အမွှေးတိုင်အငွေ့က လူ့ကျန်းမာရေးကို ဆိုးကျိုးဖြစ်စေပါသလား

စိုက်ပျိုးရေးနဲ့ မဆိုင်ပေမယ့် ဗဟုသုတ အိမ်ရှင်မ ဖတ်စာပါ

Incense sticks လို့ခေါ်သော အမွှေးတိုင်က ထွက်လာတဲ့ incense smoke လို့ခေါ်သော အမွှေးတိုင်အငွေ့ သည် လူ့ကျန်းမာရေးကို ဆိုးကျိုးဖြစ်စေပါသလားဆိုတဲ့ အကြောင်းပါ။ တကယ်တော့ ကျနော်က ခြင်ဆေးခွေအနံ့ကို လုံးဝမခံနိုင်ပေမယ့် အမွှေးတိုင်ထွန်းပြီး ဘုရားကန်တော့ရတာကို အင်မတန်စိတ်ကြည်နူးတတ်ပါတယ်။ မိမိနှစ်သက်သော အရာကို စိတ်ချလက်ချအမြဲလုပ်ဖို့ဆိုရင် ဒီအမွှေးတိုင်အငွေ့သည် အန္တရာယ်ရှိ/မရှိ လေ့လာဖို့လိုတယ်လို့ ယူဆပြီး ကျနော်လေ့လာဖြစ်ပါတယ်။ အဲဒီသိရှိချက်လေးတွေကို ပြန်ဆွေးနွေးမှာပါ။ 

ပုံမှန်အားဖြင့်တော့ အမွှေးတိုင်ထုတ်လုပ်မှုမှာ organic compound တွေ natural compound တွေ နဲ့ aromatic fragrance လို့ခေါ်သော အနံ့ပါတဲ့ အဆီတမျိုးမျိုး စတဲ့ပစ္စည်းရယ် အငွေ့အဖြစ်ထုတ်နိုင်တဲ့ benzene လိုအရာတွေ ပါဝင်ပါတယ်။ အဆိပ်အာနိသင်ပြင်းထန်သော ပါဝင်ပစ္စည်းများမပါပါဘူး။

သို့သော် ထိုဖော်ပြပါ ပါဝင်ပစ္စည်းများကို စုစည်းဖော်စပ်ထားတဲ့အမွှေးတိုင်ကို မီးရှို့လိုက်တဲ့အခါမှာတော့ သူတို့ခြင်းပေါင်းစပ်ပြီးထွက်လာသော အငွေ့သည် carcinogenic ဖြစ်စေနိုင်တယ်ဆိုတဲ့ အကြောင်းပါ။

အထူးသဖြင့် အသက်ရှုလမ်းကြောင်းဆိုင်ရာနဲ့ အဆုတ်မှာဖြစ်စေနိုင်သောအခြေအနေသည် လေလုံခန်းထဲမှာ နေ့စဉ်အမွှေးတိုင်အနံ့ကို တစ်နာရီခန့်ရှုမိပါက ရေရှည် စီးကရက်သောက်သူထက် ၂၀ % ပိုများတယ်လို့ လေ့လာချက်များကဆိုပါတယ်။ 

အမွှေးတိုင်အငွေ့မှာ အများဆုံးပါဝင်တာကတော့ carbon monoxide, sulfur dioxide နဲ့ formaldehyde တွေပဲဖြစ်ပါတယ်။

Mild problem အဖြစ်နဲ့ဆိုရင်တော့ incense smoke သည် ကိုယ်တွင်းအင်္ဂါများဖြစ်သော အဆုတ်၊ အသည်း စတာတွေကို ရေရှည်ဝေဒနာအဖြစ် ယောင်ရမ်းစေဖို့ အားပေးတာပါ။ oxidative stress လို့ခေါ်တဲ့ အသက်ရှုလမ်းကြောင်းမှာ အငွေ့များနဲ့ ပိတ်ခံရတာကြောင့် အောက်စီဂျင်ရရှိမှုပမာဏ မလုံလောက်ခြင်းကြောင့် ရေရှည်မှာဖြစ်လာတဲ့ ပြသနာလို့ဆိုပါတယ်။ 

နောက်ထပ်လေ့လာချက်တော့ air pollution ပါ။ အငွေ့တွေကြောင့် လေထုညစ်ညမ်းစေတာပါ။

ဒါကြောင့် အိမ်ခန်း ဘုရားခန်းနဲ့ လေဝင်လေထွက်နည်းတဲ့ အခန်းတွေမှာ အမွှေးတိုင်ပူဇော်ပြီး ပဌာန်းရွတ်ခြင်းမျိုးကို မိမိရဲ့ဆင်ခြင်တုံတရားနဲ့ ဆုံးဖြတ်နိုင်မယ်လို့ ထင်ပါတယ်။ ဘုရားရင်ပြင်တော်လိုမျိုးမှာ အမွှေးတိုင်တွေ စုပြုံပူဇော်တာနဲ့ပက်သက်လို့ကတော့ အမွှေးတိုင် ၂၀ ရဲ့ လောင်ကျွမ်းရာမှထွက်လာသော incense smoke သည် လေထုညစ်ညမ်းမှုကို ၃% တိုးစေပါသတဲ့။ 

အချုပ်အားဖြင့်တော့ - လေဝင်လေထွက်နည်းသောအခန်းမှာ တစ်နေ့တစ်နာရီခန့် အမွှေးတိုင်အနံ့ကို ကာလကြာရှည်စွာ ရှုရှိုက်မိနေခြင်းသည် အဆုတ်ကင်ဆာကိုဖြစ်နိုင်ဖို့အတွက် စီးကရက်သောက်သူထက် ပို၍အခွင့်အလန်းများတယ်ဆိုတဲ့အချက်ပါ။ 

မိမိအသိဉာဏ်ဖြင့် ဆင်ခြင်နိုင်ကြပါစေရန် ရေးသားခြင်းပါ။

DaDa

2002 B.Agr.Sc