ဆွေရတနာပိုးတစ်မျိုးဖြစ်သည်။ သဘာဝတွင်ဝံပုလွေပင့်ကူရှိနေခြင်းသည် ပတ်ဝန်းကျင်ရှိ အဆိပ်အတောက် များကိုလည်း လျော့နည်းစေသည်။

လင်းလင်းထွန်း

Reference

https://sciencing.com predators-wo…