ဇွန်လ ၁၀ ရက်ဝန်းကျင်မှစ၍ ဧရာဝတီ၊ ရန်ကုန်နှင့် ပဲခူးတိုင်းဒေသကြီးတို့တွင် မိုးရွာသွန်းမှု ရက်ဆက်နိုင်

ဇွန်လ ၁ ရက် နံနက် ၁၁ နာရီ ၅၀ မိနစ်အချိန် WINDY - ECMWF Model Wind Maps (850 hPa / 1500m) အချက်အလက်များအပေါ် အခြေခံပြီး မြန်မာနိုင်ငံတောင်ပိုင်း (ဧရာဝတီတိုင်း၊ ရန်ကုန်တိုင်းနှင့် ပဲခူးတိုင်း) ဒေသတွေမှာ မုတ်သုံမိုး ဘယ်အချိန်ပြန်ကောင်းလာနိုင်မလဲဆိုတဲ့ အဆင့်လိုက် ဆန်းစစ်သုံးသပ်ချက်ဖြစ်သည်။

၁။ ဇွန်လ ၁ ရက် (လက်ရှိအခြေအနေ) - မုတ်သုံလေလမ်းကြောင်း ပြတ်တောက်နေခြင်း 

သုံးသပ်ချက် - ထိုင်ဝမ်အရှေ့ဘက် ပစိဖိတ်သမုဒ္ဒရာထဲမှာ ဗဟိုလေဖိအား ၉၇၉ hPa ရှိတဲ့ အားကောင်းသော တိုင်ဖွန်းမုန်တိုင်း JANGMI (Typhoon JANGMI) ရှိနေတာကို ရှင်းရှင်းလင်းလင်း မြင်တွေ့ရပါသည်။

မုန်တိုင်း JANGMI ရဲ့ ဆွဲအားကြောင့် ဘင်္ဂလားပင်လယ်အော်ထဲက လာရမယ့် အနောက်တောင်မုတ်သုံလေနှင့် ရေခိုးရေငွေ့ (Moisture Transport) အများစုဟာ မြန်မာနိုင်ငံပေါ်ကို မဝင်ရောက်နိုင်ဘဲ ကုန်းတွင်းပိုင်းကို ဖြတ်ကျော်ကာ မုန်တိုင်းဗဟိုချက်ရှိရာ အရှေ့ဘက်သို့ အရှိန်အဟုန်ဖြင့် တိုက်ရိုက် စီးဆင်းဆွဲယူခြင်း ခံနေရပါသည်။ ဒါကြောင့် မြန်မာနိုင်ငံတောင်ပိုင်းမှာ မုတ်သုံမိုး ယာယီအားလျော့နည်း (Monsoon Break) နေရခြင်း ဖြစ်ပါသည်။

၂။ ဇွန်လ ၃ ရက် - မုန်တိုင်းမြောက်ဘက်သို့ ရွေ့လျားပြီး အရှိန်ကျန်နေသေးခြင်း 

တိုင်ဖွန်းမုန်တိုင်း JANGMI သည် ဂျပန်နိုင်ငံဘက်သို့ မြောက်ဘက်/အရှေ့မြောက်ဘက်သို့ ရွေ့လျားသွားသော်လည်း အားကောင်းဆဲဖြစ်ပြီး လေစီးကြောင်း ဆွဲအား (Steering Flow) က ကပ္ပလီပင်လယ်နှင့် ဘင်္ဂလားပင်လယ်အော်တောင်ပိုင်းက ရေခိုးရေငွေ့တွေကို ထိုင်းနိုင်ငံနှင့် ဖိလစ်ပိုင်ဘက်သို့ ဆက်လက်ဆွဲခေါ်နေဆဲ ဖြစ်ပါသည်။ 

ထို့ကြောင့် မြန်မာနိုင်ငံတောင်ပိုင်း ဒေသများတွင် လေတိုက်ခတ်မှု ပုံစံမမှန်သေးဘဲ မိုးဆက်လက် နည်းနေဦးမည် ဖြစ်သည်။

၃။ ဇွန်လ ၆ ရက် - လေစီးကြောင်း ပုံစံပြောင်းလဲလာခြင်း (အကူးအပြောင်းကာလ)  

တိုင်ဖွန်းမုန်တိုင်း JANGMI အားပျော့ပျက်ပြယ်သွားပြီးနောက် ပစိဖိတ်သမုဒ္ဒရာဘက်က ဆွဲအား လျော့ကျသွားပါသည်။ သို့သော်လည်း ဇွန်လ ၆ ရက်ခန့်တွင် တောင်တရုတ်ပင်လယ်နှင့် ဖိလစ်ပိုင်အနီးတွင် နောက်ထပ် လေဖိအားနည်းဆဲလ် (Low Pressure Cell) တစ်ခု အသက်ဝင်လာတာကြောင့် အနောက်တောင်မုတ်သုံလေဟာ မြန်မာနိုင်ငံဘက်ကို တိုက်ရိုက်မဝင်သေးဘဲ ကပ္ပလီပင်လယ်ပြင်မှတစ်ဆင့် ထိုင်းနိုင်ငံနှင့် ဗီယက်နမ်ဘက်သို့ ဆက်လက် စီးဝင်နေဆဲဖြစ်တာကို တွေ့ရပါသည်။ 

ထို့ကြောင့် ဇွန်လ ၆ အထိ မြန်မာနိုင်ငံတောင်ပိုင်းဒေသအများစုတွင် မိုးသိသိသာသာ ပြန်မကောင်းနိုင်သေးဘဲ တိမ်အသင့်အတင့်မှ နေရာကွက်ကျားဖြစ်ပေါ်မှုသာ ဆက်လက်ရှိနေနိုင်ပါသည်။

၄။ ဇွန်လ ၁၀ ရက် - မုတ်သုံမိုး အားကောင်းမည့် အခြေအနေ (Monsoon Revival) 

ဇွန်လ ၁၀ ရက် မနက်ပိုင်း မြေပုံအရ အရှေ့ဘက်က ဆွဲအားများအားလုံး ပျောက်ဆုံးသွားပြီး ဘင်္ဂလားပင်လယ်အော်အတွင်း အနောက်တောင်မုတ်သုံလေလမ်းကြောင်း (Monsoon Flow) စနစ်တကျ ပြန်လည်အားကောင်းလာတာကို တွေ့ရပါသည်။ 

အနောက်တောင်ဘက်မှ တိုက်ခတ်လာသော အားကောင်းသည့် လေစီးကြောင်း (ရောင်စုံပြထားသော လေအဟုန်ပြင်း လမ်းကြောင်း) သည် ဘင်္ဂလားပင်လယ်အော်ကို ဖြတ်သန်းပြီး မြန်မာနိုင်ငံတောင်ပိုင်းဒေသများဖြစ်သည့် ဧရာဝတီတိုင်း၊ ရန်ကုန်တိုင်းနှင့် ပဲခူးတိုင်းဒေသကြီးများဆီသို့ တိုက်ရိုက် ဦးတည်ကာ ပြန်လည်ဝင်ရောက်လာပြီ ဖြစ်ကြောင်းတွေ့ရပါသည်။

ကောက်ချက်နှင့် ခန့်မှန်းချက် (SUMMARY ANALYSIS)

မိုးပြန်ကောင်းမည့် အချိန်ကာလ - ဇွန်လ ၆ ရက်နောက်ပိုင်းမှစ၍ လေလမ်းကြောင်းများ စတင်ပြောင်းလဲလာမည်ဖြစ်ပြီး ဇွန်လ ၈ ရက်မှ ၁၀ ရက်အတွင်း မြန်မာနိုင်ငံတောင်ပိုင်းတွင် အနောက်တောင်မုတ်သုံလေနှင့် ရေခိုးရေငွေ့များ စနစ်တကျ ပြန်လည်စုဖွဲ့မိကာ မုတ်သုံမိုးများ တစ်ကျော့ပြန် အားကောင်းလာမည် (Monsoon Revival) ဖြစ်ပါသည်။

သက်ရောက်မှု - ဇွန်လ ၁၀ ရက်ဝန်းကျင်မှစတင်ကာ ဧရာဝတီ၊ ရန်ကုန်နှင့် ပဲခူးတိုင်းဒေသကြီးတို့တွင် မိုးရွာသွန်းမှု ရက်ဆက်ပြန်လည်များပြားလာနိုင်ပြီး နေရာစိပ်စိပ်မှ နေရာအနှံ့အပြား မိုးကြီးခြင်းများနှင့်အတူ မုတ်သုံမိုး ပုံမှန်အခြေအနေသို့ ပြန်လည်ရောက်ရှိသွားမည်ဟု သုံးသပ်ရရှိပါသည်။

မိုးလေဝသပညာရှင် ဆရာဦးဝင်းနိုင်၏ ခွင့်ပြုချက်ဖြင့် ပြန်လည်ဖော်ပြသော သတင်းဖြစ်သည်။