မနှစ်က ပဲတီစိမ်းအခင်းထဲမှာ အပင်ကြီးမှ ငုတ်တုတ်ကြီးတွေ အပင်တွေခြောက်ပြီးသေကုန်လို့ ခင်ဗျာ ဘာရောဂါဖြစ်တာလဲ ဒီ...

အပင်ခြောက်သေခြင်းက အစိုဓာတ်လိုအပ်ခြင်းကြောင့် လည်းကောင်း၊ ပိုးမွှားရောဂါကျရောက်ခြင်း တို့ကြောင့်လည်းကောင်း ဖြစ်ပေါ်နိုင်ပါတယ်။ သီးနှံပင်ပေါ် အခြားသော ထိခိုက်ဒဏ်ရာများ၊ လက္ခဏာများကိုလည်း ကြည့်ရှုရမည်ဖြစ်ပါတယ်။ မြေတွင်း အစိုဓာတ်ကို အားထားစိုက်ပျိုးရသည့် ဒေသများဖြစ်ပါက အစိုဓာတ်မှီအောင် ရာသီချိန်ကိုက် စိုက်ပျိုးရန်ဖြစ်ပါသည်။ ပိုးမွှားရောဂါကြောင့်ဖြစ်တတ်တဲ့ အခြေအနေများကိုပြောပြပေးသွားပါမယ်။ ပင်ခြေပုပ်ရောဂါကျရောက်ပါက လက္ခဏာမှာ အပင်ငယ်စဉ်တွင် အဝါရောင်ရှိပြီး မြေပေါ်သို့လဲကျနေမည်။ အပင်ကြီးဖြစ်ပါက အပင်ထောင်လျှက် ခြောက်နေသည့် လက္ခဏာကို တွေ့ရမည်ဖြစ်ပါသည်။ ပင်ခြေတွင် မှိုမျှင်ဖြူများနှင့်အတူ မုန့်ညင်းစေ့ကဲ့သို့ (စကလိုရှား) ခေါ် အလုံးငယ်များတွေ့ရမည်။ -ရောဂါရ ပင်ကြွင်းပင်ကျန်များကို ဖျက်ဆီးပါ။ -မြေအစိုဓာတ်များမှု မဖြစ်စေရန်ထိန်းသိမ်းပါ။ -မြေပြင်ချိန်တွင် ထရိုင်ဂိုဒါးမား (Trichoderma) မှိုကို မြေခံအဖြစ်ထည့်ပေးပါ။ -ရောဂါစတင်ကျရောက်ချိန်တွင် Captan ၊ Tebuconazole ၊ Validamycin ၊ Hymexazol ၊ Azoxystrobin စသည့် မှိုသတ်ဆေးတစ်မျိုးမျိုးကို အပင်ခြေရင်းတွင် အညွှန်းပါ ဆေးနှုန်းထားအတိုင်း ရွှဲရွှဲပက်ဖျန်းပေးပါ။ ပင်စည်ထိုးယင်ကျရောက်ပါက မြေကြီးနှင့်ကပ်နေသော ပင်စည်တွင် ပိုးပေါက်ရာများ တွေ့ရပြီး ပိုးကျအပင်သည် မီးမြိုက်ခံရသကဲ့သို့ ဝါရာမှ ညှိုးသွားမည်။ စိုက်ခင်းတွင် နေရာအလိုက် အကွက်လိုက် သေနေသည်ကို တွေ့နေရပါမည်။ အပင်ခြောက်နေသည့် လက္ခဏာကို တွေ့ရမည်ဖြစ်ပါသည်။ မျိုးစေ့ကို အင်မီဒါကလိုပရစ် (Imidacloprid)(70%WP) ဖြင့် မျိုးစေ့လူးနယ်စိုက်ပျိုးပါ။ အပင်သက်တမ်း (၁၀-၁၄) ရက် အတွင်း အပင်ပျောက်ခြင်း၊ သေခြင်းတွေ့ရပါက (Cartap hydrochloride) ၊ (Thiamethoxam) ၊ (Acephate) ၊ (Imidacloprid) စသည့် ပင်လုံးပြန့် ပိုးသတ်ဆေး တစ်မျိုးမျိုးကို ပိုးသတ်ဆေးဘူး/ အိတ်ပေါ်ပါ အညွှန်းအတိုင်း ပက်ဖျန်းပါ။ အပင်ပိုးမွှားရောဂါ ကျရောက်မှုနှင့်ပတ်သက်၍ ပိုမိုတိကျသော အဖြေများရရှိနိုင်ရန် သီးနှံကာကွယ်ရေးဌာနခွဲမှ ကျွမ်းကျင်ပညာရှင်များထံသို့လည်း ဆက်သွယ်မေးမြန်းနိုင်ပါသည်။ လူကြီးမင်း၏မေးခွန်းကို စိုက်ပျိုးရေးဦးစီးဌာန call center မှ ဖြေဆိုပေးထားခြင်းဖြစ်ပါတယ်