ကွမ်းခြံများရေနှစ်မြှုပ်ခြင်းကြောင့် ကွမ်းဈေး အဆမတန်မြင့်တက်လာနိုင်ဖွယ်ရှိ

    ဧရာဝတီတိုင်းအတွင်းရှိ ကွမ်းခြံများရေနှစ်မြှုပ်ခြင်းကြောင့် ကွမ်းဈေးများ အဆမတန်မြင့်တက်လာနိုင်ကြောင်း ကွမ်းရောင်းဝယ်နေသူများမှ သိရသည်။

    သြဂုတ်လ (၃)ရက်နေ့အထိ ကွမ်းဈေးများအရ ကွမ်းစိမ်းတစ်ပိဿာလျှင် ကျပ် ၁၀,၀၀၀ အထိ ပေါက်ဈေးရှိနေသည်။

ကွမ်းဈေးတွေ တက်လာပါပြီ။ ဘာဖြစ်လို့ ဈေးတက်တာလဲဆိုရင် ခြံတွေလည်း မနည်း ရေမြှုပ်ကုန်ကြပြီလေ။ မိုးများလေ၊ ရေတက်လေ၊ ဧရာဝတီကွမ်းဈေး (မြန်မာနိုင်ငံအောက်ပိုင်းကွမ်းဈေး) တက်လေပါပဲ။

ဟု ဧရာဝတီတိုင်း၊ ပုသိမ်ခရိုင်၊ မှော်သေးကျေးရွာမှ ကွမ်းစိုက်တောင်သူ ကိုထွန်းထွန်းက ပြောသည်။

    ကွမ်းခြံများ ရေနှစ်မြှုပ်မှုကို ဧရာဝတီတိုင်းရှိတောင်သူအများ နှစ်စဉ်ကြုံတွေ့နေရသော်လည်း ၂၀၂၀ ခုနှစ်တွင် ခြံပျက်စီးဆုံးရှုံးမှု ပိုများကြောင်း သိရသည်။

ရေကတော့ ဒီအချိန်က ရေကြီးနေကြပါ။ ဒီနှစ်က မနှစ်ကထက် ရေပိုကြီးပါတယ်။ ပန်းတနော်၊ ညောင်တုန်း၊ မအူပင်၊ မြစ်တန်းဒေသတဝိုက်မှာ  အိမ်ရှေ့ရေက ခါးလောက်အထိ တက်နေတာပါ။ အပင်ထွက်နှုန်းကျ၊ ရေကမြှုပ်၊ အခုအချိန်က အောက်မြန်မာပြည်ကွမ်းနဲ့ အထက်မြန်မာပြည်ကွမ်း စပ်ကူးမတ်ကူးအချိန်လေ။ အောက်ကွမ်းကလည်း လိုသလောက်မထွက်၊ အပေါ်ကွမ်းကလည်း ကုန်ချိန်နည်းတော့ သြဂုတ်လအတွက် ကွမ်းဈေးကတော့ အတက်ဘက်ကြီးပါပဲ။

ဟု ကိုထွန်းထွန်းက ဆက်လက်ပြောသည်။

    ၂၀၂၀ ခုနှစ် သြဂုတ်လ တစ်လတာအတွင်း၊ မြန်မာနိုင်ငံအတွက် မိုးလေဝသခန့်မှန်းချက်များအရ မကွေးတိုင်း၊ မန္တလေးတိုင်း၊ စစ်ကိုင်းတိုင်းတို့သည် မိုးအနည်းဆုံးဒေသများဖြစ်ပြီး၊ ရှမ်းပြည်နယ်တောင်ပိုင်း၊ အရှေ့ပိုင်း၊ ကယားပြည်နယ်၊ ချင်းပြည်နယ်မြောက်ပိုင်း၊ စစ်ကိုင်းတိုင်းအောက်ပိုင်း၊ ပဲခူးတိုင်းအနောက်ပိုင်းတို့မှာ မိုးရေချိန် အလယ်အလတ်နှင့် ကချင်ပြည်နယ်၊ ချင်းပြည်နယ်တောင်ပိုင်း၊ ရှမ်းပြည်နယ်မြောက်ပိုင်း၊ မွန်ပြည်နယ်၊ ရခိုင်ပြည်နယ်၊ ကရင်ပြည်နယ်၊ တနင်္သာရီတိုင်း၊ ပဲခူးတိုင်းအရှေ့ပိုင်း၊ ရန်ကုန်တိုင်း၊ ဧရာဝတီတိုင်းတို့၌ မိုးများနိုင်ခြေရှိကြောင်း သိရသည်။

ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ကို ထည့်ပေးပါရန် မေတ္တာရပ်ခံအပ်ပါသည်။