ထောပတ်သီး ပြည်ပဈေးကွက်ပျောက်၍ ပြည်တွင်းဈေး ကျဆင်း

ထောပတ်သီး ပြည်ပဈေးကွက် ပျောက်သွားသဖြင့် ယခုနှစ် ပြည်တွင်း ထောပတ်သီးဈေးကွက်တွင် ပြည်ပတင်ပို့သည့် Hass အမျိုးအစား ထောပတ်သီး ဈေးကျဆင်းနေကြောင်း ထောပတ်သီး ရောင်းဝယ်ရေး လုပ်ကိုင်သူများထံမှ သိရသည်။

လက်ရှိ ပြည်တွင်း ထောပတ်သီး လက်ကားဈေးကွက်တွင် Hass ထောပတ်သီး အကြီး/အလတ် အရော တစ်ကီလိုလျှင် ကျပ် ၁,၉၀၀ နှုန်းသာ ဈေးပေါက်နေကြောင်း သိရသည်။

အဆိုပါ ဈေးနှုန်းသည် Hass ထောပတ်သီးကို အနည်းဆုံး ၃၅ ကီလိုမှစ၍ ဝယ်ယူရမည့် ဈေးတန်းဖြစ်ကြောင်း၊ Hass ထောပတ်သီး အကြီးသီးသန့် ဈေးအနေဖြင့် တစ်ကီလိုလျှင် ကျပ် ၂,၅၀၀ မှ ကျပ် ၃,၀၀၀ နှုန်းရှိပြီး ၅ ကီလိုမှ စတင်ဝယ်ယူရမည် ဖြစ်ကြောင်း သိရသည်။

"တောင်သူတွေကို သနားပေမဲ့ ထောပတ်သီးက အဝင်များပြီး စားသုံးမှုနည်းတော့ ဈေးလျှော့ချ ရောင်းနေရတာ။ ဒီနှစ် ဈေးတန်းက အဆိုးဆုံးပဲ။ အရင် ဩဂုတ်လတုန်းကတောင် တစ်ကီလို ကျပ် ၂,၂၀၀ ရှိသေးတယ်။ ဒီလထဲမှာ ထပ်ပြုတ်ကျသွားတာ။ ထောပတ်သီး အသေးတွေဆို ကျပ် ၁,၀၀၀ အောက်ပဲ ရှိမယ်" ဟု ရှမ်းတောင်မှ ထောပတ်သီး လက်လီလက်ကား ရောင်းချသူ တစ်ဦးက ပြောသည်။

ယခုရာသီသည် ထောပတ်သီး ခူးဆွတ်ရသည့် ကာလဖြစ်သဖြင့် ပွဲရုံများတွင် ထောပတ်သီးများ ဝင်ရောက်မှုများပြီး ဝယ်လိုအားနှင့် ရောင်းလိုအား မမျှသည့် အခြေအနေများကြောင့် ဈေးနှုန်းလျှော့ချ ရောင်းနေရခြင်း ဖြစ်ကြောင်း သိရသည်။

သစ်သီးဝလံ၏ သဘာဝအရ ခူးဆွတ်ပြီး လတ်လတ်ဆတ်ဆတ် ရှိနေချိန်တွင်သာ ရောင်းအားကောင်းပြီး ရက်ကြာသွားပါက ရောင်းချရမှု နည်းကာ ပို၍ အရှုံးပေါ်နိုင်သည့်အတွက်လည်း အသီးလတ်ဆတ်ချိန်တွင် ရောင်းသူ/ဝယ်သူ နှစ်ဦးနှစ်ဖက် အဆင်ပြေအောင် ရောင်းချနေရခြင်း ဖြစ်ကြောင်း သိရသည်။

ပြည်တွင်း ထောပတ်သီးဈေး စံချိန်တင် ကျဆင်းသွားသဖြင့် တောင်သူများလည်း အရှုံးနှင့် ရင်ဆိုင်နေရကြောင်း သိရသည်။

"ထောပတ်သီးက ပြည်ပက မဝယ်တော့ ဒီနှစ် အတော်လေး ရှုံးကြမှာပေါ့။ ခုတောင် ဈေးက ကျနေတာ။ ပြည်တွင်း စားသုံးမှုက နည်းတယ်လေ။ အခုက ပိုလျှံနေတာက အများကြီးဆိုတော့ အကုန် ထိခိုက်တာပေါ့။ ထောပတ်သီးက ပြည်ပဈေးကွက် အဓိက မှီခိုရတာ" ဟု ထောပတ်သီး ကုန်သည် တစ်ဦးက ပြောသည်။

ပြည်တွင်း ထောပတ်သီး လက်ကားဈေးကွက်တွင် Hass ထောပတ်သီးဈေး ကျဆင်းသော်လည်း လက်လီဈေးကွက်တွင် တစ်ကီလိုလျှင် ကျပ် ၇,၀၀၀ အထိ ရောင်းချမှု ရှိနေသဖြင့် စားသုံးသည့် ပြည်သူများမှာ ဈေးကြီးပေး ဝယ်စားနေရကြောင်း သိရသည်။

ထောပတ်သီးကို ပြည်တွင်း စားသုံးမှုအနေဖြင့် တန်ချိန် ၅,၀၀၀ ဝန်းကျင်သာ ရှိပြီး ပြည်ပ တင်ပို့နိုင်ခြင်း မရှိသဖြင့် ပိုလျှံသည့် တန်ချိန်မှာ ၁၅,၀၀၀ ဝန်းကျင် ရှိကြောင်း သိရသည်။

ယခင် ထောပတ်သီးရာသီတွင် ထိုင်းသို့ နယ်စပ်လမ်းကြောင်းမှ ထောပတ်သီး တင်ပို့ခွင့် ရရှိခဲ့သော်လည်း ယခုရာသီတွင်မူ တင်ပို့ခွင့်ကို ထိုင်းနိုင်ငံက တားမြစ်ခဲ့သဖြင့် မြန်မာ့ထောပတ်သီးသည် ပြည်ပဈေးကွက် ပျောက်ခဲ့ရသည်။

AMIA (ဈေးကွက်နှင့် သတင်းအေဂျင်စီ)မှ အစိမ်းရောင်လမ်းဆော့ဝဲသို့ ပေးပို့ထားသော အစိမ်းရောင်လမ်း၏ မူပိုင်ဆောင်းပါးဖြစ်သဖြင့် ဆောင်းပါးများ၊ သတင်းများ ကူးယူဖော်ပြလိုပါက “အစိမ်းရောင်လမ်းမှ ကူးယူဖော်ပြပါသည်ဟု” ထည့်ပေးပါရန် မေတ္တာရပ်ခံအပ်ပါသည်။