ငါးမွေးမြူ ရေး အကြောင်း များများတင်ပေးပါ။ ဇလားဗီးယား၊ ငါးခူ မွေးမြူရေး အလင်းပြပေးပါ

Question

နှင်းဖြူဖြူ · Answer

သိပ္ပံနည်းကျအဆင့်မြင့် ငါးခူမွေးမြူရေးအကြောင်း စာတန်းလေးကိုနှိပ်ပြီးလေ့လာလို့ ရပါတယ်

Agriculturalist K.S · Answer

မျိုးစပ်ငါးခူသည် အာရှဒေသတွင် ထင်ရှားလူကြိုက်များပြီး အာဖရိက ငါးခူအထီးနှင့် ထိုင်းငါးခူ အမ မျိုးစပ်သားဖောက်၍ ရရှိသည့် ငါးခူမျိုးသစ် တစ်ခုဖြစ်ပါသည်။ ကြီးထွားနူန်း မြန်ဆန်ကောင်းမွန်ခြင်း၊ စားသုံးရာတွင် အရသာကောင်းမွန်ခြင်းနှင့် ရောဂါဒဏ်အတော်အသင့်ခံနိုင်ခြင်း၊ စျေးကွက်ကောင်းမွန်ခြင်း စသည်တို့ကြောင့် ငါးမွေးမြူသူများ နှစ်ခြိုက်သည့် ငါးမျိုးဖြစ်ပါသည်။ ထို့အပြင် အရွယ်အစားသေးငယ်သည့် မြေကန်များနှင့် အုတ်ကန်များ စသည်တို့်တွင် မွေးမြူနိုင်သဖြင့် မျိုးစပ်ငါးခူသည် စီးပွားဖြစ် မွေးမြူရေးသာမက တစ်ပိုင်တစ်နိုင် မွေးမြူရေးအတွက်ပါ အထူးသင့်လျော်သည့် ငါးမျိုးဖြစ်ပါသည်။ မြေနေရာ ၁။ မျိုးစပ်ငါးခူသည် ပူနွေးသည့်နေရာများတွင် ပိုမိုဖြစ်ထွန်းပြီး မြန်မာနိုင်ငံအနှံ့အပြားတွင် မွေးမြူနိုင်ပါသည်။ ၂။ တစ်နှစ်ပတ်လုံး အလွယ်တကူ ရေလဲလှယ်ပေးနိုင်သည့်နေရာများတွင် မွေးမြူနိုင်ပါသည်။ ၃။ လမ်းပန်းဆက်သွယ်ရေးကောင်းမွန်ပြီး စျေးကွက်နီးသည့် နေရာဖြစ်ရပါမည်။ ၄။ ရွှံ့စေးမြေ (သို့မဟုတ်) ရွှံ့နူန်းမြေ အမျိုးအစားဖြစ်ရပါမည်။ ကန်အရွယ်အစားနှင့် ကန်တူးဖော်ခြင်း ၁။ စီးပွားဖြစ် လုပ်ငန်းအနေဖြင့် ဆောင်ရွက်ပါက အငယ်ဆုံး ၀.၂၅ ဧကမှ အကျယ်ဆုံး ၂ ဧကရှိကန်များသာ သင့်လျော်ပါသည်။ ၂။ မျိုးစပ်ငါးခူမွေးမြူရန် ရေအနက်(၄)ပေ လိုအပ်သဖြင့် မြေသားအနက် အနည်းဆုံး (၄) ပေအထိ တူးဖော်ရန် လိုအပ်ပါသည်။ ၃။ ငါးခူသည် တွင်းများဖောက်ခြင်း၊ ကန်အပြင်သို့ထွက်ခြင်းများရှိနိုင်သဖြင့် ကန်ဘောင်ထူထဲခိုင်မာမြင့်မားရန် လိုအပ်ပါသည်။ ၄။ ရေသွင်းရေထုတ်လွယ်ကူစွာ ပြုလုပ်နိုင်ရန် ပြွန် (သို့) ရေတံခါးများ စနစ်တကျထားရှိရန် လိုအပ်ပါသည်။ ၅။ ငါးများ ပြန်လည်ဖမ်းဆီးရာတွင် လွယ်ကူစေရန် ကန်အောက်ခြေမျက်နှာပြင်အား ဆင်ခြေလျောပုံတူးပေးရမည်။ ၆။ ကန်ဘောင်ထိပ်မှ အောက်(၃)ပေအကွာတွင် ရေလျှံပြွန်တစ်ခု(သို့)နှစ်ခုထားရှိရန် လိုအပ်ပါသည်။ ၇။ သို့မှသာ မိုးများသည် ဒေသမိုးရာသီတွင် ကန်ရေမျက်နှာပြင်အား ထိန်းသိမ်းနိုင်မည် ဖြစ်ပါသည်။ ကန်ပြင်ဆင်မှု ၁။ အသစ်တူးဖော်ထားသည့်ကန်၏မြေသားတွင် အနယ်အနှစ်များပါရှိသဖြင့် ကန်ထဲသို့ ရေထည့်သည့်အခါ ရွှံ့များနှင့် အတူပျော်ဝင်၍ နောက်ကျိနေတတ်ပါသည်။ ၂။ ၎င်းနောက်ကျိနေသည့် ရေများအားလုံး ထုတ်ပစ်သင့်ပါသည်။ ၃။ ထို့နောက် ကန်အတွင်းသို့ တစ်ဧကလျှင် ထုံးပိဿာ (၃၀၀) ခန့် ထည့်ပေးရပါမည်။ ၄။ ထုံးထည့်ပြီး တစ်ရက်နှစ်ရက်အကြာ တစ်ဧကလျှင် နွားချေး တင်း(၁၅၀)ခန့်အထိ ကန်အနှံ့အပြား ဖြန့်ထည့်ပေးသင့် ပါသည်။ ၅။ ထို့နောက်ရေ(၄)ပေခန့်အထိ ထည့်သွင်းပေးရပါမည်။ ၆။ တစ်ပတ်(၁၀)ရက်ခန့်ကြာသည့်အခါ ကန်ရေကြည်စိမ်းလာပြီး မျိုးစပ်ငါးခူသားပေါက်များ စတင်ထည့်သွင်းမွေးမြူနိုင်သည့် အခြေအနေသို့ ရောက်ရှိပြီဖြစ်ပါသည်။ ၇။ ကန်အဟောင်းများတွင် မွေးမြူမည်ဆိုပါက ကန်အတွင်းရှိ ရေအားလုံးထုတ်၍ ငါးရိုင်းများ ကုန်စင်သည်အထိ ရှင်းလင်းသင့်ပါသည်။ ၈။ ထို့နောက် ကန်အတွင်းသို့ တစ်ဧကလျှင် ထုံးပိဿာ(၁၀၀)မှ(၁၅၀)ခန့်အထိ ကန်အနှံ့အပြားဖြန့်ထည့်ပေးရပါမည်။ ၉။ ကန်အတွင်းရှိ ရေအရည်အသွေးကောင်းမွန်စေရန် နွားချေး တင်း(၅၀)မှ(၁၀၀)ခန့်အထိ ဖြန့်ထည့်ပေးရပါမည်။ ၁၀။ ကန်အတွင်းသို့ ငါးရိုင်းများမပါရှိစေရန် ရေကို စစ်သွင်းပေးရပါမည်။ ၁၁။ ငါးခူများအပြင်သို့ မထွက်နိုင်စေရန် ကန်အတွင်းဘက် ဘောင်တစ်လျှောက် ထင်းများ၊ ထရံများဖြင့် ကာရံထားရပါမည်။ ၁၂။ ရေထည့်ပြီး (၁၀) ရက်ခန့်အကြာတွင် ကန်ရေစိမ်းလာပါမည်။ ဤအခြေအနေတွင် ငါးခူသားပေါက်များစတင်ထည့်သွင်းမွေးမြူနိုင်ပါသည်။ ၁၃။ ငါးခူမွေးမြူရေးကန်အတွင်းသို့ ထုံး၊ နွားချေး စသည်တို့ထည့်ခြင်းသည် မျိုးစပ်ငါးခူများအတွက် သဘာဝအစာ ရရှိစေရန် မွေးမြူခြင်းမဟုတ်ဘဲ ကန်မြေသားနှင့်ရေအရည်အသွေးကောင်းမွန်မှု ချဉ်ဖန်နူန်းမျှတမှုနှင့် အောက်စီဂျင်လုံလောက်စွာ ရရှိမှုအတွက်သာ ပြုပြင်ပေးခြင်းဖြစ်ပါသည်။ ငါးသားပေါက်ထည့်သွင်းခြင်း ၁။ ကန်တစ်ဧကလျှင် မျိုးစပ်ငါးခုသားပေါက် (၂၀၀၀၀)မှ (၄၀၀၀၀)အထိ ထည့်သွင်းမွေးမြူနိုင်ပါသည်။ ၂။ ငါးခူသားပေါက်များသည် အရွယ်အစားညီမျှ၍ ရောဂါဘယကင်းရှင်းရပါမည်။ အစာအမျိုးအစားနှင့် အစာကျွေးနူန်း ၁။ မျိုးစပ်ငါးခူသည် အသားစားငါးမျိုးဖြစ်သဖြင့် အသားဓာတ်အနည်းဆုံး ၂၅% ပါဝင်သည့် အစာတောင့်များအား ကန်အတွင်းရှိ ငါးစုစုပေါင်း ခန့်မှန်းအလေးချိန်၏ ၅-၁၀ % အထိ နံနက်၊ ညနေ နှစ်ကြိမ်ခွဲ၍ ကျွေးနိုင်ပါသည်။ ၂။ အဆိုပါ အစာတောင့်အား ဖွဲနု ၃၀ %၊ ငါးကြေးမှုန့် ၃၀%၊ ပဲဖတ်မှုန့် ၃၀%၊ ကော်အဖြစ် ဆန်ကွဲ (သို့) ကောက်ညှင်းမှုန့် ၁၀ % ရောစပ်ပြုလုပ်နိုင်ပါသည်။ ၃။ မျိုးစပ်ငါးခူအား အခါအားလျော်စွာ သားငါး အစိုများလည်း ကျွေးရန် လိုအပ်ပါသည်။ ၄။ သားငါးအစိုကို ကြိတ်၍လည်းကောင်း၊ နုပ်နုပ်စဉ်း၍ လည်းကောင်းပြုလုပ်ပြီး သားငါးအစို ၈၅%၊ ဖွဲနု ၅%၊ ဆန်ကွဲ (ကျို၍) ၁၀%၊ အချိုးအတိုင်းရောနှောကျွေးမွေးနိုင်ပါသည်။ ကြီးထွားနူန်းနှင့် မွေးမြူသည့်ကာလ ၁။ မျိုးစပ်ငါးခူသည် (၄) လခန့်တွင် (၁၀)ကျပ်သားမှ (၁၅)ကျပ်သားခန့်အထိ ကြီးထွားနိုင်ပါသည်။ ၂။ သို့ဖြစ်ပါ၍ မျိုးစပ်ငါးခူအား ငါးသားပေါက် ရရှိမှုအပေါ်မူတည်ပြီး တစ်နှစ်လျှင် (၃)ကြိမ်ခန့်အထိ မွေးမြူထုတ်လုပ်နိုင်ပါသည်။ အဖတ်တင်နူန်း ၁။ ၁ လက်မခန့်အရွယ်ရှိ ငါးမျိုးစပ်ငါးခူသားပေါက်များ ထည့်သွင်းမွေးမြူပါက အဖတ်တင်နူန်းမှာ ၂၅ – ၄၀% ခန့်အထိ ရရှိနိုင်ပါသည်။ ၂။ တစ်လက်မအရွယ်ရှိ သားပေါက်များအား တစ်လခန့်အထိ သီးသန့်ပြုစုကန်တွင် ထားရှိပြီး ၂-၃ လက်မ အရွယ်ရောက်ရှိအောင် ပြုစု၍ အသားတိုးကန်ထဲသို့ ထည့်မွေးပါက ၆၀ % အထိ အဖတ်တင်နိုင်ပြီး ကြီးထွားနူန်းပိုမိုကောင်းမွန်ပါသည်။ ရေလဲလှယ်ပေးခြင်း ၁။ တစ်လလျှင် ကန်အတွင်းရှိ ရေပမာဏ၏ ၃/၄ ထုတ်ပစ်လဲလှယ်ပေးရပါမည်။ ၂။ ရေလဲလှယ်ပေးရခြင်းမှာ အစာကျန်အစာတောင့်များနှင့် သားငါးအစိုများကြောင့်ရေညစ်ညမ်းမှု ရှိပြီး ငါးများ ရောဂါကျရောက် နိုင်ပါ၍ လဲလှယ်ပေးရခြင်းဖြစ်ပါသည်။ ငါးသားပေါက်ရရှိနိုင်သော နေရာများ မျိုးစပ်ငါးခူသားပေါက်များကို ငါးလုပ်ငန်းဦးစီးဌာနအောက်ရှိ ရန်ကုန်တိုင်းငါးလုပ်ငန်းစခန်း၊ ဧရာဝတီတိုင်း ပုသိမ်ငါးလုပ်ငန်း စခန်း၊ ပဲခူးတိုင်းငါးလုပ်ငန်းစခန်း၊ သရက်ကုန်း ငါးလုပ်ငန်းစခန်း၊ ကူမဲငါးလုပ်ငန်းစခန်း၊ ညောင်ရွှေငါးလုပ်ငန်းစခန်းတို့တွင် ဆက်သွယ်ဝယ်ယူရရှိနိုင်ပါသည်။ ငါးလုပ်ငန်းဦးစီးဌာန

Agriculturalist K.S · Answer

တီလားပီးယား ငါးမျိုးသည် အပူပိုင်းဒေသငါးမျိုးစိတ်ဖြစ်ပြီး အနိမ့်ဆုံး ၁၁ ဒီဂရီ ဆဲလ်စီးယပ်မှ အမြင့်ဆုံး ၄၂ ဒီဂရီ ဆဲလ်စီးယပ်ထိ ခံနိုင်ရည်ရှိပြီး (၃၁-၃၆) ဒီဂရီဆဲလ်စီးယပ်၌ ကြီးထွားနှုန်း အကောင်းဆုံး ဖြစ်သည်။ အစုံစားငါးမျိုးဖြစ်ပြီး အပူပိုင်းဒေသတွင် တစ်နှစ်ပတ်လုံး မျိုးပွားသားပေါက်နိုင်သဖြင့် စီးပွားဖြစ် မွေးမြူသင့်သော ငါးအမျိုးအစားတွင် ပါဝင်နေ၍ တီလားပီးယား အသားတိုးမွေးမြူနည်းကို ဖော်ပြပေးပါမည်။ တီလားပီးယား အသားတိုးမွေးမြူခြင်း တီလားပီးယား အသားတိုးမွေးမြူဖို့ အလျှားရှည်၍ အနံတိုသော ကန်အား ရေအနက် ၄ပေ တူးဖော်ရပါမည်။ တစ်ပိုင်တစ်နိုင်အတွက် - ၅၀ ပေ x ၂၅ ပေ x ၄ ပေ, ၁ဝဝ ပေ x ၁၀၀ ပေ x ၄ ပေ စီးပွားဖြစ်အတွက် - ၄၀၀ ပေ x ၁၀၀ ပေ x ၄ ပေ ရှိရပါမည်။ ကန်တူးဖော်ခြင်း - မြေအမျိုးအစားကို လိုက်၍ ၁ဧကလျှင် ထုံး (၆၀-၃၀၀) ပိဿာနှုန်း၊ နွားချေး၊ ကြက်ချေး တင်း (၁၅၀)နှုန်း ထည့်သွင်း၍ ရေဖြည့်ပေးရပါမည်။ - တစ်ပါတ်မှ ၁၀ ရက်အတွင်း သြဇာဓါတ်ပြည့်ဝ၍ ကန်ရေအရောင် စိမ်းလာလျှင် ငါးထည့်သွင်းမွေးမြူနိုင်ပြီဖြစ်ပါသည်။ ငါးထည့်သွင်းမွေးနှုန်း - တစ်ဧကကန်အတွက် ငါးသားပေါက် ငါးသန်အရွယ် (၅၀၀၀) နှုန်း ထည့်သွင်းမွေးမြူနိုင်ပါသည်။ - ၁ဧက မှ ၂.၅ဧက အကျယ်အထိ တူးဖော်မွေးမြူကြပါသည်။ -၂.၅ဧက နှင့် အထက် ကန်ကြီးများတွင် အခြားငါးမျိုးများနှင့် ရောနှော မွေးမြူကြပါသည်။ အစာကျွေးနှုန်း အစာအဖြစ် ဖွဲနု၊ စပ်စာအမှုန့် (ဖွဲနု၊ ပဲဖတ်၊ ငါးပေါင်းမှုန့်)၊ အစာတောင့် (အသားဓါတ် ၂၅-၂၈ %)များကို ခန္ဓာကိုယ်အလေးချိန်၏ ၅% မှ ၃% အထိ တွက်ချက်ကျွေးမွေးရပါမည်။ ကြီးထွားနှုန်း - ဖွဲနု ၄ပိဿာကျွေးလျှင် ငါးတစ်ပိဿာ အသားတိုးနိုင်ပါသည်။ - စပ်စာ ၃ပိဿာကျွေးလျှင် ငါးတစ်ပိဿာ အသားတိုးနိုင်ပါသည်။ - အစာတောင့် ၂ပိဿာကျွေးလျှင် ငါးတစ်ပိဿာ အသားတိုးနိုင်ပါသည်။ အစာနိုင်ပါက ၆လအတွင်း တီလားပီးယားငါး တစ်ကောင်လျှင် ၁၅-၂၅ ကျပ်သားအထိ ကြီးထွားနိုင်ပါသည်။ ကန်တွင်းရေသြဇာ (သဘာဝအစာ) ပေါများပါက အစာကုန်ကျမှုသက်သာကာ ငါးထုတ်လုပ်မှုစရိတ် လျော့နည်းစေပါသည်။ Ref; ငါးလုပ်ငန်းဦးစီးဌာန

ငါးမွေးမြူ ရေး အကြောင်း များများတင်ပေးပါ။ ဇလားဗီးယား၊ ငါးခူ မွေးမြူရေး အလင်းပြပေးပါ

ဖြေကြားချက် ၃ ခု