“အခြောက်ခံစက်နှင့် အသေးစား သိုလှောင်ရုံတည်ထောင်ရန် စိတ်ဝင်စားမှုရှိပါက တင်ပြအဆိုပြုနိုင်ကြောင်း ဖိတ်ခေါ်ခြင်း"

Photo - Photo - Flatbed Grain Dryer

၁။ မြန်မာနိုင်ငံဆန်စပါးအသင်းချုပ်အနေဖြင့် ဆန်စပါးသီးနှံ၏ ရိတ်သိမ်းပြီးနောက်ပိုင်း အရည်အသွေးမကျဆင်းစေရန်နှင့် ဆုံးရှုံးလျော့နည်းမှု သက်သာစေရန်ကိုလည်းကောင်း၊ စပါးများ စုပြုံပေါ်ချိန်တွင် အစိုဓာတ်မြင့်မားလေ့ရှိသော စပါးများအား စနစ်တကျ ဝယ်ယူအခြောက်ခံ သိုလှောင်ခြင်းဖြင့် ဝယ်လိုအားမြှင့်တင်နိုင်ကာ စပါးပေါ်ချိန် ဈေးကျဆင်းမှုအား ထိန်းသိမ်းနိုင်ရန်အတွက်လည်းကောင်း၊ ဈေးကွက်တည်ငြိမ်စေရန်အတွက် ကွင်းဆင်းဝယ်ယူရေး ဆောင်ရွက်သည့်အခါ စနစ်တကျအခြောက်ခံ၊ သိုလှောင်၊ ဝယ်ယူနိုင်ရေးအတွက်လည်းကောင်း၊ ကျေးလက်ဒေသတွင် ရင်းနှီးမြှုပ်နှံဆောင်ရွက်သည့် အသေးစား အလတ်စားလုပ်ငန်းများကို အားပေးနိုင်ရန်အတွက်လည်းကောင်း အဓိကရည်ရွယ်၍ အခြောက်ခံစက်နှင့် အသေးစားသိုလှောင်ရုံ ပူးတွဲပါဝင်သည့် ရပ်ရွာအခြေပြု Drying & Storage Project (DSP) ကို အကောင်အထည်ဖော်ရန် စီစဉ်ဆောင်ရွက်လျက်ရှိပါသည်။

၂။ ဤစီမံကိန်းကို ဆန်စပါးစိုက်ပျိုးထုတ်လုပ်မှု အချက်အချာကျသော မိုးစပါး၊ နွေစပါး စိုက်ပျိုးမှုရှိသည့် ကျေးရွာ၊ ရပ်ကွက်များတွင် ဦးစားပေးအကောင်အထည်ဖော်မည်ဖြစ်ပြီး၊ ဒေသခံတောင်သူများ၊ ဒေသခံအသေးစားလုပ်ငန်းရှင်များ၏ စုပေါင်းပါဝင်ထည့်ဝင်မှုဖြင့် ဆောင်ရွက်ရန် စီစဉ်လျက်ရှိပါသည်။ ခန့်မှန်းတွက်ချက်မှုအရ စီမံကိန်းတစ်ခု၏ ရင်းနှီးမြှုပ်နှံမှုတန်ဖိုးမှာ ကျပ်သိန်း (၁၇၀၀) ခန့်ရှိမည်ဟု ခန့်မှန်းထားပြီး ရင်းနှီးမြှုပ်နှံမှုကုန်ကျစရိတ်၏ အနည်းဆုံးသုံးပုံတစ်ပုံကို ဒေသခံများမှ ထည့်ဝင်ရန်နှင့် ကျန်လိုအပ်မှုကို သက်သာသောအတိုးနှုန်းဖြင့် ချေးငွေရရှိစေရန်ကိုလည်းကောင်း၊ နိုင်ငံတော်အစိုးရအပါအဝင် ဖွံ့ဖြိုးရေးမိတ်ဖက်အဖွဲ့အစည်းများထံမှ အထောက်အပံ့ရရှိစေရန်ကိုလည်းကောင်း အသင်းချုပ်အနေဖြင့် ကြိုးပမ်းဆောင်ရွက်မည်ဖြစ်ပါသည်။

၃။ အောက်ခြေအဆင့်၊ ကျေးရွာအဆင့်တွင် စုဖွဲ့ဆောင်ရွက်မှု အလေ့အထကို အားပေးအားမြှောက်ပြုရန်ရည်ရွယ်ပြီး ဒေသခံများ၊ တောင်သူလယ်သမားကြီးများ၏ ပါဝင်မှုကို ဦးစားပေးမည့်အစီအစဉ် ဖြစ်ပါသဖြင့် စိတ်ဝင်စား၍ လျောက်ထားအဆိုပြုရာတွင် အနည်းဆုံး (၅) ဦး စုဖွဲ့ဆောင်ရွက်သည့် အစုအဖွဲ့ဖြစ်ရန် လိုအပ်ပါသည်။ အသင်းချုပ်အနေဖြင့် ရမည်/ မရမည်ကို အာမခံမည်မဟုတ်ပဲ အသင်းချုပ်နှင့်အတူ ဖွံ့ဖြိုးရေးအတွက် ကြိုးပမ်းဆောင်ရွက်မှုတွင် ပါဝင်ဆောင်ရွက်လိုသူများကိုသာ ဖိတ်ခေါ်ခြင်းဖြစ်သည်။ သို့ပါ၍ ပူးပေါင်းပါဝင်ရန် စိတ်ဝင်စားမှုရှိပါက အသင်းချုပ်ရုံးဖုန်း ၀၁ – ၂၁၈၂၆၆၊ ၂၁၈၂၆၇၊ ၂၃၀၁၁၂၈၊ ၂၃၀၁၁၂၉ တို့သို့ဖြစ်စေ၊ Email : admin@mrf.com.mm နှင့် Facebook Messenger တို့မှဖြစ်စေ ဆက်သွယ်အဆိုပြု တင်ပြနိုင်ပါကြောင်း သတင်းထုတ်ပြန်အပ်ပါသည်။

မြန်မာနိုင်ငံဆန်စပါးအသင်းချုပ်



ယခုဆောင်းပါးက သင့်အတွက် အသုံးဝင်ပါသလား?

  ဆောင်ပုဒ်  

"နိုင်ငံတစ်ဝှမ်း စိမ်းလန်းဖို့ သစ်ပင်စိုက်ပျိုးစို့"