မြေဆီလွှာ ဓာတ်ခွဲစမ်းသပ်ဖို့ ဘာကြောင့်လိုအပ်တာလဲ?

"မြေဆီလွှာကို ဓာတ်ခွဲစမ်းသပ်စစ်ဆေးခြင်းသည် ခေတ်မီစိုက်ပျိုးရေးနည်းစနစ်အတွက် အခြေခံကျသော နည်းလမ်းဖြစ်သည်။ ၎င်းသည် သီးနှံဖြစ်ထွန်းမှု၊ မြေသြဇာနှင့် သွင်းအားစုကို အကျိုးရှိရှိ ရေရှည်တည်တံ့စိုက်ပျိုးထုတ်လုပ်နိုင်သော အာဟာရစနစ်စီမံခန့်ခွဲမှုနှင့် အာဟာရဓာတ် ရရှိနိုင်မှုတို့အပေါ်မှာ လိုအပ်သော အချက်အလက်များကို ပံ့ပိုးပေးပါသည်။ မြေဆီလွှာ ခွဲခြမ်းစိတ်ဖြာခြင်းကို မှန်ကန်စွာ ဆောင်ရွက်နိုင်ပါက စိုက်ပျိုးရေးနှင့် စီးပွားရေးဆိုင်ရာ ဆုံးဖြတ်ချက်များ မှန်ကန်စွာ ချမှတ်နိုင်ရေးအတွက် များစွာအထောက်အကူပြုပါသည်။

မြေဆီလွှာ ခွဲခြမ်းစိတ်ဖြာခြင်းဆိုတာ ဘာကို ပြောတာလဲ??

မြေဆီလွှာ ခွဲခြမ်းစိတ်ဖြာခြင်းဆိုသည်မှာ အပင်ကြီးထွားမှုကို အကျိုးသက်ရောက်စေသည့် အာဟာရဓာတ် ရရှိနိုင်မှုနှင့် အရေးပါသော ဓာတု၊ ရူပနှင့် ဇီဝဗေဒဆိုင်ရာ ဂုဏ်သတ္တိများကို သိရှိနိုင်ရန် ဓာတ်ခွဲခန်း၌ မြေဆီလွှာနမူနာများကို တိုင်းတာစစ်ဆေးခြင်းကို ဆိုလိုသည်။

ဓာတုဗေဒဆိုင်ရာ မြေဆီလွှာ ခွဲခြမ်းစိတ်ဖြာခြင်းတွင် အဓိကအားဖြင့် နိုက်ထရိုဂျင် (N)၊ ဖော့စဖရပ်စ် (P₂O₅)၊ ပိုတက်စီယမ် (K₂O)၊ ဆာလဖာ (S)၊ ဆိုဒီယမ် နှင့် အနည်းလိုအာဟာရဓာတ်များ (Micronutrients)၊ မြေဆီလွှာ၏ အချဉ်အငန်ဓာတ် (pH)၊ သဘာဝပစ္စည်း (Organic matter) နှင့် ကာဗိုနိတ် ပါဝင်မှုတို့ကို တိုင်းတာလေ့ရှိသည်။ ၎င်းရလဒ်များသည် နမူနာကောက်ယူခဲ့သည့် မြေဧရိယာ၏ မြေဆီလွှာ ထက်သန်မှု အခြေအနေကို ဖော်ပြပေးသည်။

မြေဆီလွှာ၏ သိပ်သည်းဆ (Bulk density) သို့မဟုတ် ရေစိမ့်ဝင်နိုင်စွမ်း (Permeability) ကဲ့သို့သော အချို့သော ရူပဂုဏ်သတ္တိများကို သီးခြားစမ်းသပ်မှုနည်းလမ်းများဖြင့် တိုင်းတာစစ်ဆေးနိုင်ပါသည်။ ထို့ပြင် အဏုဇီဝသက်ရှိများ၏ လှုပ်ရှားမှုနှင့် အာဟာရဓာတ် စီးဆင်းမှုတို့ကို ပိုမိုနားလည်သဘော ပေါက်စေရန် အထူးဖော်ထုတ်ထားသော မြေဆီလွှာကျန်းမာရေး စမ်းသပ်မှုများကို အသုံးပြု၍ ဇီဝဗေဒဆိုင်ရာ ညွှန်းကိန်းများကိုလည်း စစ်ဆေးအကဲဖြတ်နိုင်ပါသည်။

မြေဆီလွှာ ခွဲခြမ်းစိတ်ဖြာဖို့ ဘာကြောင့် အရေးကြီးတာလဲ??

မြေဆီလွှာ ခွဲခြမ်းစိတ်ဖြာခြင်းသည် စိုက်ပျိုးရေးဆိုင်ရာ စီမံခန့်ခွဲမှုတွင် အလွန်အရေးပါသော အခန်းကဏ္ဍမှ အောက်ပါအတိုင်း အထောက်အကူပြုပါသည်။

• မြေဆီလွှာအတွင်း အာဟာရဓာတ် ရရှိနိုင်မှုအခြေအနေကို အကဲဖြတ်ရန်

• မြေဩဇာသုံးစွဲမှု အစီအစဉ်ဆွဲခြင်းနှင့် သွင်းအားစုများ အကျိုးရှိရှိ ထိရောက်စွာ အသုံးပြုနိုင်ရေးအတွက် ပံ့ပိုးပေးရန်

• သီးနှံအမျိုးအစားတစ်ခုချင်းစီ သို့မဟုတ် စိုက်ခင်းအလိုက် အာဟာရဓာတ် လိုအပ်ချက် အခြေအနေကို သုံးသပ်ရန်

• သီးနှံအထွက်နှုန်း၊ သီးနှံအရည်အသွေးနှင့် အကျိုးအမြတ်ရရှိမှုကို သက်ရောက်စေသည့် ဆုံးဖြတ်ချက်များအတွက် အထောက်အပံ့ဖြစ်စေရန်

မြေဆီလွှာ ခွဲခြမ်းစိတ်ဖြာခြင်းသည် မြေဆီလွှာ၏ အာဟာရဓာတ် ပါဝင်မှုကို စိုက်ပျိုးမည့် သီးနှံ၏ လိုအပ်ချက်များနှင့် နှိုင်းယှဉ်ပြီး မလိုလားအပ်သော သွင်းအားစု ကုန်ကျစရိတ်များကို လျှော့ချပေးကာ လိုအပ်သော မြေဩဇာနှုန်းထားပမာဏများကို  လမ်းညွှန်ဖော်ပြပေးပါသည်။

ပိုမိုတိကျသော မြေဆီလွှာ ခွဲခြမ်းစိတ်ဖြာမှုသည် စိုက်ပျိုးထုတ်လုပ်မှု သံသရာတစ်လျှောက် ကောင်းမွန်သော ဆုံးဖြတ်ချက်များ ချမှတ်နိုင်ပြီး ပိုမိုထိရောက်၍ ရေရှည်တည်တံ့သည့် စိုက်ပျိုးရေး နည်းစနစ်များသို့ ဖြစ်ပေါ်ရောက်ရှိစေပါသည်။

ဆောင်းပါးရှင်ဆရာမှ အစိမ်းရောင်လမ်းဆော့ဝဲသို့ ပေးပို့ထားသော အစိမ်းရောင်လမ်း၏ မူပိုင်ဆောင်းပါးဖြစ်သဖြင့် ဆောင်းပါးများ၊ သတင်းများ ကူးယူဖော်ပြလိုပါက “အစိမ်းရောင်လမ်းမှ ကူးယူဖော်ပြပါသည်ဟု” ထည့်ပေးပါရန် မေတ္တာရပ်ခံအပ်ပါသည်။