အနောက်မြောက်လေကြောင့် ကချင်ပြည်နယ် မိုးထစ်ချုန်းရွာခြင်းသည် ဧပြီလဆန်းပိုင်းအထိ ဆက်လက်ရှိနေနိုင်

ဘင်္ဂလားပင်လယ်အော်နှင့် ကပ္ပလီပင်လယ်တို့တွင် ထူးခြားသည့်မိုးလေဝသအခြေအနေ (လေပွေလှိုင်း/လေဖိအားနည်းရပ်ဝန်း) ဖြစ်ပေါ်ခြင်းမရှိပါ။ ကမ္ဘာ့တောင်ဘက်ခြမ်း၊ ဩစတေးလျတိုက် အရှေ့မြောက်ဘက်တွင် ဖြစ်ပေါ်နေသော မုန်တိုင်း NARELLE သည် မတ်လ ၁၉ ရက်နေ့တွင် CAT-4 ဆိုင်ကလုန်းမုန်တိုင်းဖြစ်လာပြီး အနောက်ဘက်သို့ ဆက်လက်ရွေ့လျားကာ ဩစတေးလျတိုက်မြောက်ဘက်ခြမ်းကို ယနေ့ည မတ်လ ၁၉ ရက်ညတွင် ဖြတ်ကျော်ဝင်ရောက်မည်ဖြစ်ကြောင်းတွေ့ရပါတယ်။

မတ်လ ၁၉ ရက် ညနေ ၃ နာရီ ၃၀ မိနစ် Update အရ

📌 ဩစတေးလျတိုက်အရှေ့မြောက်ဘက်တွင် ဖြစ်ပေါ်နေသော ဆိုင်ကလုန်းမုန်တိုင်း NARELLE မြန်မာနိုင်ငံအပေါ်တိုက်ရိုက်သက်ရောက်မှုမရှိသော်လည်း အီကွေတာဖြတ်ကျော်လေစီးကြောင်း CEF SOUTH-WARD ဖြစ်ပေါ်ပြီး အရှေ့မြောက်မုတ်သုံလေအားလျော့လာတာကို တွေ့ရပါတယ်။ တချိန်တည်းမှာ ဘင်္ဂလားပင်လယ်အော်မြောက်ပိုင်းတွင် လက်ယာရစ်လေဝဲဖြစ်ပေါ်မှုကြောင့် အိန္ဒိယမြောက်ပိုင်းမှ “အနောက်မြောက်ရာဟုလေ” အားပိုကောင်းလာတာကိုလဲ တွေ့ရပါတယ်။

📌 ဘင်္ဂလားပင်လယ်အော်မြောက်ပိုင်းမှ အနောက်မြောက်လေနှင့် ဘင်္ဂလားပင်လယ်အော်တောင်ဘက်မှ မြောက်ဘက်သို့တိုက်ခတ်လျက်ရှိသည့် လေစီးကြောင်း ၂ ခုတွေ့ဆုံမှု Convective flow ကြောင့် မိုးတိမ်တောင်များဝင်ရောက်နေဆဲဖြစ်ပြီး အနောက်တောင်မှ အရှေ့မြောက်ဘက်သို့ ဆက်လက်ရွေ့လျားဝင်ရောက်ခြင်းကြောင့် ချင်းပြည်နယ်၊ စစ်ကိုင်းတိုင်းအထက်ပိုင်း၊ ကချင်ပြည်နယ်တို့တွင် မိုးဆက်လက်များနေနိုင်ပါမယ်။

📌 ကျန်ပြည်နယ်တိုင်းများတွင် မိုးတိမ်များရွေ့လျားဝင်ရောက်သည့် လမ်းကြောင်းတလျှောက် စိုထိုင်းသည့်အခြေအနေများဖြစ်ပေါ်နိုင်ပြီး မိုးရွာနိုင်သော်လည်း၊ များနိုင်မည်မဟုတ် မိုးဖွဲကျရုံသာရှိနိုင်ပါမယ်။ ကချင်ပြည်နယ်နှင့် စစ်ကိုင်းတိုင်းအထက်ပိုင်းဒေသအချို့တွင် လေပြင်းတိုက်ခတ်ခြင်း၊ မိုးသီးကြွေခြင်းနှင့် နေရာကွက်၍မိုးသည်းထန်ခြင်းများဖြစ်ပေါ်နိုင်ပါတယ်။

📌 မတ်လ ၁၉ ရက် ည ၁၂ နာရီမှ ၂၄ ရက် ည ၁၂ နာရီအတွင်း တနင်္သာရီတိုင်းတောင်ပိုင်း၊ ချင်းပြည်နယ်၊ မန္တလေးတိုင်း၊ စစ်ကိုင်းတိုင်းအောက်ပိုင်း၊ ရှမ်းပြည်နယ်မြောက်ပိုင်းတို့တွင် မိုးအနည်းငယ်ထစ်ချုန်းရွာသွန်းနိုင်ပြီး၊ စစ်ကိုင်းတိုင်းအထက်ပိုင်း၊ မန္တလေးတိုင်းမြောက်ပိုင်း (တကောင်း/မိုးကုတ်/သပိတ်ကျင်းဒေသများ) နှင့် ကချင်ပြည်နယ်တို့တွင် မိုးအသင့်အတင့်ထစ်ချုန်းရွာနိုင်ပါမယ်။ 

📌 အနောက်မြောက်လေကြောင့် ကချင်ပြည်နယ်တွင်မိုးထစ်ချုန်းရွာသွန်းခြင်းသည် ဧပြီလ-လဆန်းပိုင်းအထိ ဆက်လက်ရှိနေနိုင်ပါသည်။

မိုးလေဝသပညာရှင် ဆရာဦးဝင်းနိုင်၏ ခွင့်ပြုချက်ဖြင့် ပြန်လည်ဖော်ပြသော သတင်းဖြစ်သည်။