အရသာရှိတဲ့ မုန့်ဆမ်းလုပ်စားကြည့်ပါ

မုန့်ဆမ်းကို အလွယ်တကူပြုလုပ်နိုင်ပြီး အချိန်လည်းမကြာပါဘူးရှင့်။ အညာဒေသတွေမှာ ဘုရားပွဲနဲ့ ရေငန်ပိုင် ဦးရှင်ကြီးကို ကပ်ရာတွင် အများအပြားပြုလုပ်ကြပြီး ဧည့်သည်တွေကို မုန့်ကျွေးတဲ့အလေ့အထအနေနဲ့လည်း မုန့်ဆမ်းနဲ့ ဧည့်ခံကြပါတယ်။ မီးလွတ်မုန့်တစ်ခုလည်းဖြစ်ပါတယ်။

မောင်းညိုချိန် ကောက်ညှင်းစပါးကို ရေစိမ် လှော်ပြီး ထောင်းလိုက်တဲ့အခါ မုန့်ဆမ်းရရှိတာဖြစ်ပါတယ်။ ကောက်ညှင်းစပါးတစ်တင်းကို မုန့်ဆမ်း ၁၀ ပြည်ထွက်ရှိတယ်လို့လည်း သိရပါတယ်။ (ဝရဇိန် ပေါင်)

လိုအပ်တဲ့ပစ္စည်းတွေက 

မုန့်ဆမ်း

သကြား

အုန်းသီး

မုန့်ဆမ်းကောက်ညှင်း ကို ဈေးမှာအလွယ်တကူဝယ်လို့ရပါတယ်။

ပုံ- မုန့်ဆမ်းဖတ်ပါ။

ပထမဆုံး ဝယ်လာတဲ့မုန့်ဆမ်းကောက်ညှင်းကို အမှိုက်အမှုန်များ ပြာပေးပါ။ ရေဆေးပြီး ဇကာနဲ့ ၅ မိနစ်လောက် စစ်ပေးပါ။ စစ်ထားသော မုန့်ဆမ်းကို သကြားနဲ့နယ်ပြီး ၁ နာရီလောက် နှပ်ထားပေးပါ (မုန့်ဆမ်း တစ်ပြည်ကို သကြား ၂၅ ကျပ်သား)။ နှပ်ထားတုန်း အုန်းသီးကို အမွှာသေးသေးတွေရအောင် ခြစ်ထားပါ။

၁ နာရီကြာရင် အပျော့အမာ အနေတော်တဲ့ သရေစာမုန့်ဆမ်းလေး ရပါပြီရှင့်။ နာရီဝက်လောက်ပဲနှပ်ချင်လို့ မာနေတာမျိုးဖြစ်နေရင်လည်း အုန်းရည်လေးကို တောက်တောက်ပေးလို့ရပါတယ်။ တစ်ချို့ကြိုက်နှစ်သက်သူကလည်း နို့စိမ်းထည့်ပါတယ်။ နို့စိမ်းကိုကျ နယ်တဲ့အချိန်မှာ တစ်ခါတည်းထည့်နယ်ပေးနိုင်ပါတယ်။ နို့စိမ်းထည့်ထားတဲ့အတွက် မုန့်မပျော့မမာ အနေတော်ပဲဆိုရင် ခဏပဲနှပ်ပေးရပါမယ်။

စားဖို့အသင့်အနေထားမုန့်ဆမ်းတွေကို စိတ်ကြိုက်ပုံဖော်ပြီး အုန်းသီးလေးတွေဖြူးပေးပြီး စားနိုင်ပါပြီ။

အရမ်းကောင်းတာမို့ မစားဖူးသေးဘူးဆိုရင် လုပ်စားကြည့်ဖို့ ပြောချင်ပါတယ်ရှင့်။

ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ဟုထည့်ပေးပါရန် မေတ္တာရပ်ခံအပ်ပါသည်။