လာအိုက တိုင်ဖွန်း KAJIKI ကြောင့် မြန်မာနိုင်ငံပေါ်သက်ရောက်မှုများနှင့် မြူဆိုင်းသတိပေးချက်

ဩဂုတ်လ ၂၆ ရက် နံနက် ၁၁ နာရီ ၃၀ မိနစ်အချိန်ရရှိသည့် ဒေတာများအရ လာအိုနိုင်ငံပေါ်ကိုရောက်လာတဲ့ တိုင်ဖွန်း KAJIKI သည် လေဖိအားနည်းရပ်ဝန်းအဆင့်အထိ လျော့ကျသွားပြီး နောက် ၂၄ နာရီအတွင်းမှာ လေပွေလှိုင်းအဆင့်လောက်သာကျန်ပါတော့မယ်။

မုန်တိုင်းအကြွင်းအကျန်များက မြန်မာနိုင်ငံအရှေ့ဘက်မှ ရှမ်းပြည်နယ်-အရှေ့ပိုင်းနှင့် တောင်ပိုင်းဒေသတွေကိုဖြတ်သန်းပြီး မန္တလေးတိုင်း၊ စစ်ကိုင်းတိုင်းနဲ့ ကချင်ပြည်နယ်တွေအထိ ဆက်လက်ရွေ့လျားဝင်ရောက်နိုင်တာ တွေ့ရပါတယ်။

လာအိုနဲ့ ထိုင်းနိုင်ငံမြောက်ပိုင်းမှာ ပါလာတဲ့ မိုးရေတော်တော်များများရွာခဲ့ပြီးဖြစ်တာကြောင့် မြန်မာနိုင်ငံအတွင်းမှာ မူလကြိုတင်ခန့်မှန်းချက်များလောက် မိုးရေချိန်မများနိုင်တော့ကြောင်း၊ ၂၄ နာရီအတွင်း မိုးရေချိန် အများဆုံး ၃ လက်မ နဲ့ ၅ လက်မအောက်သာရွာနိုင်မှာဖြစ်ကြောင်း တွေ့ရပါတယ်။

နေရာကွက်ပြီး တောင်ကြောတွေပေါ်မှာ မိုးသည်းထန်နိုင်တာကိုတော့ တောင်ကျရေကျဆင်းနိုင်တာ၊ ရုတ်ခြည်းရေကြီးနိုင်တာတွေရှိတဲ့အတွက် သတိထားကြရပါမယ်။ 

၂၀၂၄ YAGI အကြွင်းအကျန်တွေလိုတော့ မိုးအလွန်များတာ(၂၄ နာရီ မိုးရေချိန် ၅ လက်မ မှ ၈ လက်မအထက်ရွာသွန်းနိုင်တာ)မရှိတော့တဲ့အတွက် စိုးရိမ်စိတ်တွေကို လျှော့ချလို့ရပါပြီ။

 ဩဂုတ်လ ၂၉ ရက်နောက်ပိုင်း၊ စက်တင်ဘာလ ပထမပတ်ထဲအထိ အရှေ့နဲ့အနောက်ပင်လယ်တွေမှာ လေဖိအားနည်းရပ်ဝန်းတွေ မုန်တိုင်းတွေဆက်လက်ဖြစ်ပေါ်နေနိုင်သေးတာကြောင့် - 

အနောက်တောင်မုတ်သုံလေဆုတ်ခွာချိန် အောက်တိုဘာလလယ်လောက်အထိ မိုးနှောင်းကာလမိုးတွေက ဆက်ရွာနေပါဦးမယ်။

မြူဆိုင်းနိုင်မည့် အခြေအနေသတိပေးချက်

⚠️ ရန်ကုန်တိုင်းနဲ့ ပဲခူးတိုင်းတောင်ပိုင်းမှာ ဩဂုတ် ၂၈ ရက်နေ့မနက်ပိုင်းတွင် မြူဆိုင်းနိုင်မည့်အခြေအနေ FOG WEATHER CONDITION ဖြစ်ပေါ်နိုင်ကြောင်း ကြိုတင်ခန့်မှန်းချက်ရှိနေတာကြောင့် -

⚠️ ၂၈ ရက်နံနက်ပိုင်း ရန်ကုန်မြစ်၊ လှိုင်မြစ်၊ ငမိုးရိပ်ချောင်း၊ ပဲခူးမြစ်များအတွင်းမှ လှေ၊ သမ္ဗါန်၊ သင်္ဘောများ သတိပြုခုတ်မောင်းကြပါရန် သတိပေးချင်ပါတယ်။

မိုးလေဝသပညာရှင် ဆရာဦးဝင်းနိုင်၏ တရားဝင်ခွင့်ပြုချက်ဖြင့် ပြန်လည်ဖော်ပြသော သတင်းဖြစ်ပါသည်။