သီးနှံပေါက်ဈေးကိုဆုံးဖြတ်ပေးနိုင်တဲ့ ဝယ်လိုအား

တောင်သူရဲ့ ဝင်ငွေဟာ သူ သီးနှံပမာဏ ဘယ်လောက်ရောင်းချသလဲဆိုတဲ့အပေါ် မူတည်ပါတယ်။ ဒါပေမယ့် ပိုပြီး အရေးကြီးတဲ့အချက်က သီးနှံပေါက်ဈေး ဖြစ်ပါတယ်။ ဒါကြောင့် ဘယ်အချက်တွေဟာ သီးနှံပေါက်ဈေးအပေါ် အဆုံးအဖြတ်ပေးကြောင်း တောင်သူတွေ နားလည်ထားဖို့ အရေးကြီးပါတယ်။

သီးနှံတစ်မျိုးရဲ့ ပေါက်ဈေးကို ရောင်းလိုအားနဲ့ ဝယ်လိုအားက ဆုံးဖြတ်ပါတယ်။ သီးနှံတစ်မျိုးအပေါ် ဝယ်မယ့်သူအားလုံးရဲ့ ဝယ်ယူလိုမှုစုစုပေါင်းကို အဲဒီသီးနှံအတွက် ဝယ်လိုအားလို့ ခေါ်ပါတယ်။ တောင်သူများအားလုံးရဲ့ သီးနှံတစ်မျိုး ရောင်းချလိုမှု စုစုပေါင်းပမာဏကိုတော့ အဲဒီသီးနှံရဲ့ ရောင်းလိုအားလို့ ခေါ်ပါတယ်။

သီးနှံတစ်မျိုး ဝယ်ယူလိုသူများ (ဝယ်လိုအားများ) ပြီး ရောင်းချလိုသူနည်း (ရောင်းလိုအား နည်း) နေရင် ဝယ်လက်တွေက အဲဒီသီးနှံအတွက် ဈေး ပိုပေးလာကြပါမယ်။

အဲဒီအခြေအနေမှာ သီးနှံဈေးတက်လာဖို့ ရှိတာကြောင့် တောင်သူတွေအတွက် ကောင်းပါတယ်။

သီးနှံတစ်မျိုး ရောင်းချင်သူများ (ရောင်းလိုအားများ) နေပြီး ဝယ်ယူချင်သူနည်း (ဝယ်လိုအား နည်း) နေရင် တောင်သူတွေဟာ အဲဒီသီးနှံကို ဈေးလျှော့ ရောင်းလာကြတော့မယ်။

အဲဒီအခြေအနေမှာ သီးနှံဈေးကျလာဖို့ ရှိတာကြောင့် တောင်သူတွေအတွက် မကောင်းပါဘူး။

ဆိုတော့ သီးနှံတစ်မျိုးရဲ့ ပေါက်ဈေးကို အဲဒီသီးနှံအပေါ် ဝယ်ယူလိုအားနဲ့ ရောင်းချလိုမှုပမာဏက အဆုံးအဖြတ်ပေးတယ်လို့ မှတ်ရပါမယ်။

သီးနှံတစ်မျိုးအပေါ် ဝယ်ယူလိုအား ကောင်း၊ မကောင်းကို အချက်များစွာက လွှမ်းမိုးပါတယ်။

တောင်သူတွေဟာ အဲဒီအချက်တွေကို ကောင်းကောင်း သိထားမှသာ သီးနှံဈေး အတက်အကျ သဘောသဘာဝကို နားလည်နိုင်မှာ ဖြစ်ပါတယ်။

(၁) ကြွယ်ဝမှု

သီးနှံဝယ်လိုအားဟာ ဒေသတစ်ခုအတွင်း နေထိုင်သူတွေရဲ့ ငွေကြေးသုံးစွဲနိုင်မှုအပေါ် များစွာ မူတည်ပါတယ်။ ငွေကြေးချို့တဲ့သူတွေက အခြေခံအစားအစာနဲ့ မရှိမဖြစ်ပစ္စည်းတွေအတွက်သာ ငွေသုံးနိုင်မှာဖြစ်ပါတယ်။ ကြွယ်ဝသူတွေကတော့ ဇိမ်ခံပစ္စည်းများ၊ ဇိမ်ခံစာတွေကိုပါ ဝယ်ယူလိုကြပါတယ်။ အဲဒါတွေအတွက် ငွေသုံးဖို့ ဝန်မလေးတတ်ကြပါဘူး။ ဒါကြောင့် ကြွယ်ဝတဲ့ဒေသအတွင်းရှိ တောင်သူတွေဟာ ချို့တဲ့တဲ့ဒေသတွေမှာထက် ငွေဝင်လမ်းဖြောင့်နိုင်ခြေ ပိုများပါတယ်။

(၂) နေရာဒေသ

သီးနှံတစ်မျိုးအပေါ် ဝယ်လိုအားဟာ နေရာဒေသလိုက်ပြီးလည်း ကွာနိုင်ပါတယ်။ ဥပမာ- မြို့ပေါ်မှာ အခြေခံကောက်ပဲသီးနှံတွေအတွက် ဝယ်လိုအား ကောင်းနိုင်ပါတယ်။ ကျေးလက်မှာတော့ အများစုက ကိုယ့်ဘာသာ စိုက်ပျိုးကြပါတယ်။ ဒါကြောင့် ကုန်စိမ်းစိုက်ပျိုးတဲ့ တောင်သူတစ်ဦးဟာ ကျေးလက်ဈေးထက် မြို့ပေါ်ဈေးမှာ ရောင်းစွံနိုင်ခြေ ပိုများပါတယ်။

အချို့သီးနှံတွေအတွက် ဝယ်လိုအားဟာ ပြည်တွင်းဈေးကွက်တင်မက ပြည်ပဈေးကွက်တွေကလည်း လာနိုင်ပါတယ်။ အဲလိုသီးနှံတွေအတွက် ပို့ကုန်ဈေးကွက် ရှိပါတယ်။ ပို့ကုန်လုပ်ငန်းရှင်တွေဟာ တောင်သူဆီက သီးနှံတွေကို ဝယ်ပြီး တစ်ဖက်နိုင်ငံ ကုန်သည်တွေဆီ တစ်ဆင့် ပြန်ရောင်းကြပါတယ်။ အဲဒီလိုသီးနှံ စိုက်ပျိုးတဲ့ တောင်သူတွေဟာ ပို့ကုန်ဈေးကွက်ကို ပိုအာရုံစိုက်သင့်ပါတယ်။ ဒါပေမယ့်လည်း ပြည်ပကို တင်ပို့မယ်ဆိုရင် သီးနှံအရည်အသွေး အလွန်ကောင်းနေဖို့ လိုအပ်မှာဖြစ်ပြီး ဒါဟာ တောင်သူအတွက် စိန်ခေါ်မှုတစ်ခုပါ။ နောက်ပြီး ပို့ကုန်ဈေးကွက် သီးနှံပေါက်ဈေးဟာ ပြည်တွင်းပေါက်ဈေးထက် အလွန် မြင့်မားနေနိုင်သလို မြင့်ရာကနေ အဆမတန် ကျဆင်းသွားတတ်တာကိုလည်း မမေ့သင့်ပါဘူး။ ဒါကြောင့် ပို့ကုန်ဈေးကွက်တစ်ခုတည်း အားကိုးနေတဲ့တောင်သူတွေဟာ ပုံမှန်ထက် အရဲစွန့်ရမှု ပိုများတယ်လို့ မှတ်ယူနိုင်ပါတယ်။

(၃) အချိန်အခါ

သီးနှံအချို့အတွက် ဝယ်လိုအားဟာ ရာသီအလိုက် ဖြစ်ပေါ်တတ်ပါတယ်။ ဥပမာ နွေရာသီထက် ပိုပြီး မိုးရာသီမှာ ထီးဝယ်လိုသူ ပိုများသလိုပါပဲ။ ပွဲလမ်းသဘင်နဲ့ အခါကြီးရက်ကြီးတွေကြောင့် အချို့သောသီးနှံတွေ ဝယ်အား တက်သွားတာမျိုး ရှိပါတယ်။ တောင်သူအနေနဲ့ သီးနှံတစ်မျိုးအတွက် ဝယ်လိုအားများတတ်တဲ့ ရာသီချိန်ခါကို သိအောင်လုပ်ထားရပါမယ်။ အဲဒီအချိန်အခါကို အခွင့်ကောင်းယူပြီး သီးနှံကို ဈေးကွက်တင် ရောင်းချနိုင်ရမှာဖြစ်ပါတယ်။

(၄) လူ့အကြိုက်

လူ့အကြိုက်က တစ်ယောက်နဲ့တစ်ယောက် မတူကြပါဘူး။ တစ်ယောက်ကြိုက်တာကို နောက်တစ်ယောက်က မကြိုက်နိုင်ပါ။ တစ်ယောက်အတွက် စိတ်ဝင်စားစရာကောင်းတဲ့ဟာက နောက်လူအတွက် ပျင်းစရာကောင်းရင်ကောင်းနေလိမ့်မယ်။ သီးနှံတစ်မျိုးမှာလည်း ဒီနှစ်မှာ ခေတ်စားပြီး ဝယ်လိုသူ များပေမယ့် နောက်နှစ်ရောက်တော့ နောက်သီးနှံတစ်မျိုးက အစားဝင်ယူသွားတာမျိုး ရှိနိုင်တယ်။ လူ့အကြိုက်ဟာ ခန့်မှန်းရခက်ခဲပါတယ်။ တောင်သူတွေအတွက် နောင်တစ်ချိန်မှာ ဘယ်သီးနှံ ခေတ်စားလာမယ်ဆိုတာကို ခန့်မှန်းဖို့ မလွယ်ကူပါဘူး။ အဲဒီလို မလွယ်ပေမယ့် အနီးစပ်ဆုံး ခန့်မှန်းနိုင်အောင်တော့ ကြိုးစားရပါမယ်။ အမြဲပြောင်းလဲနေတဲ့ လူ့အကြိုက်ကို ခန့်မှန်းနိုင်တဲ့ တောင်သူဟာ အခြားတောင်သူထက် ဝင်ငွေကောင်း ပိုရှာနိုင်မှာ ဖြစ်ပါတယ်။

(၅) ဈေးနှုန်း

သီးနှံတစ်ခုအတွက် ဝယ်လိုအားဟာ ဈေးနှုန်းအပေါ်လည်း များစွာ မူတည်ပါတယ်။ ဈေးကြီးလွန်းတဲ့ သီးနှံကို လူချမ်းသာ အနည်းစုကသာ ဝယ်ယူစားသုံးနိုင်မှာပါ။ နဂါးမောက်၊ ဒူးရင်း စတဲ့ သူဌေးစာ သစ်သီးဝလံတွေကို လူနည်းစုကသာ ဝယ်ယူအားပေးနိုင်ပါတယ်။ ဒါကြောင့် သီးနှံတွေရဲ့ ကြီးမြင့်တဲ့ဈေးနှုန်းက အဆိုပါသီးနှံ ဝယ်လိုအားအပေါ် လွှမ်းမိုးလျက်ရှိပါတယ်။

နောက်အပိုင်းမှာ ဈေးကောင်းရဖို့အရေးကြီးတဲ့ ရောင်းလိုအားအကြောင်းကို ဖော်ပြပေးသွားပါ့မယ်။

ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ဟုထည့်ပေးပါရန် မေတ္တာရပ်ခံအပ်ပါသည်။