ယခုလ ၂၅ ရက်ခန့်အထိ နိုင်ငံတစ်ဝန်း မိုးရွာသွန်းမှုများ ဆက်ရှိနေနိုင်

တောင်တရုတ်ပင်လယ်နဲ့ ဖိလစ်ပိုင်ပင်လယ်တို့မှာ ဖြစ်ပေါ်နေတဲ့ INVEST (လေဖိအားနည်းရပ်ဝန်း ဖြစ်နိုင် ချေအဆင့်) တွေရဲ့အခြေအနေ၊ Global Tropics Hazards Outlook က ထုတ်ပြန်တဲ့ ရပ်ဝေးခန့်မှန်းချက် တွေအရ ယခုလ ၂၅ ရက်အထိ နိုင်ငံတစ်ဝန်း မိုးရွာနိုင်တဲ့ အခြေအနေတွေ ဆက်ရှိနေနိုင်တယ်လို့ နိုင်ငံတကာမိုးလေဝသ ထုတ်ပြန်ချက်တွေကို ကိုးကားခန့်မှန်းသူ ဦးဝင်းနိုင်က ကြိုတင်ခန့်မှန်းပါတယ်။

ဒီအနေအထားတွေအရ ဘယ်ရက်တွေမှာ ဘယ်ဒေသတွေမှာ မိုးတွေများနိုင်သလဲ၊ ဘယ်အချိန်ကျမှ မိုးရွာသွန်းမှုတွေ လျော့သွားနိုင်သလဲ ဆိုတာတွေနဲ့ပတ်သက်လို့ ဦးဝင်းနိုင်ထံ Green Way က ဆက်သွယ်မေးမြန်းထားတာတွေကို ဖော်ပြပေးလိုက်ပါတယ်။

တောင်တရုတ်ပင်လယ်ဘက်မှာ လက်ရှိ မိုးလေဝသအခြေအနေတွေ ဘယ်လိုရှိနေလဲ..

“ ခု လက်ရှိ တောင်တရုတ်ပင်လယ်ထဲမှာ ရှိနေတဲ့ INVEST 90 W က သိပ်ပြီးတော့ အားမကောင်းဘူး။ သူ့ နောက်ဘက်က ခု MAYMAY လို့ ဖိလစ်ပိုင်က အမည်ပေးထားတဲ့ 98W ကနေ ဖြစ်လာမယ့် မုန်တိုင်းကတော့ ဖိလစ်ပိုင်နိုင်ငံမြောက်ပိုင်း လူဇွန်ကျွန်းရဲ့မြောက်ပိုင်းနဲ့ ထိုင်ဝမ်ကျွန်းကြားထဲကနေ ၁၆ ရက်နေ့လောက်မှာ ဖြတ်ပြီးတော့ တောင်တရုတ်ပင်လယ်ထဲကို ၁၇၊ ၁၈ လောက်မှာ ဝင်လာမယ်။ အဲ့ဒီမှာ အရှေ့၊ အရှေ့တောင်ဘက်ကို ဆက်ရွေ့မယ်။ ပြီးတော့ ဗီယက်နမ်နိုင်ငံ အရှေ့တောင်ပိုင်း လောက်ကမ်းခြေကို ၂၁ ရက်နေ့ ညပိုင်းလောက်ကို ထိမှာ။ ဖြတ်တော့မဖြတ်သေးဘူး။ အဲ့ဒီနေရာမှာ ဘာဖြစ်မလဲဆိုတာတော့ စောင့်ကြည့်ရမယ်။ နောက်တစ်ခုက ဘာထူးခြားတာ ရှိလဲဆိုတော့ သူ အဲ့ဒီ ဗီယက်နမ်ကမ်းခြေနားကို ချဉ်းကပ်လာတဲ့အချိန်မှာ ကပ္ပလီကျွန်းစုတွေနဲ့ ကော့သောင်နဲ့ ကြားမှာ လေဖိအားနည်းရပ်ဝန်းတစ်ခုဖြစ်လာနိုင်တယ်။ အဲ့ဒီလေဖိအားနည်းရပ်ဝန်းကလည်း ၂၁ ရက်နေ့ လောက်မှ ဖြစ်နိုင်မှာဆိုတော့ ရက်က တအားဝေးနေသေးတော့ ဘယ်ဆက်သွားမလဲဆိုတာတော့ ကြိုပြောဖို့ ခက်သေးတယ်”  

“ Global Tropics Hazards Outlook က ထုတ်ပြန်ထားတဲ့ဟာအရတော့ တောင်တရုတ်ပင်လယ်မှာကော၊ ဘင်္ဂလားပင်လယ်မှာကော၊ ဟိုဘက်က ဖိလစ်ပိုင်ပင်လယ်မှာကောက ၂၅ ရက်နေ့အထိ မုန်တိုင်းတွေ ဖြစ်နိုင်တယ်။ အဲ့ဒီတော့ ကျွန်တော်တို့ဘက်မှာကျတော့ မိုးက အနောက်ဘက်အခြမ်းဆိုတော့ ချင်းပြည်နယ်ပါတယ်။ ရခိုင်ပြည်နယ်ပါတယ်။ ဧရာဝတီတိုင်းပါတယ်။ ရန်ကုန်တိုင်းပါတယ်။ ပဲခူးတိုင်း ပါတယ်။ နောက်ပြီးတော့ မွန်၊ ကရင်၊ တနင်္သာရီ အဲ့ဒီနေရာတွေမှာ မိုးများမယ်။ ကျန်တဲ့နေရာတွေမှာတော့ ပုံမှန်မိုးရွာသွန်းသလောက်ပဲရှိမယ်လို့တွေ့တယ်။ ၂၅ ရက်နေ့ကျော်သွားရင်တော့ သူ့ရဲ့ခန့်မှန်းချက်နဲ့ အခု ဖြစ်နေတာတွေနဲ့ သွားကိုက်ညီနေတယ်။ အဲ့ဒီအပတ်ထဲကျရင် မုတ်သုံမျဉ်းက ကော့သောင်းရဲ့အောက်ဘက် အထိ ကျသွားမယ်။ ပြောမယ်ဆိုရင် မြန်မာပြည်တောင်ပိုင်းခြမ်းကနေ မုတ်သုံလေထွက်သွားပြီပေါ့။ အဲ့ဒီ အချိန်ကျရင် တစ်နိုင်ငံလုံးမှာ မိုးကတော်တော်နည်းသွားမယ်။ တောင်ပိုင်းအစွန်းနဲ့ ဟိုးကချင်ပြည်နယ် အစွန်းလောက်မှာပဲ မိုးဆက်များပြီး ကျန်နေနိုင်တယ်။ အဲ့လိုတော့ လောလောဆယ် တွေ့ထားတယ်” 

မိုးရွာသွန်းနိုင်တဲ့ အခြေအနေတွက ဘယ်လို ဖြစ်သွားမလဲ..

“ မိုးကတော့ရှိတော့ရှိနေမယ်။ သို့သော် လေစီးကြောင်းက အရှေ့မြောက်ဘက်ကနေ တိုက်နေမှာဆိုတော့ အရင်တုန်းကလိုမျိုး မြန်မာနိုင်ငံအလယ်ပိုင်းနဲ့ မြောက်ပိုင်းဘက်ကို အရှေ့ဘက်ကတိမ်တွေက မဝင်ဘဲနဲ့ တိမ်တွေက အရှေ့မြောက်လေစီးကြောင်းအတိုင်း အနောက်တောင်ဘက်ကိုဆက်ပြီးတော့ ရွေ့သွားမှာ။ ဆိုလိုတာက လာအို၊ ဗီယက်နမ်၊ ထိုင်းဘက်ကနေ ဝင်လာတဲ့တိမ်တွေက အရင်တုန်းကဆို အလယ်ပိုင်းနဲ့ မြောက်ပိုင်းရှမ်းပြည်ဘက် ဟိုးချင်းပြည်နယ်ဘက်ထိ ရောက်တယ်။ အခုကတော့ မြောက်ပိုင်း အလယ်ပိုင်း အဲ့ဒီဘက်တွေကို မရောက်တော့ဘဲနဲ့ တနင်္သာရီတိုင်းကိုဖြတ်ပြီးတော့ ကပ္ပလီပင်လယ်၊ ဘင်္ဂလားပင်လယ် ဘက်တွေကို ရွေ့သွားတယ်။ တိမ်တွေရွေ့သွားတဲ့လမ်းကြောင်းကိုက ပြောင်းသွားတာ” 

လာမည့် ၁ ရက်မှ ၃ ရက်အတွင်း၊ ၃ ရက်မှ ၅ ရက်အတွင်း၊ ၅ ရက်မှ ၁၀ ရက်အတွင်း ကြိုတင်ခန့်မှန်းချက်များ

“ နောက်လာမယ့် ၃ ရက်အတွင်းမှာဆိုရင်တော့ အလယ်ပိုင်းဒေသတွေမှာတော့ မိုးလျော့မယ်။ မကွေးတိုင်း နဲ့ စစ်ကိုင်းတိုင်းတောင်ပိုင်းပေါ့။ ၀.၂ လက်မလောက်ပဲရှိတော့မှာ။ ကျန်တဲ့နေရာတွေအကုန်လုံးမှာတော့ မိုးရွာနေမယ်။ ဒါပေမဲ့ ပါးပါးပဲရွာနိုင်မှာ။ ၁ လက်မခွဲလောက်ထိပဲ ရှိမယ်။ ကချင်ပြည်နယ် မြောက်ပိုင်းမှာ တော့ မိုးများတယ်။ ၃ လက်မလောက်ထိ ရွာနိုင်တယ်”  

“ နောက် ၃ ရက်ကနေ ၅ ရက်အတွင်း ဆိုရင်တော့ အလယ်ပိုင်းဒေသတွေမှာပါ မိုးပြန်ပြီးတော့ ရှိလာမယ်။ အများကြီးတော့မဟုတ်ဘူး။ ၀.၅ လက်မလောက်ပဲ။ ရှမ်းပြည်ဘက်မှာလည်း ၁ လက်မလောက်ထိ မိုးရေချိန်ရှိနိုင်တယ်။ ရခိုင်ပြည်နယ်ဘက်လည်း ၁ လက်မခွဲလောက်ရှိနိုင်တယ်။ ရန်ကုန်တိုင်း၊ ဧရာဝတီတိုင်း၊ ပဲခူးတိုင်း အဲ့ဒီနေရာတွေမှာလည်း ၁ လက်မခွဲကနေ ၂ လက်ကမလောက်ထိရှိနိုင်တယ်” 

“ နောက် ၅ ရက်ကနေ ၁၀ ရက်အတွင်းဆိုရင်တော့ ရှမ်းပြည်ဘက်မှာ မိုးနည်းသွားတယ်။ ကချင်ပြည်နယ်နဲ့ ချင်းပြည်နယ်တွေမှာတော့ မိုးများလာတယ်။ ကျန်တဲ့နေရာတွေမှာတော့ တနင်္သာရီတိုင်းတောင်ပိုင်းအစွန်း မြိတ်နဲ့ ကော့သောင်းတွေဘက်မှာဆို တော်တော့်ကို မိုးများနေမယ်။ ကော့သောင်ဆိုရင် ၇ လက်မလောက် ထိကို မိုးများနိုင်တယ်” 

( ဆရာဦးဝင်းနိုင်အနေဖြင့် Windy App ရှိ ကမ္ဘာလုံးဆိုင်ရာမိုးလေဝသ Model များဖြစ်သည့် ECMWF Model နှင့် GFS Model ခန့်မှန်းချက်များကို အသုံးပြု၍ ကြိုတင်ခန့်မှန်းခြင်း ဖြစ်ပါသည်)

Photos Crd_ U Win Naing

 (မိမိဒေသ မြို့နယ်တစ်ခုချင်းအလိုက် အသေးစိတ်မိုးလေဝသအခြေအနေများကို သိလိုပါက Green Way app ရှိ ‘ မေးကြ၊ ဖြေကြ ဒေသအလိုက် မိုးလေဝသ’ အဖွဲ့တွင် အခမဲ့အဖွဲ့ဝင်ပြီး ဆရာနှင့် တိုက်ရိုက်မေးမြန်းနိုင်ပါသည်)

ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ဟုထည့်ပေးပါရန် မေတ္တာရပ်ခံအပ်ပါသည်။