ဘလူးတု (Bluetooth) အကြောင်းသိကောင်း စရာ

“ခေတ်မီတောင်သူဖြစ်ဖို့ ဒစ်ဂျစ်တယ်နည်းပညာ လေ့လာစို့” အစီစဥ်လေးကနေ ပြန်လည်ကြိုဆိုလိုက်ပါတယ် ခင်ဗျ။ ယခင်တစ်ပတ်ကတော့ ဖုန်းငွေလက်ကျန် နည်းနေချိန် စာတို မက်ဆေ့ချ် ပေးပို့တဲ့နည်းကို မျှဝေ ပေးခဲ့ပါတယ်ခင်ဗျ။ ယခုတစ်ပတ်မှာတော့ ဘလူးတု အကြောင်းကို မျှဝေပေးမှာ ဖြစ်ပါတယ် ခင်ဗျ။ 

တောင်သူဦးကြီးတွေ ဖုန်းတွေမှာ ပါတဲ့ ဘလူးတု (Bluetooth) ဆိုတာလေး ကိုသိကြလားဗျ။ ကျွန်တော်တို့ အခုလက်ရှိ ပုံတွေ၊ ဗီဒီယိုတွေ၊ ဆော့ဝဲလ်တွေ ကူးနေတဲ့ ဇာပြာ (Zapya) မပေါ်ခင်ကဆိိုရင် ဘလူးတုလေးကို အသုံးပြုပြီး ကူးခဲ့ရတာ ဖြစ်ပါတယ်။ ဘလူးတုကို အသုံးပြုပြီး သီချင်းဖွင့်တာမျိုးတွေ၊ ဖုန်းပြောတာမျိုးတွေလည်း လုပ်လို့ရပါသေးတယ်။ 

ဘလူးတု ဆိုတာ ကြိုးမသုံးဘဲ ရေဒီယိုလှိုင်းကို အသုံးပြုပြီး ဆက်သွယ်ပေးနိုင်သော ကြိုးမဲ့ဆက်သွယ်ရေး နည်းပညာစနစ် ဖြစ်ပါတယ် ခင်ဗျ၊၊

တစ်စက္ကန့်ကို တစ်မီဂါဘိုက် (1MB) အမြန်နှုန်းနဲ့ သယ်ဆောင်နိုင်ပါတယ်၊၊ ဆက်သွယ်နိုင်တဲ့ အကွာအဝေးက ၁၀မီတာ (ပေ၃၀ ခန့်) အကွာအဝေးအတွင်းဖြစ်ပါတယ်၊၊ ရေဒီယိုလှိုင်းကို အခြေခံထားတာဖြစ်လို့ နေရာမရွေး ဆက်သွယ်နိုင်တာပဲ ဖြစ်ပါတယ်၊၊

ယနေ့ခေတ်မှာ ဘလူးတု (Bluetooth) ကို လူသုံးပစ္စည်းတွေနဲ့ပါ ဆက်သွယ်နိုင်အောင် တီထွင်လာကြပါတယ်၊၊ ကြိုးမဲ့နားကြပ်တပ်ထားရင် ဖုန်းကို လက်က မကိုင်ဘဲ ပြောနိုင်လာကြတယ်၊၊ ဖုန်းအချင်းချင်း နှစ်သက်ရာ သီချင်းဖိုင်၊ စာသားဖိုင်တွေကို အပြန်အလှန် ပေးနိုင်လာတယ်၊၊ ဒီလောက်ဆိုရင် ဘလူးတု အကြောင်းကိုဦးကြီးတွေ အခြေခံအားဖြင့် သိသွားမယ်လို့ ယုံကြပါတယ် ခင်ဗျ။ တနင်္လာနေ့တိုင်း ယခုအစီစဥ်လေးကို ဖော်ပြမှာ ဖြစ်လို့ စောင့်ကြည့်ပေးကြပါအုံး ခင်ဗျ။

   ယခင်တစ်ပတ်ကဖော်ပြခဲ့တဲ့ ဖုန်းငွေလက်ကျန် နည်းနေချိန် စာတို မက်ဆေ့ချ် ပေးပို့တဲ့ ဆောင်းပါလေးကို ပြန်လည်ဖတ်ရှုချင်ရင်တော့ ဖော်ပြပါ လင့်ကနေတစ်ဆင့် ဝင်ရောက်ဖတ်ရှုနိုင်ပါတယ် ခင်ဗျ။ 

ဖုန်းငွေလက်ကျန်နည်းနေချိန် ဖုန်းပြန်ခေါ်ပေးဖို့ စာဘယ်လိုပို့ရမလဲ(ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ကို ထည့်ပေးရန် မေတ္တာရပ်ခံအပ်ပါသည်)