တစ်ပတ်စာ သီးနှံဈေးကွက် သုံးသပ်ချက် (၁၄ - ၁၈.၉.၂၀၂၆)

အိန္ဒိယနိုင်ငံ ဝယ်လိုအားရှိနေသည့် ပဲစဉ်းငုံက ပြည်တွင်းဈေးမာနေချိန် တရုတ်ဝယ်အားပျော့သည့် ပဲတီစိမ်းက ဈေးငြိမ်နေသည်။ ထို့ပြင် လက်ကျန်လျော့နည်းလာသည့် ကြက်သွန်နီက မိုးကြက်သွန်မပေါ်မီ ဈေးဆက်မာလာသည်။

ဈေးကောင်းနေသည့် ပဲစဉ်းငုံ

အိန္ဒိယသို့ တင်ပို့နေသည့် ပဲစဉ်းငုံ ပြည်တွင်းဈေး ထပ်မံမြင့်တက်ပြီး ပြည်ပရောင်းချသည့် FOB ဈေးငြိမ်နေသည်။

အိန္ဒိယနိုင်ငံတွင် ပဲစဉ်းငုံ စိုက်ပျိုးထုတ်လုပ်မှုအပေါ် စိုးရိမ်မှုများနှင့် အာဖရိကပဲစဉ်းငုံဈေး မြင့်တက်မှုကြောင့် ပြီးခဲ့သည့် ရက်သတ္တပတ်များတွင် မြန်မာ့ပဲစဉ်းငုံဈေးများ မြင့်တက်ခဲ့သည်။ သို့သော် ယခုရက်သတ္တပတ်တွင် အိန္ဒိယဈေးကွက်၌ မြန်မာ့ပဲစဉ်းငုံ FOB ဈေးငြိမ်နေသည်။ ပဲစဉ်းငုံတစ်တန် အမေရိကန်ဒေါ်လာ ၈၅၅ ဒေါ်လာ ဈေးဖွင့်သည်။

မြန်မာနိုင်ငံတွင် ပဲစဉ်းငုံ FOB ဈေးက ခေတ္တငြိမ်နေသည်။ ပဲစဉ်းငုံ (နီ) 2024-25 Crop တစ်တန် ဒေါ်လာ ၈၁၀/၈၂၀၊ ပဲစဉ်းငုံ (နီ) 2025-26 Crop တစ်တန် ဒေါ်လာ ၈၄၀/၈၅၀ ဈေးဖွင့်သည်။

သို့သော် စက်တင်ဘာ ၁၇ ရက်အထိ ပြည်တွင်းပဲစဉ်းငုံဈေးက ပဲတစ်တန် ကျပ် ၃၅,၀၀၀ ဈေးတက်လာသည်။ အိန္ဒိယသို့ အဓိကထားတင်ပို့နေသည့် ပဲများထဲတွင် လက်ရှိ ပဲစဉ်းငုံဈေး လှုပ်ရှားမှုများနေသည်။

ပြည်တွင်းဈေးကွက်တွင် ပဲစဉ်းငုံ (နီ) တစ်တန် ကျပ် ၃,၄၅၀,၀၀၀ မှ ၃,၄၈၅,၀၀၀ အထိ ဈေးမြင့်တက်လာသည်။

မန္တလေးဈေးကွက်တွင် ပြီးခဲ့သည့် ရက်သတ္တပတ်တွင် ပဲစဉ်းငုံ (နီ) တစ်တန် ကျပ် ၃၃ သိန်းကျော်မှ ယခုရက်သတ္တပတ်တွင် ကျပ် ၃,၃၉၀,၀၀၀ ကျော်သို့ ဈေးပြောင်းသွားသည်။

ဈေးဆက်ငြိမ်နေသည့် ပဲတီစိမ်း

တရုတ်နိုင်ငံသို့ အဓိကထားတင်ပို့နေသည့် ပဲတီစိမ်းက စက်တင်ဘာ ၁၄ - ၁၈ ရက်သတ္တပတ်တွင် ပြည်တွင်းဈေးငြိမ်နေပြီး ပဲတီစိမ်းအမျိုးအစားအချို့၏ ပြည်ပဈေး အနည်းငယ်ကျရိပ်သန်းနေသည်။

တရုတ်နိုင်ငံအတွင်း ပဲတီစိမ်းအသစ်ပေါ်ချိန်ဖြစ်သောကြောင့် ဝယ်လိုအားပျော့သော်လည်း လကုန်ပိုင်းတွင် အမှာများရရှိလေ့ရှိသည့် အခြေအနေကိုလည်း မျှော်လင့်နေကြသည်။

စက်တင်ဘာ ၁၄ - ၁၈ ရက်သတ္တပတ်တွင် ပဲတီစိမ်း ပြည်ပရောင်းချသည့် FOB ဈေးက ပဲတီစိမ်း (ရွှေဝါ) FAQ အမျိုးအစား တစ်တန် ဒေါ်လာ ၉၀၀/၉၁၀ မှ ၈၉၀/၉၀၀ သို့ ဈေးပြောင်းပြီး ပဲတီစိမ်း (အညာ) FAQ အမျိုးအစား တစ်တန် ဒေါ်လာ ၇၅၀/၇၆၀ တွင် ဈေးငြိမ်နေသည်။

ပဲတီစိမ်း ပြည်တွင်းဈေးက ပဲတီစိမ်း (အညာ) တစ်ပိဿာ ကျပ် ၄,၀၀၀/၄,၀၂၀၊ ပဲတီစိမ်း (ခရမ်း၊ ပဲခူး) ရွှေဝါ တစ်ပိဿာ ကျပ် ၅,၆၆၅၊ ပဲတီစိမ်း (ဝါးခယ်မ) FAQ တစ်ပိဿာ ကျပ် ၄,၅၀၀/၄,၅၂၀ ဈေးဖွင့်သည်။

မြေပဲဈေး အပြောင်းအလဲ

ဆီထွက်သီးနှံ မြေပဲ ပြည်တွင်းဈေး အနည်းငယ် အပြောင်းအလဲရှိသော်လည်း ပြည်ပဈေးငြိမ်နေသည်။ ရန်ကုန်ဈေးကွက်တွင် မြေပဲ FOB ဈေးက မြေပဲ (လုံးဆန်) တစ်တန် ဒေါ်လာ ၂,၀၇၅/၂,၀၈၅ ဖြင့် ဈေးငြိမ်နေသည်။

ပြည်တွင်းဈေးကွက်တွင် မြေပဲက ဆီစက်သမားနှင့် လုပ်ငန်းသမား ဝယ်လိုအား၊ မြေပဲအသစ် ဈေးကွက်ဝင်လာမှုအပေါ် မူတည်ပြီး ဈေးနှုန်း အနည်းငယ် အပြောင်းအလဲရှိနေသည်။

ပြီးခဲ့သည့် ရက်သတ္တပတ် မန္တလေးဈေးကွက်တွင် တစ်တန် ကျပ် ၇,၆၅၀,၀၀၀ ကျော် ဈေးဖွင့်ခဲ့သည့် မြေပဲ S1 လုံးဆန်က ယခုရက်သတ္တပတ်တွင် တစ်တန် ကျပ် ၇,၅၉၀,၀၀၀ ကျော်သို့ ဈေးပြောင်းသွားသည်။ မြေပဲ (အနီ) လုံးဆန်က တစ်တန် ကျပ် ၇,၅၃၀,၀၀၀ ကျော်ဖြင့် ဈေးငြိမ်နေသည်။ မြေပဲ S1 (ဆီဆန်) က တစ်တန် ကျပ် ၇၂ သိန်းကျော်မှ ၇,၅၉၀,၀၀၀ ကျော်၊ မြေပဲအနီ (ဆီဆန်) က တစ်တန် ကျပ် ၆,၅၅၀,၀၀၀ ကျော်မှ ၇၃ သိန်းကျော်သို့ ဈေးပြောင်းသွားသည်။

လက်ကျန် အခြေအနေကြောင့် ဈေးမာနေသည့် ကြက်သွန်နီ

ပြည်တွင်း လက်ကျန်အခြေအနေနှင့် ဈေးကွက်တင်ပို့နိုင်မှုက လက်ရှိ ကြက်သွန်နီဈေးကို တွန်းအားတစ်ခုဖြစ်လာသည်။

ပျမ်းမျှ တစ်ရက် ပိဿာချိန် ၁၅၀,၀၀၀ ဝန်းကျင် လိုအပ်နေသော ရန်ကုန်ဈေးကွက် ဝယ်လိုအား ဖြည့်နိုင်မည့် ကြက်သွန်နီ လက်ကျန်အခြေအနေကလည်း ကြက်သွန်နီဈေးအပေါ် သက်ရောက်မှုရှိနေသည်။ မိုးကြက်သွန်အသစ် ဝင်မှသာ လက်ရှိဈေးမာမှုကို အထိန်းအထေ့ လုပ်နိုင်မည်ဆိုသည့် သုံးသပ်ချက်များလည်း ရှိနေသည်။

လက်ရှိ ပြည်တွင်း ကြက်သွန်နီ အဓိကစိုက်ပျိုးသည့် တိုင်းကြီး ၃ တိုင်းတွင် လက်ကျန်လျော့နည်းနေသည်။

ရန်ကုန်ဈေးကွက်သို့ ကြက်သွန်နီအဝင်ကလည်း တစ်ရက် ပျမ်းမျှ ပိဿာချိန် တစ်သိန်းကျော်သာရှိသဖြင့် ဈေးကွက်မှ လိုအပ်သည့်ပမာဏကို မဖြည့်နိုင်ပေ။

ထို့ကြောင့် ရန်ကုန်ဈေးကွက်တွင် ယခုရက်သတ္တပတ် ကြက်သွန်နီ လက္ကားဈေးက ဆိပ်ဖြူ (ရှယ်) တစ်ပိဿာ ကျပ် ၆,၃၀၀ မှ ၆,၆၀၀၊ မုံရွာ (ရှယ်) တစ်ပိဿာ ကျပ် ၆,၄၀၀ မှ ၆,၆၀၀၊ မြင်းခြံ (ရှယ်) တစ်ပိဿာ ကျပ် ၆,၆၀၀ ဈေးဖွင့်သည်။

AMIA (ဈေးကွက်နှင့် သတင်းအေဂျင်စီ)မှ အစိမ်းရောင်လမ်းဆော့ဝဲသို့ ပေးပို့ထားသော အစိမ်းရောင်လမ်း၏ မူပိုင်ဆောင်းပါးဖြစ်သဖြင့် ဆောင်းပါးများ၊ သတင်းများ ကူးယူဖော်ပြလိုပါက “အစိမ်းရောင်လမ်းမှ ကူးယူဖော်ပြပါသည်ဟု” ထည့်ပေးပါရန် မေတ္တာရပ်ခံအပ်ပါသည်။