စူပါအယ်လ်နီညို၏ ငါးမွေးမြူရေးကဏ္ဍအပေါ် သက်ရောက်မှုများ

စူပါအယ်လ်နီညို (Super El Nino) ဆိုသည်မှာ ပစိဖိတ်သမုဒ္ဒရာအပူပိုင်းဒေသရှိ ရေပြင်အပူချိန်သည် ပုံမှန်ထက် ၂ ဒီဂရီဆဲလ်စီးရပ်စ်နှင့် အထက် ပိုမိုမြင့်တက်လာသည့် ပြင်းထန်သော ရာသီဥတုဖြစ်စဉ်တစ်ခု  ဖြစ်သည်။

စူပါအယ်လ်နီညိုနှင့် မွေးမြူရေး

စူပါအယ်လ်နီညိုရာသီဥတုကြောင့် ဖြစ်ပေါ်လာသည့် အပူချိန်လွန်ကဲမှု၊ မိုးခေါင်ရေရှားမှုနှင့် အပူလှိုင်းဖြတ်မှုများသည် မြန်မာနိုင်ငံရှိ မွေးမြူရေးကဏ္ဍ (တိရစ္ဆာန်မွေးမြူရေးနှင့် ငါး/ပုစွန်မွေးမြူရေး) အပေါ်သိသာထင်ရှားသော အနုတ်သဘော သက်ရောက်မှုများ ရှိသည်။

စူပါအယ်နီညိုနှင့် ငါးကန်

စူပါအယ်လ်နီညို (Super El Nino) ဖြစ်စဉ်သည် ကမ္ဘာတစ်ဝန်းတွင် အပူချိန်လွန်ကဲခြင်း၊ မိုးခေါင်ရေရှားခြင်းနှင့် ရာသီဥတုဖောက်ပြန်မှုများကို ဖြစ်စေပြီး ငါးမွေးမြူရေးကဏ္ဍနှင့် ငါးကန်များအပေါ် အောက်ပါအတိုင်း ဆိုးကျိုးများ သက်ရောက်စေနိုင်သည်။

ငါးကန်များအပေါ် သက်ရောက်မှုများ

၁။ ရေအပူချိန်မြင့်တက်ခြင်း

ရေပြင်အပူချိန်ပြင်းထန်စွာ မြင့်မားလာသောကြောင့် ရေထဲတွင် ပျော်ဝင်နေသော အောက်ဆီဂျင်ပမာဏ လျော့နည်းလာသည်။

၂။ အောက်ဆီဂျင်ပြတ်လပ်မှုနှင့် ရေပုပ်ခြင်း

အပူဒဏ်ကြောင့် ရေညှိနှင့် သဘာဝပစ္စည်းများ ဆွေးမြေ့ကာ ရေပုပ်ပြီး အောက်ဆီဂျင်ပြတ်လပ်ခြင်းကြောင့် ငါးများအစုလိုက်အပြုံလိုက် သေဆုံးတတ်သည်။

၃။ ရေရှားပါးမှု

 မိုးခေါင်ရေရှားမှုနှင့် ရေငွေ့ပျံနှုန်း မြင့်မားမှုကြောင့် ငါးကန်များတွင် ရေလုံလောက်စွာ ဖြည့်တင်းရန် ခက်ခဲလာသည်။

၄။ ရောဂါနှင့် ကပ်ပါးပိုးကျရောက်မှု

 ရေအပူချိန် မတည်မငြိမ်ဖြစ်ပြီး အရည်အသွေးကျဆင်းလာသောအခါ ငါးများတွင် ကိုယ်ခံအားကျဆင်းကာ မှိုနှင့် ကပ်ပါးရောဂါများ လွယ်ကူစွာ ဝင်ရောက်နိုင်သည်။

၅။  စရိတ်စက မြင့်တက်လာခြင်း

အယ်လ်နီညိုကြောင့် သဘာဝငါးဖမ်းလုပ်ငန်းများ ထိခိုက်ရသဖြင့် ငါးစာပြုလုပ်ရာတွင် အသုံးပြုသည့် ငါးမှုန့် (Fishmeal) ဈေးနှုန်းများ မြင့်တက်လာပြီး ငါးမွေးမြူရေး ကုန်ကျစရိတ်ကြီးမားလာသည်။

ကြိုတင်ကာကွယ်ရန် နည်းလမ်းများ

၁။ ရေအပူချိန်နှင့် အောက်ဆီဂျင်ကို ဂရုစိုက်ပါ

ကန်ရေအပူချိန်နှင့် ပျော်ဝင်အောက်ဆီဂျင်ပမာဏ (5 ppm အထက်) ကို မှန်မှန်စစ်ဆေးပြီး လိုအပ်ပါက ရေယဉ်တန်းများ၊ ရေပန်းများဖြင့် အောက်ဆီဂျင်ဖြည့်ပေးပါ။

၂။ အရိပ်အမိုးနှင့် ရေအနက် တိုးမြှင့်ပါ

 ကန်ရေမျက်နှာပြင် အပူချိန်မမြင့်စေရန် သို့မဟုတ် ငါးများ အပူဒဏ်မှ ရှောင်ရှားနိုင်ရန် ကန်ရေကို လုံလောက်သော အနက်ရှိအောင် ထိန်းထားပါ။

၃။ အစာကျွေးပုံ ချိန်ညှိပါ

ပူပြင်းသည့်အချိန်များတွင် အစာကို လျှော့ကျွေးပါ သို့မဟုတ် နေရောင်ခြယ်လှဲပြီး အေးမြချိန်များတွင် သင့်တင့်မျှတစွာ ကျွေးမွေးပါ။ အစာကြွင်းကျန်ခြင်း မရှိစေရန် အထူးဂရုပြုပါ။

၄။ အကျိုးပြုပိုးများ အသုံးပြုပါ

ရေအရည်အသွေး မယိုယွင်းစေရန် အကျိုးပြုဗက်တီးရီးယား (Probiotic) များကို အသုံးပြု၍ ရေထုသန့်စင်မှုကို ထိန်းသိမ်းပါ။
အချုပ်အားဖြင့်ဆိုရသော်

 စူပါအယ်လ်နီညို (Super El Nino) ဖြစ်စဉ်သည် ငါးမွေးမြူရေးကန်များအတွက် အဓိက အန္တရာယ်ကြီးမားသော ပတ်ဝန်းကျင်ဖိအားတစ်ခု ဖြစ်စေသောကြောင့် ကြိုတင်ကာကွယ်ရေးနည်းလမ်းများကို လိုက်နာကျင့်သုံးခြင်းဖြင့် ဆုံးရှုံးမှုနည်းနိုင်ပါကြောင်း လေ့လာရေးသားအပ်ပါသည်။

ဆောင်းပါးရှင်ဆရာမှ အစိမ်းရောင်လမ်းဆော့ဝဲသို့ ပေးပို့ထားသော အစိမ်းရောင်လမ်း၏ မူပိုင်ဆောင်းပါးဖြစ်သဖြင့် ဆောင်းပါးများ၊ သတင်းများ ကူးယူဖော်ပြလိုပါက “အစိမ်းရောင်လမ်းမှ ကူးယူဖော်ပြပါသည်ဟု” ထည့်ပေးပါရန် မေတ္တာရပ်ခံအပ်ပါသည်။