နွေစပါးသီးထပ်ရင် မျိုးသန့်စိုက်ပျိုးရေး (အပိုင်း ၁)

နွေစပါးအဖြစ် အထူးသဖြင့် ဧရာဝတီတိုင်းဒေသကြီးတွင် ကျယ်ကျယ်ပြန့်ပြန့်စိုက်ပျိုးလျက်ရှိသော သီးထပ်ရင်စပါးမျိုးနှင့် ပတ်သက်၍ သုတပေးရေးသားလိုပါသည်။

စပါးမျိုးကောင်း

ယခင့်ယခင်ကပင် သီးထပ်ရင်စပါးမျိုးသည် မြန်မာနိုင်ငံအောက်ပိုင်းဒေသများ၊ အထူးသဖြင့် ဧရာဝတီတိုင်းဒေသကြီး၌ ဖြစ်ထွန်းသည်။ မြန်မာနိုင်ငံ၌ နွေစပါးစိုက်ပျိုးရာတွင် ရေမြေဒေသအမျိုးမျိုး ကွဲပြားခြားနားသည်ဖြစ်ရာ သီးထပ်ရင်သည် ဧရာဝတီတိုင်းဒေသကြီး၏ ရေမြေဒေသရာသီဥတုနှင့် အများစုအားဖြင့် ကိုက်ညီသဖြင့် ဧရာဝတီတိုင်းဒေသကြီးအတွက် မျိုးကောင်းဟုသတ်မှတ်နိုင်ပါသည်။

သီးထပ်ရင်သည် ဒေသအတွင်းရောင်းဝယ်ဖောက်ကားရန် ဈေးကွက်ဝင်သောဆန်အရည်အသွေး ရှိခြင်း၊ ဆန်ထွက်ကောင်းခြင်း၊ ပိုးမွှားရောဂါနှင့် ပေါင်းမြက်ဒဏ်ကိုခံနိုင်ခြင်း စသည့် အရည်အချင်းကောင်းများ ရှိပါသည်။

မိုးစပါးအပြီး နွေစပါးအဖြစ်စိုက်ပျိုးကာ မုတ်သုန်မိုး မလာမီ ရိတ်သိမ်းနိုင်ရန် သင့်တော်သောသက်တမ်း ရက်ရှိခြင်း၊ အပင်ယိုင်လဲလွယ်မှုမရှိခြင်းကြောင့် လေလွင့်ဆုံးရှုံးမှုမရှိခြင်း စသည့် မျိုးကောင်းအင်္ဂါရပ်များနှင့် ကိုက်ညီ၍သာ လယ်သမားများ လက်မလွတ်တမ်းစိုက်ပျိုးနေခြင်း ဖြစ်နိုင်ပါသည်။

အရည်အချင်းလက္ခဏာ

သီးထပ်ရင်စပါးမျိုးကို သုတေသနပြုပြီး ၁၉၉၁ ခုနှစ်တွင် ထုတ်ဝေခဲ့စဥ်ကပင် သီးထပ်စပါးအဖြစ် စိုက်ပျိုးရန် သင့်တော်သောစပါးမျိုး တစ်မျိုးအနေဖြင့် ထုတ်ဝေခဲ့ခြင်းဖြစ်ကြောင်း မှတ်သားမိသည်။

သီးထပ်ရင်စပါးမျိုးသည် အသက်ရက် ၁၁၀ ဖြင့် ရိတ်သိမ်းနိုင်ပြီး အပင်အမြင့်မှာ သုံးပေခန့် ရှိသည်။ အနှံပါပင်ပွား ၁၃ ပင်ပွားနိုင်၍ တစ်နှံပါသီးလုံး ၁၁၀ ခန့်သီး သည့် စပါးမျိုးဖြစ်သည်။ ဧည့်မထအုပ်စုဝင် စပါးမျိုးဖြစ်ကာ ဘက်တီးရီးယားရွက်ခြောက် ရောဂါဒဏ်ကို အထိုက်လျောက်ခံနိုင်ကြောင်း သိရပါသည်။

စိုက်ပျိုးနည်းစနစ်

ဧရာဝတီတိုင်းဒေသကြီး၌ သီးထပ်နွေစပါးအဖြစ် သီးထပ်ရင်ကို စိုက်ပျိုးရာတွင် သွင်းရေရရှိမှု အခြေ အနေအမျိုးမျိုး၌ စိုက်ပျိုးလျက်ရှိသည်။ ဧရာဝတီတိုင်းဒေသကြီး၌ မြစ်၊ ချောင်းအသွယ်သွယ် ဖြန့်ကြက်လျက် ရှိရာ သဘာဝဝင်ရေ၊ မြစ်ရေတင်၊ ချောင်းပိတ်မြောင်းပိတ် စသည့် နည်းလမ်းများကို အသုံးပြုသည်။ ထိုမျှမက ဆည်ရေ၊ ရေစုတ်စက်ဖြင့် စုတ်တင်ရေတို့ဖြင့်လည်း နွေစပါးကို အောင်မြင်စွာ စိုက်ပျိုးလျက်ရှိပါသည်။

သီးထပ်ရင်သီးထပ်နွေစပါး စိုက်ခင်းများသည် စိမ်းစိုညိုမောင်းလျက်ရှိပြီး အပင်ဖြစ်ထွန်းမှုမှာ အမြဲ ကောင်းမွန်သည်ကို တွေ့မြင်ရသည်။ သွင်းရေရရှိရေးကို နွေစပါးရာသီတစ်လျှောက်လုံး ကြိုးစားပြီး အာဟာရ မြေသြဇာကိုလည်း အပင်ဖြစ်ထွန်းချိန်ကာလအတွင်း အကြိမ်ကြိမ်အလီလီကျွေးပေးသည်ကို တွေ့မြင်ရပါသည်။

မျိုးစေ့ကြဲပက် စိုက်ပျိုးပြီးသည်နှင့် လယ်မြေကို ရေပြတ်အခြောက်ခံ၍ အပင်ပေါက်လာသည့် ပေါင်းမြက်ပင်များကို သတ်ပစ်သည်။ နောက်ပိုင်းကာလများတွင်လည်း ပေါင်းမြက်ပင်များ ပေါက်ရောက်လာ ပါက လက်လုပ်နည်းဖြင့် ပိုင်နိုင်စွာနုတ်ပယ်သည်။ နွေစပါးစိုက်လယ်သမားကြီးများ၏ ပြုစုဂရုစိုက်ကြိုးစားမှုများသည် သီးထပ်ရင်စပါးမျိုးကို နှစ်စဥ်ဆက်တိုက် အထွက်ကောင်းစေလိုသောကြောင့် ဖြစ်မည်ဟု ယုံကြည် မိပါသည်။

ဆင်းသီဟ