ပတ်ဝန်းကျင်ထိန်းသိမ်းရေးနှင့် အနုပညာရှင်တို့ရဲ့ ပူးပေါင်းပါဝင်မှု

ဒီမနက် ရုံးသွားဖို့ ပြင်ဆင်နေတုန်းမှာ ဖွင့်ထားတဲ့ တီဗွီကြည့်လိုက်တော့ ဇာတ်ကားထဲမှာ စိုးမြတ်နန္ဒာ ဝတ်ထားတဲ့ တီရှပ်လေးကို သတိထားမိတယ်။ မင်းသား ပြေတီဦးနဲ့ ရိုက်ထားတာပါ။ ဇာတ်ကား နာမည်ကြည့်လိုက်တော့ “ရင်ခုန်သံကို မညာကြေးနော်” တဲ့။ ဒါရိုက်တာ ဘယ်သူလဲ ကျွန်တော် မသိဘူး။ ဘယ်အချိန်တုန်းက ရိုက်ထားတာလဲ ကျွန်တော်မသိဘူး။ ဘာအကြောင်းအရာလဲ ကျွန်တော်မသိဘူး။ ရုံးမသွားခင် အချိန်လေး လျှပ်တစ်ပြတ် ကြည့်လိုက်တဲ့ အချိန်လေးမှာ မင်းသမီး ဝတ်ထားတဲ့ အင်္ကျီလေးက ကျွန်တော်ကို စိတ်ဝင်စားအောင် စွဲဆောင်နေတယ်။

ကျွန်တော် မြန်မာကားတွေ အနည်းငယ် ကြည့်ဖူးပါတယ်။ အချစ်ကား၊ အလွမ်းကား၊ ဇာတ်ကြမ်းကား၊ ဟာသကားတွေ အထဲမှာ ရိုးရိုးသားပြောရရင် ဒီလို အင်္ကျီမျိုး ဝတ်တာ တစ်ခါမှ မတွေ့ဖူးပါဘူး။ ကျွန်တော်ပဲ သတိမထားမိတာလား၊ ကျွန်တော် မကြုံကြိုက်လို့ မကြည့်မိလိုက်တာလား။ ဒီတစ်ခါတော့ ကျွန်တော်ရင်ထဲကို ဒီမြင်ကွင်းလေးက စွဲလမ်းသွားစေပါတယ်။

ကျွန်တော် မင်းသမီး သို့မဟုတ် ဒါရိုက်တာက ရည်ရွယ်ချက်ရှိရှိ ဝတ်တာလား၊ တိုက်ဆိုင်သွားတာလားတော့ မသိပါ။ မည်သို့ပင်ဖြစ်စေကာာမှု ဝမ်းသာကြည်နူးမိတာတော့ အမှန်ပင်ဖြစ်ပါတယ်။ မင်းသမီး စိုးမြတ်နန္ဒာဝတ်ထားသော တီရှပ်အကျီအနက်ပေါ်မှာ အစိမ်းနုရောင် လေးထောင့်ကွက်ကြီးကြီးတစ်ခု ထင်ထင်ရှားရှားတွေ့ရပြီး ထိုအပေါ်မှာ အဖြူရောင်စာလုံးဖြင့် ရိုးရှင်းစွာ ရေးထားသည်သော “Stop Global Warming” သည် ကြည့်ရှုသူ ပရိတ်သတ်ကို သတိထားမိစေတယ် (သတိထားကြည့်မိသောသူအတွက်)။ မြန်မာလို ရိုးရှင်းစွာ ဘာသာပြန်ရလျှင် “ကမ္ဘာကြီး ပူနွေးလာမှု ရပ်” ဟု ပြန်ဆိုရင် မှန်ကန်မယ် ထင်ပါတယ်။

မြန်မာ့လူမှုပတ်ဝန်းကျင် အများစုမှာ (အထူးသဖြင့် အနုပညာ) ဖက်ရှင် ကို ရှေ့တန်းတင် ပြိုင်ပွဲ ဆင်နေချိန်မှာ ဒီလို ပညာပေး စာသားပါတဲ့ အညတရ တီရှပ်တစ်ထည်ကို ဝတ်ဆင်ဖို့ စိတ်ကူးဟာ ကျွန်တော့် အတွက်တော့ ထူးဆန်းနေတာအမှန်ပါ။

အနုပညာရှင်တွေနဲ့ ပတ်သတ်ပြီး ပရဟိတ လုပ်ငန်းတွေမှာ ပါဝင်နေကြတဲ့ သတင်းတွေ မကြာခဏ ကြားနေရပေမယ့် ပတ်ဝန်းကျင် ထိန်းသိမ်းရေးကို အရေးတယူ လုပ်ပြီး ပါဝင်နေတဲ့ သူတွေ ဘယ်သူတွေရှိမလဲ။ ကျွန်တော် တော်တော် ညံ့ပါတယ်။ ကျွန်တော် သိပ်မသိပါဘူး။ ဂေဟဟိတ ပတ်ဝန်းကျင် ထိန်းသိမ်းရေး ကွန်ယက် ရုံးခန်းကို ရောက်နေစဉ်အခါက သရုပ်ဆောင် လူမင်းက သူရဲ့ ဇာတ်လမ်းထဲမှာ ထည့်သွင်းရိုက်ကူးချင်လို့ ဂေဟဟိတမှာရှိတဲ့ ပတ်ဝန်းကျင် ထိန်းသိမ်းရေး လက်ကမ်းစာဆောင်တွေ လာယူတာ ကြုံဖူးပါတယ်။ အဲဒီဇာတ်လမ်းကိုတော့ အခုထိ မကြည့်ဖူးသေးပါဘူး။ အခြားဘယ်သူတွေ ရှိနေအုံးမလဲ။ သိတဲ့သူများရှိရင် လေ့လာဖို့ အကြံပြုပေးပါလား။

နိုင်ငံတကာ အနုပညာရှင်တွေထဲမှာတော့ ကျွန်တော်တို့အားလုံး ရင်းရင်းနှီးနှီးသိနေတဲ့ တိုက်တန်းနစ် မင်းသား လီယိုနာဒို ဒီကပ်ရီယို က တက်တက်ကြွကြွပါဝင် လှုပ်ရှားနေတာ တွေ့ရပါတယ်။ သူကိုယ်တိုင် စီစဉ်ရိုက်ကူးထားတဲ့ “The 11th Hour” ဆိုတဲ့ ဇာတ်ကားက ကမ္ဘာကြီး ပူနွေးလာမှုကို ဖော်ညွှန်းထားတဲ့ ဇာတ်ကားပဲ ဖြစ်ပါတယ်။ သူရဲ့ ကိုယ်ပိုင် ဖောင်ဒေးရှင်းကနေပြီး သစ်တော ထိန်းသိမ်းကာကွယ်ရေး၊ ပင်လယ်သမုဒ္ဒရာ မပျက်စီးရေး၊ သန့်ရှင်းသော ရေ ရရှိရေး၊ ပြန်လည် ဖြည့်တင်းနိုင်သော စွမ်းအင် ကဏ္ဍ စသည့် ပတ်ဝန်းကျင်ရေးရာများကို အားသွန်ခွန်စိုက် လုပ်ဆေင်နေပါတယ်။

နောက်ပြီး ဘရက်ပစ်၊ အဆိုတော် ဂျက်ဂျွန်ဆင်၊ ဂျိန်းစ် ကမ်မရွန်း စတဲ့ အနုပညာရှင်တွေကလည်း ပတ်ဝန်းကျင်ထိန်းသိမ်းရေးမှာ ရှေ့တန်းကနေ ဥိးဆောင်ပြီး ပါဝင်လှုပ်ရှားနေကြသူများ ဖြစ်ပါတယ်။ ပရိတ်သတ်တွေ ချစ်တဲ့ အနုပညာရှင်တွေက ပါဝင်လှုပ်ရှားနေတော့ သူ့တို့ပရိတ်သတ်တွေလည်း အနည်းဆုံးတော့ ဒီလုပ်ငန်းစဉ်တွေအပေါ်မှာ သတိထားမိလာမှာတော့ အမှန်ပင်။

ဒါဆို ကျွန်တော်တို့ မြန်မာနိုင်ငံမှာရော……………………………